എസ്ഐആർ ഡാറ്റാ എൻട്രി: പരിശീലനം ലഭിക്കാതെ അംഗൻവാടി അധ്യാപകർ വലയുന്നു

കുമ്പള: (KasargodVartha) എന്യൂമറേഷൻ ഫോമുകളുടെ വിതരണവും, തിരികെ വാങ്ങലും 80 ശതമാനം പൂർത്തിയാക്കിയ ബിഎൽഒമാരായ അംഗൻവാടി ടീച്ചർമാർക്ക് വേണ്ടത്ര പരിശീലനം ലഭിക്കാത്തതുമൂലം ഡാറ്റാ എൻട്രിയിൽ പ്രതിസന്ധി നേരിടുന്നു.

ശേഖരിച്ച ഫോമുകളിലെ വിവരങ്ങൾ മൊബൈൽ ആപ്പ് വഴി അപ്‌ലോഡ് ചെയ്യലാണ് ബിഎൽഒമാരായ അംഗൻവാടി ടീച്ചർമാർക്ക് പ്രധാന പ്രശ്നം സൃഷ്ടിക്കുന്നത്. പലയിടത്തും സഹായത്തിന് ആളെ കിട്ടാത്ത അവസ്ഥയുമുണ്ട്. തങ്ങളുടെ നിസ്സഹായാവസ്ഥ ബന്ധപ്പെട്ടവരെയും നാട്ടിലെ സന്നദ്ധ സംഘടനകളെയും ടീച്ചർമാർ അറിയിക്കുന്നുണ്ട്.

ഫോമിലെ വിവരങ്ങൾ മൊബൈൽ ഫോൺ പരിമിതിക്കുള്ളിൽ ആപ്പിൽ നൽകണം. വോട്ടർമാർ നൽകിയ ഫോട്ടോയും അതിനുശേഷം ഫോം ഒന്നാകെയും സ്കാൻ ചെയ്ത് അപ്‌ലോഡ് ചെയ്യണം. ഇതാണ് അംഗൻവാടി ടീച്ചർമാരെ കുഴക്കുന്നത്. 

ഇതിന് അധികൃതർ സമയപരിധി നിശ്ചയിച്ചതോടെ ബിഎൽഒമാരായ അംഗൻവാടി ടീച്ചർമാർ ധർമ്മസങ്കടത്തിലാണ്. അതേസമയം, അധ്യാപകർ ഏറ്റെടുത്ത ഉത്തരവാദിത്വം കഠിന പ്രയത്നത്തിലൂടെ ഭംഗിയായി നിർവഹിക്കുന്നുമുണ്ട്.

ഡിസംബർ നാലിന് വിവരശേഖരണം പൂർത്തിയാക്കണമെന്നാണ് മുകളിൽ നിന്നുള്ള നിർദ്ദേശം. ഡിസംബർ ഒൻപതിന് കരട് പട്ടിക പുറത്തിറക്കുമെന്നാണ് അധികൃതർ പറയുന്നത്. ഇത് സാധ്യമാകുമോ എന്ന കാര്യത്തിൽ ബിഎൽഒമാർക്ക് തന്നെ ഒരു ഉറപ്പുമില്ല. അതുകൊണ്ടുതന്നെ എസ്ഐആർ നടപടികൾ നീട്ടണമെന്നാണ് രാഷ്ട്രീയപ്പാർട്ടികളുടെ ആവശ്യം.

അതിനിടെ, കേരളത്തിൽ സമഗ്ര വോട്ടർ പട്ടിക പരിഷ്കരണത്തിന്റെ ഭാഗമായി പൂരിപ്പിച്ച എന്യൂമറേഷൻ ഫോം ശേഖരിക്കാൻ രാഷ്ട്രീയപ്പാർട്ടി പ്രതിനിധികളായ ബൂത്ത് ലെവൽ ഏജന്റുമാരുടെ (ബിഎൽഎ) സഹായം തേടാൻ കേന്ദ്ര തെരഞ്ഞെടുപ്പ് കമ്മീഷൻ തീരുമാനിച്ചത് ആശ്വാസമായിട്ടുണ്ട്.

ഈ വിഷയത്തിൽ നിങ്ങളുടെ അഭിപ്രായം കമൻ്റ് ചെയ്യുക. അധ്യാപകരുടെ പ്രയാസം അധികാരികളുടെ ശ്രദ്ധയിൽപ്പെടുത്താൻ ഇത് ഷെയർ ചെയ്യുക. 

Article Summary: Anganwadi teachers acting as BLOs struggle with data entry for SIR due to lack of training, leading to a delay in voter list revision.

#VoterListRevision #AnganwadiTeachers #DataEntry #KeralaElections #BLO #Kasargod