തഹസിൽദാർ ആക്രമണ കേസ്: എകെഎം അഷ്‌റഫിന്റെ ശിക്ഷ ജില്ലാ കോടതി കുറച്ചു; ഹൈകോടതിയെ സമീപിക്കുമെന്ന് എംഎൽഎ

കാസർകോട്: (KasargodVartha) തഹസിൽദാരെ ആക്രമിച്ച കേസിൽ മഞ്ചേശ്വരം എംഎൽഎ എകെഎം അഷ്‌റഫിനും മറ്റ് ലീഗ് പ്രവർത്തകർക്കുമെതിരെയുള്ള ശിക്ഷ കാസർകോട് ജില്ലാ അഡിഷണൽ സെഷൻസ് ജഡ്ജ് കെ. പ്രിയ കുറച്ചു. 

കീഴ് കോടതി വിധിച്ച ഒന്നര വർഷം തടവും 10,000 രൂപ പിഴയും ഒഴിവാക്കി മൂന്ന് മാസം തടവും 10,000 രൂപ പിഴയും അടച്ചാൽ മതിയെന്നാണ് പുതിയ വിധി. എകെഎം അഷ്‌റഫിനെ കൂടാതെ പഞ്ചായത്ത് അംഗമായിരുന്ന അബ്ദുല്ല കജ, ബഷീർ കനില, അബ്ദുൽ ഖാദർ എന്നിവർക്കും ശിക്ഷാ ഇളവ് ലഭിച്ചിട്ടുണ്ട്.

2010 ജനുവരിയിൽ നടന്ന സംഭവത്തിലാണ് കേസിനാസ്പദമായ സംഭവം. കാസർകോട് ജുഡീഷ്യൽ ഒന്നാംക്ലാസ് മജിസ്‌ട്രേറ്റ് (രണ്ട്) ടി.വി. അബ്ദുൽ ബാസിത് നേരത്തെ ഒന്നര വർഷം തടവിനും 10,000 രൂപ പിഴയ്ക്കും ശിക്ഷ വിധിച്ചിരുന്നു. ഈ വിധിക്കെതിരെ സമർപ്പിച്ച അപ്പീലിലാണ് ജില്ലാ കോടതിയുടെ ഇളവ്. 

എന്നാൽ, ഈ വിധിയിൽ തൃപ്തനല്ലാത്തതിനാൽ ശിക്ഷ പൂർണ്ണമായി ഒഴിവാക്കിക്കിട്ടാൻ ഹൈകോടതിയിൽ അപ്പീൽ നൽകുമെന്ന് എകെഎം അഷ്‌റഫ് കാസർകോട് വാർത്തയോട് പ്രതികരിച്ചു.

വോട്ടർപട്ടികയിൽ പേര് ചേർക്കുന്നതുമായി ബന്ധപ്പെട്ട് ഉദ്യോഗസ്ഥരുടെ ഔദ്യോഗിക കൃത്യനിർവഹണം തടസ്സപ്പെടുത്തിയെന്നാണ് കേസ്. രണ്ട് വകുപ്പുകളിലായിരുന്നു ശിക്ഷ പ്രഖ്യാപിച്ചത്. മഞ്ചേശ്വരം ബ്ലോക്ക് പഞ്ചായത്ത് ഓഫീസിൽ നടന്ന പേര് ചേർക്കൽ അപേക്ഷാ പരിശോധനക്കിടെയാണ് സംഭവം. 

ബങ്കര മഞ്ചേശ്വരത്തെ താമസക്കാരനായ കർണാടക സ്വദേശി മുനവർ ഇസ്മയിലിന്റെ അപേക്ഷ നിരസിച്ചതിനെ തുടർന്ന്, കർണാടകയിലെ വോട്ട് നീക്കിയ രേഖ ഹാജരാക്കിയാൽ ഇവിടെ പേര് ചേർക്കാമെന്ന് ഡെപ്യൂട്ടി തഹസിൽദാർ എ. ദാമോദരൻ അറിയിച്ച് മുനവറിനെ മടക്കി അയക്കുകയായിരുന്നു. 

തുടർന്ന്, അന്നത്തെ ജില്ലാ പഞ്ചായത്ത് അംഗമായിരുന്ന എ.കെ.എം. അഷ്‌റഫ്, പഞ്ചായത്തംഗമായിരുന്ന അബ്ദുല്ല കജ, ബഷീർ കനില, അബ്ദുൽഖാദർ എന്നിവർ ചേർന്ന് ദാമോദരനെ തടഞ്ഞുവെച്ച് ഔദ്യോഗിക കൃത്യനിർവഹണം തടസ്സപ്പെടുത്തിയെന്നാണ് കേസ്.

ഈ കോടതി വിധിയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക 

Article Summary: AKM Ashraf's sentence reduced; MLA to appeal in High Court.

#AKMAshraf #Kasaragod #CourtVerdict #MLA #LegalNews #KeralaPolitics