മഞ്ചേശ്വരം, കാസർകോട് മണ്ഡലങ്ങളിൽ തെരഞ്ഞെടുപ്പു അട്ടിമറിക്കാൻ പണം നൽകിയെന്ന പരാതിയിൽ സമഗ്ര അന്വേഷണം നടത്തണമെന്ന് എ അബ്ദുർ റഹ്‌മാൻ

കാസർകോട്: (www.kasargodvartha.com 14.06.2021) കഴിഞ്ഞ നിയമസഭാ തെരഞ്ഞെടുപ്പിൽ മഞ്ചേശ്വരം, കാസർകോട് നിയോജക മണ്ഡലങ്ങളിൽ പണം നൽകി തെരഞ്ഞെടുപ്പ് അട്ടിമറിക്കാനും സ്ഥാനാർഥിയെ പിൻവലിപ്പിക്കാനും വോട് ചെയ്യാനും ചെയ്യാതിരിക്കാനും വേണ്ടി ബി ജെ പി നടത്തിയ ദേശദ്രോഹ പ്രവർത്തനങ്ങൾ സംബന്ധിച്ച് സമഗ്ര അന്വേഷണം നടത്താൻ തയ്യാറാകണമെന്ന് മുസ്ലിം ലീഗ് ജില്ലാ ജനറൽ സെക്രടറി എ അബ്ദുർ റഹ്‌മാൻ ആവശ്യപ്പെട്ടു.

രണ്ട് നിയോജക മണ്ഡലങ്ങളിലും കോടിക്കണക്കിന് രൂപയുടെ കള്ളപ്പണമാണ് തെരഞ്ഞെടുപ്പ് പ്രവർത്തനങ്ങൾക്കായി ബി ജെ പി ചിലവഴിച്ചത്. വോടുകൾ ലഭിക്കുന്നതിന് വേണ്ടി പണവും ഭക്ഷണ കിറ്റും നൽകുകയും, വോട് ചെയ്യാതിരിക്കാൻ വേണ്ടി ഭീഷണിപ്പെടുത്തുകയും തിരിച്ചറിയൽ കാർഡ് വാങ്ങുകയും സ്ഥാനാർഥിയെ പിൻവലിപ്പിക്കുന്നതിനു പണം നൽകുകയും ചെയ്തിട്ടുണ്ട്.