തൃശൂരില്‍ ട്രെയിനില്‍ നിന്നും വീണ് ഗുരുതരമായി പരിക്കേറ്റ് ചികിത്സയിലായിരുന്ന യുവാവ് മരണപ്പെട്ടു; മൂത്തസഹോദരനു പിന്നാലെ അനുജനെയും അപകട മരണം തട്ടിയെടുത്തത് കുടുംബത്തെ കണ്ണീര്‍കയത്തിലാഴ്ത്തി

By Web Desk - MainJan 27, 2020, 17:01 IST

വിദ്യാനഗര്‍: (www.kasargodvartha.com 27.01.2020) തൃശൂരില്‍ ട്രെയിനില്‍ നിന്നും വീണ് ഗുരുതരമായി പരിക്കേറ്റ് ചികിത്സയിലായിരുന്ന യുവാവ് മരണപ്പെട്ടു. പടുവടുക്കത്തെ ഡ്രൈവര്‍ മുഹമ്മദ് കുഞ്ഞിയുടെ മകന്‍ അജ്മല്‍ (20) ആണ് മരിച്ചത്. മൂത്തസഹോദരനു പിന്നാലെ അനുജനെയും അപകട മരണം തട്ടിയെടുത്തത് കുടുംബത്തെ കണ്ണീര്‍കയത്തിലാഴ്ത്തി.

അജ്മല്‍ എറണാകുളത്ത് ജോലി അന്വേഷിക്കാനായി പോയി തിരിച്ചുവരുന്നതിനിടെയാണ് തൃശൂരില്‍ വെച്ച് അപകടമുണ്ടായത്. ട്രെയിനില്‍ നിന്നും വീണ് ഗുരുതരമായി പരിക്കേറ്റ അജ്മല്‍ ഗുരുതരാവസ്ഥയില്‍ ചികിത്സയിലായിരുന്നു. ഞായറാഴ്ചയാണ് മരണത്തിന് കീഴടങ്ങിയത്.

അജ്മലിന്റെ മൂത്ത സഹോദരന്‍ നിസാമുദ്ദീന്‍ 2018 ജൂണ്‍ 15നാണ് അണങ്കൂരില്‍ വെച്ച് ഗ്യാസ് സിലിണ്ടര്‍ കയറ്റിപോകുകയായിരുന്ന ലോറിയും കാറും കൂട്ടിയിടിച്ചുണ്ടായ അപകടത്തില്‍ മരണപ്പെട്ടത്. മിസ് രിയയാണ് മാതാവ്.