ഉദുമയില്‍ ടാക്‌സി ഡ്രൈവര്‍ കാറിടിച്ച് മരിച്ചു

ഉദുമ: നടന്നുപോകുകയായിരുന്ന ടാക്‌സി ഡ്രൈവര്‍ കാറിടിച്ച് മരിച്ചു. ഉദുമ ഈച്ചിലിങ്കാല്‍ കച്ചായീസിലെ പ്രഭാകരന്‍(53) ആണ് മരിച്ചത്. ഉദുമ ഉദയമംഗലത്ത് രാത്രി ഒമ്പത് മണിയോടെയാണ് സംഭവം. സുഹൃത്തിന്റെ വീട്ടിലേക്ക് പോയി തിരിച്ച് ഉദുമ ഭാഗത്തേക്ക് നടന്നു വരികയായിരുന്ന പ്രഭാകരനെ കാഞ്ഞങ്ങാട് ഭാഗത്ത് നിന്നും വരികയായിരുന്ന കെ.എല്‍ 60 സി 3375 റിഡ്‌സ് കാര്‍ ഇടിച്ചു തെറിപ്പിക്കുകയായിരുന്നു. ഉടന്‍ ഉദുമയിലെ സ്വകാര്യ ആശുപത്രിയിലും പിന്നീട് കാസര്‍കോട്ടെ സ്വകാര്യ ആശുപത്രിയിലും പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല.

ഈച്ചിലിങ്കാലിലെ പരേതനായ കച്ചായി കുഞ്ഞിരാമന്റെയും മാധവിയുടെയും മകനാണ്. മൃതദേഹം കാസര്‍കോട് ജനറല്‍ ആശുപത്രി മോര്‍ച്ചറിയിലേക്ക് മാറ്റി. വ്യാഴാഴ്ച രാവിലെ പോസ്റ്റുമോര്‍ട്ടത്തിന് ശേഷം വീട്ടുവളപ്പില്‍ സംസ്‌കരിക്കും.

അവിവാഹിതനാണ്. സഹോദരങ്ങള്‍: രാജേന്ദ്രന്‍, കരുണന്‍, ഗംഗന്‍, പുരുഷോത്തമന്‍, ഭാരതി.