ശ്രീനന്ദയുടെ മരണം; പ്രാഥമിക പോസ്റ്റുമോർട്ടം റിപ്പോർട്ട് പുറത്ത്, മരണകാരണം തലയിലേറ്റ ഗുരുതര പരിക്ക്

ചിക്കമംഗളൂരു: (KasargodVartha) വിനോദസഞ്ചാരത്തിനിടെ കാണാതാവുകയും പിന്നീട് മരിച്ച നിലയിൽ കണ്ടെത്തുകയും ചെയ്ത ശ്രീനന്ദയുടെ പ്രാഥമിക പോസ്റ്റുമോർട്ടം റിപ്പോർട്ട് പുറത്ത്. തലയുടെ വലത് ഭാഗത്തേറ്റ ഗുരുതര പരിക്കാണ് മരണകാരണം എന്നാണ് പ്രാഥമിക റിപ്പോർട്ട് സൂചിപ്പിക്കുന്നത്.

ശരീരമാസകലം പരിക്കുകൾ

ശരീരത്തിൽ ഉടനീളം പരിക്കുകളുണ്ട്. പലയിടത്തും അസ്ഥികൾ പൊട്ടിയ നിലയിലാണ്. പരിക്കുകൾ വീഴ്ചയിൽ സംഭവിച്ചതാണെന്നും മരണത്തിൽ മറ്റ് അസ്വാഭാവികതകളില്ലെന്നും പ്രാഥമിക പോസ്റ്റുമോർട്ടം റിപ്പോർട്ടിൽ പറയുന്നു.പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ടുനൽകിയ ശ്രീനന്ദയുടെ മൃതദേഹം 2026 ഏപ്രിൽ 11 ശനിയാഴ്ച രാവിലെ ഒൻപത് മണിക്ക് ഒറ്റപ്പാലം കടമ്പഴിപ്പുറത്തെ വീട്ടിലെത്തിച്ചു.  പൊതുദർശനത്തിന് വെച്ചു. 10.30-ഓടെ വീട്ടിലെ ചടങ്ങുകൾക്ക് ശേഷം ലക്കിടി, തിരുവില്വാമല ഐവർമഠത്തിലാണ് സംസ്കാര ചടങ്ങുകൾ.

മരിച്ച നിലയിൽ കണ്ടെത്തിയത് വെള്ളിയാഴ്ച

ചിക്കമംഗളൂരുവിൽ വിനോദസഞ്ചാരത്തിന് എത്തി കാണാതായ ശ്രീനന്ദയെ 2026 ഏപ്രിൽ പത്ത് വെള്ളിയാഴ്ച ഉച്ചയോടെയാണ് മരിച്ച നിലയിൽ കണ്ടെത്തിയത്. കുട്ടിയെ കാണാതായ മാണിക്യധാര വെള്ളച്ചാട്ടത്തിന് 1500 അടി താഴെ നിന്നാണ് മൃതദേഹം ലഭിച്ചത്. തെർമൽ ഡ്രോണിന്റെ മോണിറ്ററിലാണ് മൃതദേഹം പതിഞ്ഞത്. മലയടിവാരത്ത് നിന്ന് മുകളിലേക്ക് നടത്തിയ പരിശോധനയിലാണ് മൃതദേഹം കണ്ടെത്താനായത്. കർണാടക പോലീസിന്റെ ഫോറൻസിക് വിദഗ്ധരും മറ്റ് ഉദ്യോഗസ്ഥരും ശ്രീനന്ദയുടെ അച്ഛന്റെ സാന്നിധ്യത്തിൽ മൃതദേഹം കണ്ടെത്തിയ ഭാഗത്ത് വിശദമായ പരിശോധന നടത്തിയിരുന്നു.

കുടുംബത്തിന്റെ ആരോപണം

കുട്ടി എങ്ങനെ ഇവിടെ എത്തി എന്നത് സംബന്ധിച്ച് ദുരൂഹത തുടരുകയാണ്. അബദ്ധത്തിൽ കുട്ടി ഇവിടേക്ക് വീഴാൻ ഒരു സാധ്യതയുമില്ലെന്നാണ് കുടുംബം വ്യക്തമാക്കുന്നത്. ആരെങ്കിലും അപായപ്പെടുത്തി ഈ പ്രദേശത്ത് കൊണ്ടുവന്നിട്ടതാകാമെന്നാണ് കുടുംബത്തിന്റെ ആരോപണം. ഈ ആരോപണം ഗൗരവമായി പരിശോധിക്കുമെന്നും ഒരു സാധ്യതയും തള്ളിക്കളയില്ലെന്നും ചിക്കമഗളൂരു ജില്ലാ പോലീസ് മേധാവി വ്യക്തമാക്കി. ചെങ്കുത്തായ മലയുടെ ഉള്ളിലേക്കുള്ള ഒരു ഭാഗത്തായിരുന്നു മൃതദേഹം കിടന്നിരുന്നത്. പത്താം ക്ലാസ് പരീക്ഷ പൂർത്തിയാക്കി കുടുംബാംഗങ്ങൾക്കും അയൽക്കാർക്കും ഒപ്പം എത്തിയതായിരുന്നു കടമ്പഴിപ്പുറം സ്വദേശി രമേശിന്റെയും രോഹിണിയുടെയും മകളായ ശ്രീനന്ദ.

ഈ ദാരുണസംഭവത്തെക്കുറിച്ചുള്ള വാർത്ത നിങ്ങളുടെ സുഹൃത്തുക്കൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. പ്രാദേശിക വാർത്തകളും മറ്റ് പ്രധാന അപ്‌ഡേറ്റുകളും അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വിഷയത്തിലുള്ള നിങ്ങളുടെ അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താനും മറക്കരുത്. പുതിയ അപ്‌ഡേറ്റുകൾ ലഭിക്കാൻ ഫേസ്ബുക്ക് പേജ് ഫോളോ ചെയ്യുക.

Article Summary: The preliminary postmortem report of Sreenanda, a 15-year-old girl from Palakkad who died in Chikmagalur, Karnataka, attributes her death to a severe head injury and multiple fractures consistent with a fall. While the report rules out other unnatural causes, her family suspects foul play, prompting the police to investigate all possibilities. Sreenanda's body was brought home on Saturday morning for cremation.

#Sreenanda #Chikmagalur #PalakkadNews #KeralaNews #PostmortemReport #KarnatakaNews #MalayalamNews