സമസ്ത ഉപാധ്യക്ഷൻ യു എം അബ്ദുറഹ്‌മാൻ മൗലവി അന്തരിച്ചു

കാസർകോട്: (KasargodVartha) സമസ്ത കേരള ജംഇയ്യത്തുൽ ഉലമ ഉപാധ്യക്ഷനും ചട്ടഞ്ചൽ മലബാർ ഇസ്ലാമിക് കോംപ്ലക്സ് ജനറൽ സെക്രട്ടറിയുമായ മൊഗ്രാൽ കടവത്ത് ദാറുസ്സലാമിൽ യു.എം അബ്ദുറഹ്‌മാൻ മൗലവി (86) അന്തരിച്ചു. ഒരാഴ്ചയായി കാസർകോട്ടെ സ്വകാര്യ ആശുപത്രിയിൽ ചികിത്സയിലായിരുന്നു. ആരോഗ്യനില മെച്ചപ്പെടാത്തതിനെ തുടർന്ന് ശനിയാഴ്ച വസതിയിലേക്ക് മാറ്റിയിരുന്നു. തിങ്കളാഴ്ച രാവിലെ 9.15-ഓടെയായിരുന്നു അന്ത്യം.

വിദ്യാഭ്യാസവും മതപഠനവും

അബ്ദുൽഖാദിറിന്റെയും ഖദീജയുടെയും മകനായി 1939 നവംബർ രണ്ടിനായിരുന്നു അബ്ദുറഹ്മാൻ മൗലവിയുടെ ജനനം. സ്കൂൾ വിദ്യാഭ്യാസത്തിന് ശേഷം 1963-64 കാലഘട്ടത്തിൽ മൗലവി ഫാദിൽ ബാഖവി വിദ്യാഭ്യാസം നേടിയ അദ്ദേഹം മംഗളൂരു പറങ്കിപേട്ട ജുമാമസ്ജിദ്, മംഗളൂരു അസ്ഹരിയ്യ കോളേജ്, കരുവൻതിരുത്തി, പടന്ന ജുമാമസ്ജിദ്, കൊണ്ടോട്ടി പഴയങ്ങാടി ജുമാമസ്ജിദ്, വെല്ലൂർ ബാഖിയാത്തുസ്വാലിഹാത്ത് എന്നിവിടങ്ങളിൽ മതപഠനം നടത്തി. 

മൊഗ്രാൽ അബ്ദുറഹ്മാൻ മുസ്ലിയാർ, കുറ്റിപ്പുറം അബ്ദുൽ ഹസൻ, കെ. അബ്ദുല്ല മുസ്ലിയാർ, വെളിമുക്ക് കെ.ടി മുഹമ്മദ് കുട്ടി മുസ്ലിയാർ, ചാലിയം പി. അബ്ദുറഹ്മാൻ മുസ്ലിയാർ, എം.എം ബഷീർ മുസ്ലിയാർ, ശൈഖ് ഹസൻ ഹസ്രത്ത്, അബൂബക്കർ ഹസ്രത്ത്, കെ.കെ ഹസ്രത്ത്, മുസ്തഫ ആലിം എന്നിവരായിരുന്നു പ്രധാന ഗുരുനാഥന്മാർ.

സംഘടനാ രംഗത്തെ മികവ്

1992-ലാണ് അദ്ദേഹം സമസ്ത കേന്ദ്ര മുശാവറ അംഗമാകുന്നത്. 1991 മുതൽ സമസ്ത കേരള ഇസ്ലാം മത വിദ്യാഭ്യാസ ബോർഡ് അംഗം, സമസ്ത കാസർകോട് ജില്ലാ മുശാവറ അംഗം, എസ്.വൈ.എസ് സംസ്ഥാന കൗൺസിൽ അംഗം, സമസ്ത കാസർകോട് ജില്ലാ ജനറൽ സെക്രട്ടറി, എസ്.എം.എഫ് മഞ്ചേശ്വരം മണ്ഡലം ചെയർമാൻ, 1974 മുതൽ സമസ്ത കാസർകോട് താലൂക്ക് ജനറൽ സെക്രട്ടറി എന്നീ നിലകളിൽ പ്രവർത്തിച്ചു.

നിലവിൽ ബദിയടുക്ക കണ്ണിയത്ത് അക്കാദമി പ്രസിഡന്റ്, ചെമ്മാട് ദാറുൽ ഹുദ ഇസ്ലാമിക് സർവ്വകലാശാല സെനറ്റ് അംഗം, നീലേശ്വരം മർക്കസുദ്ദഅ്‌വ വൈസ് പ്രസിഡന്റ് എന്നീ ചുമതലകൾ വഹിച്ചു വരികയായിരുന്നു. കുമ്പള, ഇച്ചിലങ്കോട്, മൊഗ്രാൽ, തൃക്കരിപ്പൂർ ബീരിച്ചേരി, പുതിയങ്ങാടി, കളനാട് ഹൈദ്രോസ്, വൾവക്കാട് ജുമാമസ്ജിദുകളിൽ ദർസ് നടത്തിയിട്ടുണ്ട്.

കുടുംബം

ഭാര്യമാർ: സകിയ്യ, പരേതയായ മറിയം. മക്കൾ: മുഹമ്മദലി ശിഹാബ്, ഫള്‌ലുറഹ്‌മാൻ, നൂറുൽ അമീൻ, അബ്ദുല്ല ഇർഫാൻ, ഷഹീറലി ശിഹാബ് (എല്ലാവരും വിദേശത്ത്), ഖദീജ, മറിയം ഷാഹിന (നാലാം മൈൽ). പരേതരായ മുഹമ്മദ് മുജീബ് റഹ്‌മാൻ, ആയിശത്തുഷാഹിദ (ചേരൂർ) എന്നിവർ മറ്റ് മക്കളാണ്. 

മരുമക്കൾ: യു.കെ മൊയ്തീൻ കുട്ടി മൗലവി (മൊഗ്രാൽ), സി.എ അബ്ദുൽ ഖാദർ ഹാജി (സൗദി അറേബ്യ), ഇ. അഹമ്മദ് ഹാജി (ചേരൂർ), ഖദീജ (ആലംപാടി), മിസ്രിയ്യ (കൊടിയമ്മ), സഫീന (തളങ്കര), മിസ്രിയ്യ (പേരാൽ കണ്ണൂർ), ജാസിറ (മുട്ടത്തൊടി), ജുമാന (മൊഗ്രാൽ).

യു.എം അബ്ദുറഹ്‌മാൻ മൗലവിയുടെ നിര്യാണത്തിൽ അനുശോചനം അറിയിക്കൂ, ഈ വാർത്ത പങ്കുവെക്കൂ.

Article Summary: Senior Samastha leader and MIC General Secretary UM Abdul Rahman Musliyar passed away in Kasaragod at the age of 86.

#UMAbdulRahmanMusliyar #Samastha #Kasaragod #Obituary #IslamicScholar #KeralaMuslims