പഞ്ചായത്ത് മെമ്പറായ മത പണ്ഡിതൻ! ഒടുവിൽ സമസ്തയുടെ അമരത്ത്; 'യു.എം' എന്ന കർമ്മയോഗി നടന്നുതീർത്തത് സമാനതകളില്ലാത്ത വഴികൾ; അനുശോചനപ്രവാഹത്തിൽ വിങ്ങലായി നാട്

കാസർകോട്: (KasargodVartha) മതപണ്ഡിതൻ, രാഷ്ട്രീയ നേതാവ്, മികച്ച സംഘാടകൻ, വിട്ടുവീഴ്ചയില്ലാത്ത നിലപാടുകാരൻ... തിങ്കളാഴ്ച രാവിലെ വിടവാങ്ങിയ യു.എം അബ്ദുർ റഹ്മാൻ മൗലവി എന്ന യു.എം ഉസ്താദിനെ വിശേഷിപ്പിക്കാൻ വാക്കുകൾ മതിയാവില്ല. സമസ്തയുടെ വൈസ് പ്രസിഡന്റ് എന്ന ഉന്നത പദവിയിൽ ഇരിക്കുമ്പോഴും, കാസർകോടിന്റെ മണ്ണിൽ അദ്ദേഹം പടുത്തുയർത്തിയ മത-വിദ്യാഭ്യാസ സ്ഥാപനങ്ങളുടെയും ജനകീയ സേവനങ്ങളുടെയും പേരിലാകും ചരിത്രം അദ്ദേഹത്തെ അടയാളപ്പെടുത്തുക.

തിങ്കളാഴ്ച രാവിലെ വിയോഗവാർത്ത പുറത്തുവന്നതോടെ, കാസർകോടിന്റെ നാനാഭാഗങ്ങളിൽ നിന്നും പ്രവർത്തകരും നേതാക്കളും അദ്ദേഹത്തിന്റെ വസതിയിലേക്ക് ഒഴുകിയെത്തി. പാണക്കാട് സാദിഖലി ശിഹാബ് തങ്ങൾ, ജിഫ്രി മുത്തുക്കോയ തങ്ങൾ തുടങ്ങിയ പ്രമുഖ നേതാക്കൾ അനുശോചനം രേഖപ്പെടുത്തി.

ആ വലിയ മനുഷ്യന്റെ ജീവിതത്തിലെ തിളക്കമാർന്ന അഞ്ച് ഏടുകൾ ഇതാ:

1. സി.എം ഉസ്താദിന്റെ 'നിഴൽ' 

കാസർകോടിന്റെ മതനവോത്ഥാന ചരിത്രത്തിൽ ചെമ്പരിക്ക ഖാസി സി.എം അബ്ദുല്ല മൗലവിയുടെ പേരിനൊപ്പം എപ്പോഴും ചേർത്തുനിർത്താവുന്ന പേരായിരുന്നു യു.എം. സി.എം ഉസ്താദിന്റെ സന്തത സഹചാരിയായിരുന്ന അദ്ദേഹം, സി.എം ഉസ്താദ് സ്വപ്നം കണ്ട പല പദ്ധതികളും പ്രാവർത്തികമാക്കിയ വിശ്വസ്തനായിരുന്നു. 80-കളിൽ സഅദിയ്യയുടെ ജനറൽ സെക്രട്ടറിയായും പിന്നീട് മലബാർ ഇസ്ലാമിക് കോംപ്ലക്സിന്റെ (എം.ഐ.സി) ജനറൽ സെക്രട്ടറിയായും അദ്ദേഹം നടത്തിയ പ്രവർത്തനം ഇതിന് തെളിവാണ്. സി.എം ഉസ്താദ് പ്രസിഡന്റും യു.എം ഉസ്താദ് സെക്രട്ടറിയുമായുള്ള കൂട്ടുകെട്ടാണ് എം.ഐ.സിയെ ഇന്നത്തെ നിലയിൽ എത്തിച്ചത്.

2. മെമ്പറായ മൗലവി 

മതപണ്ഡിതർ സജീവ രാഷ്ട്രീയത്തിൽ നിന്ന് മാറിനിൽക്കുകയോ, പുറമെ മാത്രം പിന്തുണയ്ക്കുകയോ ചെയ്തിരുന്ന കാലത്ത് ജനവിധി തേടി ജയിച്ച പണ്ഡിതനായിരുന്നു യു.എം. മുസ്ലിം ലീഗ് രാഷ്ട്രീയത്തിൽ സജീവമായിരുന്ന അദ്ദേഹം മൊഗ്രാൽ പഞ്ചായത്ത് തെരഞ്ഞെടുപ്പിൽ മത്സരിക്കുകയും മെമ്പറായി തെരഞ്ഞെടുക്കപ്പെടുകയും ചെയ്തു. ലീഗ് പിളർന്നപ്പോൾ അഖിലേന്ത്യാ ലീഗിനൊപ്പം (യൂണിയൻ ലീഗ്) അദ്ദേഹം ഉറച്ചുനിന്നു. ഉലമാക്കളും ഉമറാക്കളും (പണ്ഡിതരും രാഷ്ട്രീയ നേതാക്കളും) തമ്മിലുള്ള ബന്ധം ഊഷ്മളമായി കൊണ്ടുപോകുന്നതിൽ അദ്ദേഹം എന്നും ശ്രദ്ധിച്ചു.

3. മുഖത്തുനോക്കി സത്യം പറയുന്ന 'ധീരൻ' 

ആരുടെയും മുഖത്തുനോക്കി, വളച്ചുകെട്ടില്ലാതെ കാര്യങ്ങൾ പറയുന്ന പ്രകൃതമായിരുന്നു യു.എം ഉസ്താദിന്റേത്. തനിക്ക് ശരിയെന്ന് തോന്നുന്ന കാര്യങ്ങൾ ഏത് വമ്പന്മാർക്ക് മുമ്പിലും തുറന്നുപറയാൻ അദ്ദേഹം മടിച്ചിരുന്നില്ല. ഈ ധീരത പലപ്പോഴും അദ്ദേഹത്തിന് വിമർശനങ്ങൾ നേടിക്കൊടുത്തിട്ടുണ്ടെങ്കിലും, പിൽക്കാലത്ത് ആ നിലപാടുകൾ ശരിയായിരുന്നുവെന്ന് തെളിയിക്കപ്പെട്ടിട്ടുണ്ട്.

4. സമയത്തിന്റെ കാവൽക്കാരൻ 

കാസർകോട്ടെ പൊതുരംഗത്ത് സമയനിഷ്ഠയുടെ കാര്യത്തിൽ മുൻ മന്ത്രി ചെർക്കളം അബ്ദുല്ല, വ്യവസായ പ്രമുഖൻ കെ എസ് അബ്ദുല്ല തുടങ്ങിയവർക്കൊപ്പം എടുത്തു പറയേണ്ട പേരാണ് യു.എം ഉസ്താദിന്റേത്. ഒൻപത് മണിക്ക് പരിപാടി നിശ്ചയിച്ചാൽ 8.55-ന് തന്നെ വേദിയിലെത്തുന്ന യു.എം ശൈലി സംഘാടകർക്ക് എന്നും അത്ഭുതമായിരുന്നു. ഏറ്റെടുക്കുന്ന ഉത്തരവാദിത്തങ്ങൾ കൃത്യതയോടെ പൂർത്തിയാക്കുന്നതിൽ അദ്ദേഹം പുലർത്തിയ നിഷ്ഠ പുതുതലമുറയ്ക്ക് പാഠപുസ്തകമാണ്.

5. അവസാനത്തെ ആ വരവ് 

രോഗശയ്യയിലായിരിക്കുമ്പോഴും സുന്നത്ത് ജമാഅത്തിൻ്റെയും സംഘടനാ ആവേശവും അദ്ദേഹത്തിൽ അവസാന നിമിഷം വരെ വലിയ താല്പര്യത്തോടെ ഉണ്ടായിരുന്നു. ഡിസംബർ 28-ന് കാസർകോട് നടന്ന സമസ്ത ശതാബ്ദി യാത്രയുടെ സ്വീകരണ സമ്മേളന വേദിയിൽ അവശനിലയിലും അദ്ദേഹം എത്തിയിരുന്നു. ശാരീരിക പ്രയാസങ്ങൾ വകവെക്കാതെ സ്റ്റേജിൽ അൽപ്പസമയം ചിലവഴിച്ച ശേഷമാണ് അദ്ദേഹം മടങ്ങിയത്. അതായിരുന്നു പ്രിയപ്പെട്ട ഉസ്താദിനെ പൊതുവേദിയിൽ അവസാനമായി ജനം കണ്ടത്.

കുടുംബം 

ഭാര്യമാർ: സക്കിയ, പരേതയായ മറിയം. മക്കൾ: മുഹമ്മദലി ശിഹാബ്, ഫള്‌ലു റഹ്‌മാന്‍, നൂറുല്‍ അമീന്‍, അബ്ദുല്ല ഇര്‍ഫാന്‍, ഷഹീറലി ശിഹാബ് (എല്ലാവരും ഗള്‍ഫ്), ഖദീജ, മറിയം ഷാഹിന, പരേതരായ മുഹമ്മദ് മുജീബ് റഹ്‌മാന്‍, ആയിഷത്ത് ഷാഹിദ. മരുമക്കൾ: യു.കെ മൊയ്തീൻ കുട്ടി മൗലവി (മൊഗ്രാൽ), സി.എ അബ്ദുൽ ഖാദർ ഹാജി (സൗദി), ഇ. അഹമ്മദ് ഹാജി (ചേരൂർ) തുടങ്ങിയവർ.

മയ്യത്ത് നിസ്കാരവും ഖബറക്കവും ഔദ്യോഗിക അറിയിപ്പ് പ്രകാരം നടക്കും.

പ്രവാസലോകം കണ്ണീരിൽ; യുഎഇയിൽ മയ്യിത്ത് നിസ്കാരം

അബുദാബി: സമസ്ത കേരള ജംഇയ്യത്തുൽ ഉലമ വൈസ് പ്രസിഡന്റും പ്രമുഖ പണ്ഡിതനുമായ യു.എം അബ്ദുറഹ്മാൻ മൗലവിയുടെ വിയോഗം ഇസ്‌ലാമിക വൈജ്ഞാനിക ലോകത്തിനും സമുദായത്തിനും നികത്താനാവാത്ത നഷ്ടമാണെന്ന് കളനാട് മുസ്ലിം ജമാഅത്ത് യുഎഇ കമ്മിറ്റി. തിങ്കളാഴ്ച രാവിലെയാണ് അദ്ദേഹം അന്തരിച്ചത്. ദീർഘകാലം കളനാട് മഹല്ലിന്റെ ആത്മീയ നേതൃത്വമായിരുന്ന അദ്ദേഹത്തിന്റെ വിയോഗത്തിൽ പ്രവാസലോകത്തും കനത്ത ദുഃഖം രേഖപ്പെടുത്തി.

കളനാടിന്റെ ആത്മീയ ഗുരു 

കളനാട് ജുമാ മസ്ജിദിനെ സംബന്ധിച്ചിടത്തോളം യു.എം ഉസ്താദിന്റെ വിയോഗം വലിയൊരു ആത്മീയ തണൽ ആണ് നഷ്ടപ്പെട്ടത്. 1983 മുതൽ 1996 വരെ നീണ്ട ഒന്നര പതിറ്റാണ്ടോളം അദ്ദേഹം കളനാട് മഹല്ലിൽ ഖത്തീബായും മുദരിസ്സായും സേവനമനുഷ്ഠിച്ചിരുന്നു. ഒരു തലമുറയെ വിജ്ഞാനത്തിന്റെയും ആത്മീയതയുടെയും പാതയിലൂടെ നയിച്ച ഗുരുവര്യനായിരുന്നു അദ്ദേഹം. ഔദ്യോഗിക സേവനകാലത്തിന് ശേഷവും കളനാട് മഹല്ലുമായും അവിടുത്തെ കുടുംബങ്ങളുമായും ഊഷ്മളമായ ബന്ധം പുലർത്താൻ അദ്ദേഹം എപ്പോഴും ശ്രദ്ധിച്ചിരുന്നു. അദ്ദേഹത്തിന്റെ വിനയവും ലളിത ജീവിതവും എന്നും മാതൃകയാണെന്ന് കമ്മിറ്റി അനുസ്മരിച്ചു.

മലബാർ ഇസ്ലാമിക് കോംപ്ലക്സ്: ഉസ്താദിന്റെ പങ്ക് 

കാസർകോടിന്റെ വിജ്ഞാന കേന്ദ്രമായ ചട്ടഞ്ചാൽ മലബാർ ഇസ്ലാമിക് കോംപ്ലക്സ് (MIC) എന്ന മഹത്തായ മത-ഭൗതിക വിദ്യാഭ്യാസ സ്ഥാപനത്തിന്റെ വളർച്ചയിൽ യു.എം ഉസ്താദിന്റെ പങ്ക് സമാനതകളില്ലാത്തതാണ്. അന്തരിച്ച സി.എം അബ്ദുല്ല മൗലവിക്കൊപ്പം ആ സ്ഥാപനത്തിന്റെ ശില്പിയായും സേവകനായും അദ്ദേഹം അഹോരാത്രം പ്രവർത്തിച്ചു. സമുദായത്തിന് മികച്ച വിദ്യാഭ്യാസ സൗകര്യങ്ങൾ ഒരുക്കുന്നതിൽ അദ്ദേഹം കാണിച്ച താല്പര്യം ചരിത്രത്തിന്റെ ഭാഗമാണ്.

യുഎഇയിൽ പ്രാർത്ഥനാ മജ്ലിസുകൾ 

മഹാനായ പണ്ഡിതന്റെ പരലോക മോക്ഷത്തിനായി യുഎഇയിലെ വിവിധ കേന്ദ്രങ്ങളിൽ ഇന്ന് (തിങ്കളാഴ്ച, ജനുവരി 12) മയ്യിത്ത് നിസ്കാരവും പ്രാർത്ഥനാ മജ്ലിസുകളും സംഘടിപ്പിക്കുമെന്ന് കളനാട് മുസ്ലിം ജമാഅത്ത് യുഎഇ കമ്മിറ്റി ജനറൽ സെക്രട്ടറി നൗഷാദ് മിഹ്റാജ് അറിയിച്ചു.

സമയക്രമം താഴെ പറയും പ്രകാരമാണ്:

● അബുദാബി: രാത്രി 11:00 മണിക്ക് മദീനത്ത് സായിദ് പാർട്ടി ഹാളിൽ വെച്ച്.
● ദുബൈ: ഇശാ നിസ്കാരത്തിന് ശേഷം അൽ ഗുറൈർ മസ്ജിദിൽ വെച്ച്.
● അൽ ഐൻ: രാത്രി 8:30-ന് അൽ ഐൻ കെഎംസിസി ഹാളിൽ (പഴയ മദ്രസ്സ) വെച്ച്.

പങ്കെടുക്കാൻ സാധിക്കുന്നവർ നിശ്ചിത കേന്ദ്രങ്ങളിൽ എത്തിച്ചേർന്ന് ജനാസ നിസ്‌ക്കാരത്തിലും പ്രാർത്ഥനയിലും സംബന്ധിക്കണമെന്ന് ഭാരവാഹികൾ അഭ്യർത്ഥിച്ചു.

യു.എം ഉസ്താദിന്റെ വിയോഗം നികത്താനാവാത്ത നഷ്ടം: ദുബൈ കെഎംസിസി

ദുബൈ: ജില്ലയിലെ മത-വൈജ്ഞാനിക സ്ഥാപനങ്ങളെ കെട്ടിപ്പടുക്കുന്നതിൽ മുഖ്യപങ്ക് വഹിച്ച ദീർഘദർശിയായ പണ്ഡിതനായിരുന്നു അന്തരിച്ച യു.എം അബ്ദുർ റഹ്മാൻ മൗലവിയെന്ന് ദുബൈ കെഎംസിസി കാസർകോട് ജില്ലാ കമ്മിറ്റി. സമസ്ത ഉപാധ്യക്ഷനും മലബാർ ഇസ്ലാമിക് കോംപ്ലക്സ് (എംഐസി) ജനറൽ സെക്രട്ടറിയുമായ അദ്ദേഹത്തിന്റെ വിയോഗം മുസ്ലിം സമുദായത്തിനും ജില്ലയ്ക്കും നികത്താനാവാത്ത നഷ്ടമാണെന്ന് ഭാരവാഹികൾ അനുശോചന സന്ദേശത്തിൽ അറിയിച്ചു.

ചട്ടഞ്ചാൽ മലബാർ ഇസ്ലാമിക് കോംപ്ലക്സിന്റെ പ്രാരംഭകാലം മുതൽ ജനറൽ സെക്രട്ടറിയായി പ്രവർത്തിച്ച അദ്ദേഹം സ്ഥാപനത്തെ ഇന്നത്തെ നിലയിൽ എത്തിക്കുന്നതിൽ വഹിച്ച പങ്ക് നിസ്തുലമാണ്. ബദിയടുക്ക കണ്ണിയത്ത് ഉസ്താദ് ഇസ്ലാമിക് അക്കാദമി പ്രസിഡന്റ്, ചെമ്മാട് ദാറുൽ ഹുദാ ഇസ്ലാമിക് സർവ്വകലാശാല സെനറ്റ് അംഗം, നീലേശ്വരം മർകസുദ്ധഅവ വൈസ് പ്രസിഡന്റ് തുടങ്ങിയ നിലകളിലും അദ്ദേഹം സേവനമനുഷ്ഠിച്ചിരുന്നു. ജില്ലയിലെ മത-വൈജ്ഞാനിക സ്ഥാപനങ്ങൾക്ക് ബീജവാപം നൽകുന്നതിൽ അദ്ദേഹം മുഖ്യപങ്ക് വഹിച്ചു.

രാഷ്ട്രീയ-സാമൂഹിക സേവനം

ചെറുപ്പകാലം മുതൽ തന്നെ പൊതുരംഗത്ത് സജീവമായിരുന്ന യു.എം ഉസ്താദ്, മുസ്ലിം ലീഗ് പ്രസ്ഥാനത്തിന് ജില്ലയിൽ വേരോട്ടമുണ്ടാക്കുന്നതിന് ഏറെ പ്രയത്നിച്ച വ്യക്തിത്വമാണ്. പഞ്ചായത്ത് തെരഞ്ഞെടുപ്പിൽ മത്സരിച്ച് മെമ്പറായി തെരഞ്ഞെടുക്കപ്പെട്ട ചരിത്രവും അദ്ദേഹത്തിനുണ്ട്. 1980 കാലഘട്ടത്തിൽ സഅദിയ്യയുടെ ജനറൽ സെക്രട്ടറിയായിരുന്ന അദ്ദേഹം, ഖാസി സി.എം അബ്ദുല്ല മൗലവിക്കൊപ്പം നിന്ന് സമസ്തയെയും വിദ്യാഭ്യാസ സ്ഥാപനങ്ങളെയും ഉയർത്തിക്കൊണ്ടുവരുന്നതിൽ നിർണ്ണായക പങ്കുവഹിച്ചു.

പ്രവാസികളുടെ ഉറ്റതോഴൻ

ജില്ലയിലെ തലമുതിർന്ന പണ്ഡിതന്മാരിൽ ഒരാളായിരുന്ന അദ്ദേഹം പ്രവാസികളുമായി ഏറെ അടുപ്പം പുലർത്തിയിരുന്നുവെന്ന് ദുബൈ കെഎംസിസി കാസർകോട് ജില്ലാ പ്രസിഡന്റ് സലാം കന്യപ്പാടി, ജനറൽ സെക്രട്ടറി ടി.ആർ. ഹനീഫ, ട്രഷറർ ഡോ. ഇസ്മായിൽ എന്നിവർ പറഞ്ഞു.

ജില്ലാ ഭാരവാഹികളായ സി.എച്ച് നൂറുദ്ദീൻ, സലാം തട്ടാൻചേരി, ഇസ്മായിൽ നാലാംവാതുക്കൽ, കെ.പി അബ്ബാസ് കളനാട്, പി.പി റഫീഖ് പടന്ന, ഹസ്സൈനാർ ബീജന്തടുക്ക, മൊയ്തീൻ അബ്ബ, സുബൈർ അബ്ദുള്ള, ഹനീഫ ബാവ, ഫൈസൽ മൊഹ്‌സിൻ, സി.എ ബഷീർ പള്ളിക്കര, ബഷീർ പാറപള്ളി, സുബൈർ കുബനൂർ, പി.ഡി നൂറുദ്ദീൻ, അഷ്റഫ് ബായാർ, സിദ്ധീഖ് ചൗക്കി, റഫീഖ് കടാങ്കോട്, ആസിഫ് ഹൊസങ്കടി, സുനീർ എൻ.പി തുടങ്ങിയവർ അനുശോചനം രേഖപ്പെടുത്തി.

ഈ വാർത്ത ഷെയർ ചെയ്യുക.

Article Summary: Senior Samastha leader and former panchayat member UM Abdul Rahiman Musliyar passed away in Kasaragod.

#UMAbdulRahimanMusliyar #Samastha #Kasaragod #Obituary #MuslimLeague #IslamicScholar