റബ്ബര്‍ ടാപ്പിംഗിനെന്ന് പറഞ്ഞ് പോയ തൊഴിലാളിയെ മാവിന്‍ കൊമ്പില്‍ തൂങ്ങിമരിച്ച നിലയില്‍ കണ്ടെത്തി

By Web Desk - MainJan 18, 2020, 16:01 IST

ആദൂര്‍: (www.kasargodvartha.com 18.01.2020) റബ്ബര്‍ ടാപ്പിംഗിനെന്ന് പറഞ്ഞ് പോയ തൊഴിലാളിയെ മാവിന്‍ കൊമ്പില്‍ തൂങ്ങിമരിച്ച നിലയില്‍ കണ്ടെത്തി. അഡൂര്‍ പെരിയടുക്കയിലെ രാമനായ്ക്കിന്റെ മകന്‍ വിനോദ് കുമാറിനെ (32)യാണ് തൂങ്ങിമരിച്ച നിലയില്‍ കണ്ടെത്തിയത്. വെള്ളിയാഴ്ച ഉച്ചയോടെയാണ് സംഭവം. വീടിന് ഒരു കിലോ മീറ്റര്‍ അകലെയുള്ള മാവിന്‍ കൊമ്പിലാണ് മൃതദേഹം കണ്ടെത്തിയത്.

വീട്ടില്‍ തിരിച്ചെത്താത്തതിനെ തുടര്‍ന്ന് വീട്ടുകാര്‍ അന്വേഷിച്ചുവരുന്നതിനിടെയാണ് യുവാവിനെ മരിച്ച നിലയില്‍ കണ്ടെത്തിയത്. മാവിന്റെ ചുവട്ടില്‍ വിഷക്കുപ്പിയും കണ്ടെത്തിയിട്ടുണ്ട്. വിഷം കഴിച്ച ശേഷം തൂങ്ങി മരിച്ചുവെന്നാണ് സംശയിക്കുന്നത്. ശരീരം നീലിച്ച നിലയിലായിരുന്നു. മരണത്തില്‍ സംശയമുയര്‍ന്നതിനെ തുടര്‍ന്ന് ആദൂര്‍ പോലീസ് ഇന്‍ക്വസ്റ്റ് നടത്തിയ മൃതദേഹം വിദഗ്ദ്ധ പോസ്റ്റ്മോര്‍ട്ടത്തിനായി പരിയാരം മെഡിക്കല്‍ കോളേജ് ആശുപത്രിയിലേക്ക് മാറ്റി.

അവിവാഹിതനാണ്. മാതാവ്: ശാരദ. സഹോദരങ്ങള്‍: ജഗദീശ, യശോദ.