റിട്ട.എസ്.പി വി. വേണുഗോപാലിനെ തൂങ്ങിമരിച്ചനിലയില്‍ കണ്ടെത്തി

കരിവെള്ളൂര്‍: റിട്ട. എസ്.പി വി.വേണുഗോപാലിനെ (62) തൂങ്ങിമരിച്ചനിലയില്‍ കണ്ടെത്തി. ചൊവ്വാഴ്ച രാവിലെയാണ് കരിവെള്ളൂര്‍ ഓണക്കുന്നിലെ വീടിന്റെ മുകള്‍നിലയില്‍ ഇദ്ദേഹത്തെ തൂങ്ങിമരിച്ചനിലയില്‍ കണ്ടെത്തിയത്.

തിങ്കളാഴ്ച രാത്രി ഉറങ്ങാന്‍ കിടന്നതായിരുന്നു. അര്‍ബുദ രോഗത്തിന് ചികിത്സയിലായിരുന്ന വേണുഗോപാല്‍ അസുഖത്തെ തുടര്‍ന്നുള്ള  മനോവിഷമത്താല്‍ തൂങ്ങിമരിച്ചതായാണ് സംശയിക്കുന്നതെന്ന് പോലീസും ബന്ധുക്കളും പറയുന്നു. 1976 ല്‍ എസ്.ഐ ആയി സര്‍വീസില്‍ കയറിയ വേണുഗോപാല്‍ കണ്ണൂര്‍ ക്രൈം ബ്രാഞ്ച് എസ്.പി ആയാണ് വിരമിച്ചത്. കാസര്‍കോട് സ്‌പെഷ്യല്‍ ബ്രാഞ്ച് ഡി.വൈ.എസ്.പി ആയും സേവനമനുഷ്ഠിച്ചിരുന്നു.


മൃതദേഹം പരിയാരം മെഡിക്കല്‍ കോളജ് ആശുപത്രിയില്‍ പോസ്റ്റുമോര്‍ട്ടത്തിനുശേഷം ചൊവ്വാഴ്ച വൈകിട്ട് ആറുമണിയോടെ കുണിയനിലെ പൊതുശ്മശാനത്തില്‍ സംസ്‌ക്കരിക്കും. പോലീസ് സേനയിലെ മികച്ച ഉദ്യോഗസ്ഥനായി വേണുഗോപാല്‍ അറിയപ്പെട്ടിരുന്നു.

ഭാര്യ: സുഷമ. മക്കള്‍: പ്രശാന്തി, ശാലിനി. മരുമക്കള്‍: സര്‍ജു (സോഫ്റ്റ് വെയര്‍ ഇഞ്ചിനീയര്‍, ചെന്നൈ), ശ്രീജിത്ത് (സെയില്‍സ് റപ്രസന്റേറ്റീവ് ഡല്‍ഹി). സഹോദരങ്ങള്‍: സുരേന്ദ്രന്‍, ശ്യാമള, മാലതി, അജിത് പ്രസാദ്, ബാബു രാംദാസ്, പരേതനായ കാര്‍ത്തികേയന്‍.
ഞങ്ങളുടെ Facebookലും Twitterലും അംഗമാകൂ. ഓരോ വാര്‍ത്തയും കാസര്‍കോട് വാര്‍ത്തയിലൂടെ അറിയാം. 

Advertisement: