ഓട്ടോഡ്രൈവര്‍ പള്ളിയില്‍ കുഴഞ്ഞ് വീണ് മരിച്ചു

കാസര്‍കോട്: (www.kasargodvartha.com 21.07.2014) നിസ്‌കാരത്തിന് അംഗസ്‌നാനം ചെയ്യുന്നതിനിടെ ഓട്ടോ ഡ്രൈവര്‍ കുഴഞ്ഞു വീണ് മരിച്ചു. ചെങ്കള തൈവളപ്പ് വലിയമൂലയിലെ താമസക്കാരനും കര്‍ണാടക പുത്തൂര്‍ സ്വദേശിയുമായ മുഹമ്മദ് കുഞ്ഞി (38) യാണ് മരിച്ചത്.

കാസര്‍കോട് നഗരത്തിലെ ഓട്ടോഡ്രൈവറായിരുന്നു. ഞായറാഴ്ച വൈകിട്ട് തൈവളപ്പ് വലിയമൂല ജുമാമസ്ജിദില്‍ നോമ്പ് തുറന്നതിന് ശേഷം നിസ്‌കാരത്തിന് അംഗസ്‌നാനം ചെയ്യുന്നതിനിടെ കുഴഞ്ഞ് വീഴുകയായിരുന്നു. സംഭവ സ്ഥലത്തുതന്നെ മരണപ്പെട്ടു.

പുത്തൂറിലെ ഹസൈനാര്‍-ആയിഷ ദമ്പതികളുടെ മകനായ മുഹമ്മദ് കുഞ്ഞി നേരത്തെ തളങ്കരയിലും താമസിച്ചിരുന്നു. എസ്.ടി.യു പ്രവര്‍ത്തകനാണ്. ഭാര്യ ഷമീമ മാസങ്ങള്‍ക്ക് മുമ്പ് വീണ് കാലൊടിഞ്ഞ് ചികിത്സയിലാണ്. രണ്ട് മേജര്‍ ശസ്ത്രക്രിയ നടത്തിയെങ്കിലും സുഖം പ്രാപിച്ചിട്ടില്ല.

വിദ്യാര്‍ത്ഥികളായ മുര്‍ഷിദ, ജംഷീദ, അര്‍ഷിദ, അര്‍ഫീദ, മുബീന്‍ എന്നിവര്‍ മക്കളാണ്. ഉസ്മാന്‍ ഏക സഹോദരനാണ്. ഖബറടക്കം തിങ്കളാഴ്ച ഉച്ചയ്ക്ക് തൈവളപ്പ് വലിയമൂല ജുമാമസ്ജിദ് ഖബര്‍സ്ഥാനില്‍ നടക്കും. നിര്‍ധനനും അധ്വാനശീലനുമായ മുഹമ്മദ് കുഞ്ഞി ഏറെ പ്രയാസപ്പെട്ടാണ് കുടുംബം പുലര്‍ത്തിയിരുന്നത്. കുടുംബത്തിന്റെ അത്താണിയായ അദ്ദേഹത്തിന്റെ വിയോഗം കുടുംബത്തിനും സഹപ്രവര്‍ത്തകര്‍ക്കും താങ്ങാനാകാത്ത ആഘാതമായി.