മകന്റെ വിയോഗത്തിന് പിന്നാലെ നൊമ്പരം; പൊയ്‌നാച്ചിയിൽ ദമ്പതികളെ വീട്ടിൽ മരിച്ച നിലയിൽ കണ്ടെത്തി

ചട്ടഞ്ചാൽ: (KasargodVartha) ബേക്കൽ ബീച്ച് ഫെസ്റ്റിൽ സംഗീത പരിപാടിയിൽ പങ്കെടുക്കാൻ എത്തിയ സമയത്ത് ട്രെയിൻ തട്ടി മരിച്ച എഞ്ചിനീയറിംഗ് വിദ്യാർത്ഥിയുടെ മാതാപിതാക്കളെ വീട്ടിനുള്ളിൽ മരിച്ച നിലയിൽ കണ്ടെത്തി. പൊയ്‌നാച്ചി പറമ്പിലെ വേണുഗോപാലൻ നായർ (50), ഭാര്യ സ്മിത (42) എന്നിവരാണ് മരിച്ചത്. വെള്ളിയാഴ്ച രാവിലെ ഇവരുടെ വീടിന്റെ സെൻട്രൽ ഹാളിലാണ് മൃതദേഹങ്ങൾ കണ്ടെത്തിയത്.

ആത്മഹത്യയെന്ന് പ്രാഥമിക നിഗമനം

വിവരമറിഞ്ഞ് മേൽപ്പറമ്പ് പോലീസ് സ്ഥലത്തെത്തി ഇൻക്വസ്റ്റ് നടപടികൾ ആരംഭിച്ചു. മകന്റെ അപ്രതീക്ഷിത മരണത്തിന് പിന്നാലെയുണ്ടായ കടുത്ത മാനസിക ആഘാതമാണ് ഇവരെ ഇത്തരമൊരു കടുംകൈയിലേക്ക് നയിച്ചതെന്നാണ് പ്രാഥമിക നിഗമനം. മകനില്ലാതെ തങ്ങൾ ഇനി ജീവിച്ചിരിക്കില്ലെന്ന് ഇരുവരും ബന്ധുക്കളോടും മാതാപിതാക്കളോടും പലതവണ പറഞ്ഞിരുന്നതായി വിവരമുണ്ട്. വീട്ടുകാർ പലരീതിയിൽ ആശ്വസിപ്പിച്ചിരുന്നുവെങ്കിലും ദമ്പതികൾ കടുത്ത വിഷാദത്തിലായിരുന്നുവെന്ന് നാട്ടുകാർ പറയുന്നു.

വിധി തട്ടിയെടുത്തത് ഏകമകനെ

ദമ്പതികളുടെ ഏകമകനായ എം. ശിവനന്ദൻ (19) മംഗ്ളൂരിലെ എഞ്ചിനീയറിംഗ് കോളേജിലെ വിദ്യാർത്ഥിയായിരുന്നു. ഇക്കഴിഞ്ഞ ഡിസംബർ 29-ന് ബേക്കൽ ബീച്ച് ഫെസ്റ്റിൽ പങ്കെടുക്കാൻ എത്തിയപ്പോഴാണ് ശിവനന്ദൻ ട്രെയിൻ തട്ടി മരിച്ചത്. മകന്റെ മരണശേഷം വീട്ടിൽ ഒറ്റപ്പെട്ട ദമ്പതികൾ പുറംലോകവുമായി അധികം ബന്ധപ്പെട്ടിരുന്നില്ല. ഏകമകന്റെ വിയോഗം ഇവർക്ക് താങ്ങാവുന്നതിലും അപ്പുറമായിരുന്നു.

അന്വേഷണം പുരോഗമിക്കുന്നു

മരണവിവരം പുറത്തറിഞ്ഞതോടെ വൻ ജനാവലിയാണ് ഇവരുടെ വീട്ടിലേക്ക് എത്തിയത്. പോസ്റ്റ്‌മോർട്ടം നടപടികൾക്കായി മൃതദേഹങ്ങൾ കാസർകോട് ജനറൽ ആശുപത്രിയിലേക്ക് മാറ്റി. സംഭവത്തിൽ കൂടുതൽ അന്വേഷണം പൂർത്തിയാകുന്നതോടെ മരണകാരണം സംബന്ധിച്ച് കൂടുതൽ വ്യക്തത ലഭിക്കുമെന്ന് പോലീസ് അറിയിച്ചു. പൊയിനാച്ചിയിൽ ട്രാവൽ ഏജൻസിയും റിയൽ എസ്റ്റേറ്റ് സ്ഥാപനവും നടത്തുന്ന വേണുഗോപാലൻ നല്ല സാമ്പത്തീസ്ഥിതിയിലുള്ള കുടുംബാംഗമാണ്.

ശ്രദ്ധിക്കുക: സ്വയം ജീവനൊടുക്കുന്നത് ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന്‍ ശ്രമിക്കുക. അത്തരം ചിന്തകളുളളപ്പോള്‍ 'ദിശ' ഹെല്‍പ് ലൈനില്‍ വിളിക്കുക. ടോൾ ഫ്രീ ഹെൽപ് ലൈൻ നമ്പർ: 1056, 0471-2552056

പ്രാദേശിക വാർത്തകളും വിശേഷങ്ങളും സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ ദാരുണ സംഭവത്തെക്കുറിച്ചുള്ള വാർത്ത സുഹൃത്തുക്കൾക്കും നാട്ടുകാർക്കും വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. പരേതർക്ക് ആദരാഞ്ജലികൾ ഫേസ്ബുക്ക് പോസ്റ്റിൽ കമന്റായി രേഖപ്പെടുത്താൻ മറക്കരുത്. 

Article Summary: Venugopalan Nair and his wife Smitha were found dead at their home in Poynachi, likely due to the mental trauma caused by the accidental death of their only son Shiva Nandan.

#KasaragodNews #Poynachi #Tragedy #MentalHealthAwareness #BekalBeachFest #BreakingNews #LocalNews #Investigation #StaySafe