ഓണപരീക്ഷയ്ക്ക് പോകുന്നതിന് മുൻപ് കുളിക്കാനിറങ്ങി; കാസർകോട് പ്ലസ് വൺ വിദ്യാർഥി കുളത്തിൽ മുങ്ങിമരിച്ചു

കാസർകോട്: (KasargodVartha) ഓണപരീക്ഷയെഴുതാൻ പോകുന്നതിനുമുമ്പ് കുളത്തിൽ കുളിക്കാനിറങ്ങിയ പ്ലസ് വൺ വിദ്യാർഥി മുങ്ങിമരിച്ചു. വിദ്യാനഗർ ചാല സ്വദേശിയും ഇപ്പോൾ ഉദയഗിരിയിൽ താമസക്കാരനുമായ അബൂബക്കറിൻ്റെ മകൻ മുഹമ്മദ് ഷാഹിൽ (15) ആണ് വീടിന് സമീപത്തെ കുളത്തിൽ മുങ്ങിമരിച്ചത്. നായന്മാർമൂല തൻബീഹുൽ ഹയർ സെക്കൻഡറി സ്കൂളിലെ പ്ലസ് വൺ വിദ്യാർഥിയായിരുന്നു ഷാഹിൽ.

രക്ഷാപ്രവർത്തനം വിഫലമായി

തിങ്കളാഴ്ച (ഓഗസ്റ്റ് 17) രാവിലെ ഓണപരീക്ഷ എഴുതുന്നതിനായി സ്കൂളിലേക്ക് പോകാനുള്ള തയാറെടുപ്പിനിടെയാണ് ഷാഹിൽ നെലക്കള വനിതാ ഹോസ്റ്റലിന് അടുത്തുള്ള കുളത്തിൽ കുളിക്കാനിറങ്ങിയത്. കുളിക്കുന്നതിനിടെ പെട്ടെന്ന് മുങ്ങിത്താഴുകയായിരുന്നു. ഒപ്പമുണ്ടായിരുന്ന രണ്ട് സഹോദരങ്ങളുടെ നിലവിളികേട്ടെത്തിയ അയൽവാസികൾ രക്ഷപെടുത്താൻ ശ്രമിച്ചെങ്കിലും ആഴം കൂടുതൽ ആയതിനാൽ സാധിച്ചില്ല. നാട്ടുകാരും ഫയർ ഫോഴ്‌സും പോലീസും ചേർന്ന് ഷാഹിലിനെ കുളത്തിൽ നിന്ന് പുറത്തെടുത്ത് ഉടൻ കാസർകോട് മിംസ് ആശുപത്രിയിൽ എത്തിച്ചെങ്കിലും അതിനുമുൻപേ മരണം സംഭവിച്ചിരുന്നു. സ്കൂബ ഡൈവറായ ഇ. പ്രസീദ് ആണ് കുട്ടിയെ മുങ്ങിയെടുത്തത്. സീനിയർ ഫയർ & റസ്‌ക്യു ഓഫീസർ രഞ്ജിത്ത്, ഫയർ & റസ്ക്യു ഓഫീസർമാരായ ജുബിൽ, മുഹമ്മദ് സിറാജുദ്ദീൻ, ഷബിൽ കുമാർ, എം.രമേശ്, ഹോം ഗാർഡ് സോബിൻ എന്നിവർ രക്ഷാപ്രവർത്തനത്തിൽ പങ്കെടുത്തു.

പൊലീസ് നടപടികൾ

വിവരമറിഞ്ഞ് വിദ്യാനഗർ പൊലീസ് സ്ഥലത്തെത്തി തുടർനടപടികൾ സ്വീകരിച്ചു. മൃതദേഹം കാസർകോട് ജനറൽ ആശുപത്രി മോർച്ചറിയിലേക്ക് മാറ്റി. പോസ്റ്റ്‌മോർട്ടം നടപടികൾക്ക് ശേഷം മൃതദേഹം ബന്ധുക്കൾക്ക് വിട്ടുനൽകുമെന്ന് ഉദ്യോഗസ്ഥർ അറിയിച്ചു. ഓണപരീക്ഷ എഴുതാൻ പോകുന്നതിനിടെയുണ്ടായ ദുരന്തത്തിൻ്റെ ഞെട്ടലിലാണ് സഹപാഠികളും അധ്യാപകരും നാട്ടുകാരും. ഷാഹിലിൻ്റെ അപ്രതീക്ഷിത മരണം കുടുംബത്തിനും സഹപാഠികൾക്കും വലിയ വേദനയായി മാറി.

പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Plus One student Muhammad Shahil (15) drowned in a pond in Kasaragod.

#KasargodVartha #DrowningTragedy #Vidyanagar #Udayagiri #KeralaNews #MalayalamNews #LocalNews #AparnaNews