സ്കൂട്ടറിൽ ലോറിയിടിച്ച് ലീഗ് നേതാവ് അബ്ദുൽ റഹിമാൻ തുരുത്തി മരിച്ചു

മേൽപ്പറമ്പ്: (KasargodVartha) സ്കൂട്ടറിൽ ലോറിയിടിച്ച് മുസ്ലിം ലീഗ് പ്രാദേശിക നേതാവ് മരിച്ചു. ചെമ്പരിക്കയിലെ ടി എം അബ്ദുൽ റഹിമാൻ തുരുത്തി (62) യാണ് ദാരുണമായി മരിച്ചത്. ചൊവ്വാഴ്ച ഉച്ചക്ക് മേൽപ്പറമ്പിൽ വെച്ച് അബ്ദുൽ റഹിമാൻ തുരുത്തി സഞ്ചരിച്ച സ്കൂട്ടറിൽ ലോറിയിടിച്ചാണ് അപകടമുണ്ടായത്.

ഗുരുതരമായി പരിക്കേറ്റതിനെ തുടർന്ന് മംഗ്ളൂരിലെ തേജസ്വിനി ആശുപത്രിയിൽ ചികിത്സയിലിരിക്കെ ബുധനാഴ്ച വൈകീട്ടോടെയാണ് മരണം സംഭവിച്ചത്. നവീകരിച്ച ചെമ്മനാട് ഗ്രമപഞ്ചായത്ത് ഓഫീസ് ഉദ്ഘാടന ചടങ്ങിൽ സജീവമായി പങ്കെടുത്തതിന് ശേഷമാണ് അദ്ദേഹത്തിന് അപകടം സംഭവിച്ചത്.

രാഷ്ട്രീയ സാമൂഹിക രംഗങ്ങളിലെ നിറസാന്നിധ്യം

എം.എസ്.എഫിലൂടെയാണ് അബ്ദുൽ റഹിമാൻ തുരുത്തി രാഷ്ട്രീയത്തിൽ പ്രവേശിച്ചത്. ചെമ്മനാട് പഞ്ചായത്ത് ലീഗ്, ഉദുമ മണ്ഡലം ലീഗ് എന്നിവയുടെ ഭാരവാഹിയായി പ്രവർത്തിച്ച അദ്ദേഹം ഇടക്കാലത്ത് നാഷണൽ ലീഗിലും സജീവമായിരുന്നു. രാഷ്ട്രീയരംഗത്ത് മാത്രമല്ല, സാമൂഹിക സാംസ്ക്കാരിക രംഗങ്ങളിലും നിറസാന്നിധ്യമായിരുന്നു അബ്ദുൽ റഹിമാൻ തുരുത്തി. 

ചന്ദ്രഗിരി ഗവ. ഹയർ സെക്കൻഡറി സ്കൂൾ പി.ടി.എ. പ്രസിഡൻ്റ്, ചെമ്പിരിക്ക ഗവ. യു.പി. സ്കൂൾ പി.ടി.എ. പ്രസിഡൻ്റ് എന്നീ നിലകളിലും അദ്ദേഹം പ്രവർത്തിച്ചിട്ടുണ്ട്. കാസർകോട്ടെ അരമന ആശുപത്രി ജീവനക്കാരനായും സേവനമനുഷ്ഠിച്ചിരുന്നു.

ഖബറടക്കം വ്യാഴാഴ്ച

മൃതദേഹം രാത്രിയോടെ കാസർകോട് ജനറൽ ആശുപത്രി മോർച്ചറിയിൽ എത്തിച്ചു. പോസ്റ്റ്മോർട്ടം നടപടികൾക്ക് ശേഷം വ്യാഴാഴ്ച ഉച്ചയോടെ ചെമ്പിരിക്ക ജുമാ മസ്ജിദ് ഖബർസ്ഥാനിൽ ഖബറടക്കും. 

പിതാവ് മുഹമ്മദ് കുഞ്ഞി ഹാജിയും മാതാവ് നഫീസയുമാണ്. ഭാര്യ റാബിയ. മക്കൾ: മുഹമ്മദ് റാഷിദ്, റൈഹാന. മരുമകൻ: അസീസ്. സഹോദരങ്ങൾ: അബൂബക്കർ, ഹസൈനാർ, സാലിഹ്, സുലൈമാൻ, അബ്ദുല്ല കുഞ്ഞി, ബീഫാത്തിമ.

ടി എം അബ്ദുൽ റഹിമാൻ തുരുത്തിയുടെ വിയോഗത്തിൽ അനുശോചനം രേഖപ്പെടുത്താൻ ആഗ്രഹിക്കുന്നുണ്ടോ? വാർത്ത ഷെയർ ചെയ്യുക.

Article Summary: Muslim League leader Abdul Rahman Thuruthy dies in a scooter-lorry accident in Kasaragod.

#Kasaragod #MuslimLeague #AbdulRahmanThuruthy #RoadAccident #KasaragodNews #RIP