മടവൂര്‍ ഉറൂസിനുപോയ കുമ്പള സ്വദേശി കോഴിക്കോട്ട് കുഴഞ്ഞുവീണ് മരിച്ചു

കാസര്‍കോട്: മടവൂര്‍ ഉറീസിനുപോയ കുമ്പള സ്വദേശി കോഴിക്കോട്ട് റെയില്‍പാളത്തില്‍ കുഴഞ്ഞുവീണ് മരിച്ചു. കുമ്പള നായിക്കാപ്പ് മുളിയടുക്കയിലെ മുഹമ്മദ് (55) ആണ് മരിച്ചത്. വ്യാഴാഴ്ച രാവിലെ 8.30 മണിയോടെയാണ് സംഭവം.

കോഴിക്കോട് മടവൂര്‍ ഉറൂസില്‍ പങ്കെടുക്കാന്‍ പോയതായിരുന്നു മുഹമ്മദ്. തിരിച്ചുവരാന്‍ റെയില്‍വേ സ്‌റ്റേഷനില്‍ എത്തിയ മുഹമ്മദ്, ഭാര്യാസഹോദരന്‍ ടിക്കറ്റെടുക്കാനായി ക്യൂവില്‍ നില്‍ക്കുന്നതിനിടെ ചായകുടിക്കാന്‍ റെയില്‍പാളംകടന്ന് പ്ലാറ്റ്‌ഫോമിന്റെ മറുകരയിലേക്ക് പോകുന്നതിനിടെ പാളത്തില്‍ കുഴഞ്ഞുവീഴുകയായിരുന്നു.

റെയില്‍വേ പോലീസും സ്‌റ്റേഷനിലുണ്ടായിരുന്ന ആളുകളും ചേര്‍ന്ന് മുഹമ്മദിനെ ഉടന്‍ കോഴിക്കോട്ടെ ആശുപത്രിയിലെത്തിച്ചെങ്കിലും അപ്പോഴേക്കും മരണപ്പെട്ടിരുന്നു. വീഴ്ചയില്‍ മുഹമ്മദിന്റെ തലയ്ക്ക് മുറിവേറ്റിരുന്നു. മൃതദേഹം രാത്രി നാട്ടിലെത്തിച്ച് മുളിയടുക്ക ജുമാ മസ്ജിദ് ഖബര്‍സ്ഥാനില്‍ ഖബറടക്കി. ബുധനാഴ്ചയാണ് മുഹമ്മദ് ഉറൂസില്‍ പങ്കെടുക്കാന്‍ ട്രെയിനില്‍ കോഴിക്കോട്ടേക്ക് പോയത്. നാട്ടില്‍ നിന്നും വേറേയും ആളുകള്‍ പോയിരുന്നു.

പരേതരായ മമ്മാലി - കുഞ്ഞലീമ ദമ്പതികളുടെ മകനാണ്. ഭാര്യ: ആസ്യുമ്മ. മക്കള്‍: അബ്ദുര്‍ റസാഖ്, സഫിയ. സഹോദരങ്ങള്‍: അറബി, അബ്ദുര്‍ റഹ്മാന്‍, ഇബ്രാഹിം, സുലൈമാന്‍, അസ്മ, ഖദീജുമ്മ, ആസ്യ, ആഇശ, ഫാത്വിമ, ആമിന.

Also read:
ഈജിപ്തില്‍ 623 മരണം; പ്രതിഷേധ റാലിക്ക് മുസ്ലീം ബ്രദര്‍ഹുഡിന്റെ ആഹ്വാനം