സങ്കടങ്ങളെ ചിരികൊണ്ട് നേരിട്ട 'രസിക ശിരോമണി'; 60 വർഷത്തോളം മയ്യിത്ത് പരിപാലന രംഗത്ത് സേവനം ചെയ്ത കളനാട്ടെ തൊപ്പട്ട ഷാഫി ഓർമയായി

കളനാട്: (KasargodVartha) പ്രവാസലോകത്തും നാട്ടിലും ചിരിയുടെയും സാന്ത്വനത്തിൻ്റെയും പര്യായമായിരുന്ന ആദ്യകാല പ്രവാസി മുഹമ്മദ് ഷാഫി (തൊപ്പട്ട - 79) ഓർമയായി. വ്യാഴാഴ്ച (2026 ഒക്ടോബർ 1) വൈകുന്നേരമായിരുന്നു അന്ത്യം. ഉച്ചവരെ തൻ്റെ പതിവ് കാര്യങ്ങളിൽ സജീവമായിരുന്ന അദ്ദേഹം പെട്ടെന്നാണ് വിടവാങ്ങിയത്. ചിരിപ്പിക്കുന്ന പ്രകൃതവും, നാടിൻ്റെ സങ്കടങ്ങളിൽ മുന്നിൽ നിൽക്കുന്ന സാമൂഹിക ബോധവും അദ്ദേഹത്തെ നാട്ടുകാർക്ക് ഏറെ പ്രിയപ്പെട്ടവനാക്കി മാറ്റിയിരുന്നു.

കണ്ണീരോടെ നാടിൻ്റെ യാത്രാമൊഴി

നാടിൻ്റെ പ്രിയപ്പെട്ട മനുഷ്യനെ അവസാനമായി ഒരുനോക്ക് കാണാൻ വൻജനാവലിയാണ് ഒഴുകിയെത്തിയത്. വെള്ളിയാഴ്ച രാവിലെ കളനാട് ഹൈദ്രോസ് ജമാഅത്ത് ഖബർസ്ഥാനിൽ നടന്ന ഖബറടക്ക ചടങ്ങുകളിൽ വിവിധമേഖലകളിലുള്ളവർ പങ്കെടുത്തു. സഅദിയ്യ സെക്രട്ടറി സയ്യിദ് സൈനുൽ ആബിദീൻ മുത്തുകോയ തങ്ങൾ (കണ്ണവം തങ്ങൾ) ജനാസ നിസ്കാരത്തിന് നേതൃത്വം നൽകി. കളനാട് ഖത്തീബ് പള്ളങ്കോട് അബ്ദുൽ ഖാദർ മദനി അനുശോചന പ്രഭാഷണം നടത്തി.

കേരള മുസ്ലിം ജമാഅത്ത്, സഅദിയ്യ ഭാരവാഹികളും, വിവിധ രാഷ്ട്രീയ പാർട്ടി നേതാക്കളും, ജനപ്രതിനിധികളും കളനാട് ജമാഅത്ത് ഭാരവാഹികളും നാട്ടുകാരും എസ് വൈ എസ്, എസ് എസ് എഫ് നേതാക്കളും പ്രവർത്തകരും ഉൾപ്പെടെ വൻജനാവലി അദ്ദേഹത്തിന് അന്തിമോപചാരം അർപ്പിച്ചു.

വിടവാങ്ങലുകളിൽ എന്നും കാവലായി

ചിരിപ്പിക്കുന്ന പ്രകൃതമാണെങ്കിലും, നാടിൻ്റെ സങ്കടങ്ങളിൽ എന്നും അദ്ദേഹം മുൻപന്തിയിലുണ്ടായിരുന്നു. ചെറുപ്പം മുതലേ നാട്ടിൽ ആര് മരണപ്പെട്ടാലും മയ്യിത്ത് കുളിപ്പിക്കുന്നതിന് (മൃതദേഹ പരിപാലനം) ഷാഫി ഓടിയെത്തുമായിരുന്നു. നീണ്ട 60 വർഷത്തോളം, മരണം വരെ അദ്ദേഹം പ്രതിഫലേച്ഛയില്ലാതെ ആ മഹത്തായ കർമം തുടർന്നുപോന്നു. പ്രവാസി ആയിരുന്ന ഘട്ടത്തിലും നാട്ടിലെത്തിയാൽ അദ്ദേഹം മരണവീടുകളിൽ തായൽ ഉമ്പു ഹാജി, സിബി അബ്ദുൽ റഹ്‌മാൻ ഹാജി, അയ്യങ്കോൽ അബ്ദുല്ല ഹാജി (മദ്രാസി) ഉൾപ്പെടെയുള്ള തൻ്റെ ടീമിനൊപ്പം സജീവമായിരുന്നു. തൊപ്പട്ട ശാഫിയെ തൻ്റെ സേവനങ്ങളെ അഭിനന്ദിച്ചുകൊണ്ട് കളനാട് ഹൈദ്രോസ് ജമാഅത്ത് കമിറ്റി, മുസ്ലിം ലീഗ് വാർഡ് കമിറ്റി തുടങ്ങിയവർ ആദരിച്ചിരുന്നു.   തങ്ങളെ വിട്ടുപിരിയുന്ന പ്രിയപ്പെട്ടവർക്ക് അവസാനമായി കൂട്ടിരുന്ന അതേ മനുഷ്യൻ ഇന്ന് ഓർമയാകുമ്പോൾ കളനാട് നിവാസികൾക്ക് അത് വലിയൊരു നോവായി മാറി.

സങ്കടങ്ങളെ ചിരികൊണ്ട് നേരിട്ട 'രസിക ശിരോമണി'

എന്തിനും ഏതിനും ആളുകളെ ചിന്തിപ്പിക്കാനും പൊട്ടിച്ചിരിപ്പിക്കാനുമുള്ള അസാമാന്യ കഴിവ് ഷാഫിയെ നാട്ടുകാർക്കിടയിൽ വേറിട്ട ഒരാളാക്കി മാറ്റിയിരുന്നു. കളനാട്ടുകാർ എക്കാലവും ഓർമയിൽ കൊണ്ടുനടക്കുന്ന ഫലിതങ്ങളുടെ ആശാൻ ഗാന്ധി ആമു എന്ന അഹ്മദ് കുഞ്ഞിയുടെ വിയോഗ ശേഷം തൊപ്പട്ട ശാഫിയെ പോലുള്ളവരായിരുന്നു ആ രംഗത്ത് മികച്ചുനിന്നത്. എപ്പോഴും പുഞ്ചിരിക്കുന്ന മുഖത്തോടെ മാത്രമേ അദ്ദേഹത്തെ കാണാൻ കഴിയുമായിരുന്നുള്ളൂ. തൻ്റെ ചിരിയിലൂടെ മറ്റുള്ളവരെ ചിരിപ്പിക്കാനും സന്തോഷിപ്പിക്കാനും അദ്ദേഹം എപ്പോഴും ശ്രദ്ധിച്ചു.

പ്രവാസത്തിൻ്റെ കഷ്ടപ്പാടുകൾക്കിടയിലും തൻ്റെ തമാശകളിലൂടെ സഹമുറിയന്മാർക്ക് അദ്ദേഹം വലിയൊരാശ്വാസമായിരുന്നു. ദുബൈയിൽ ജോലി ചെയ്യുന്ന കാലത്ത് അദ്ദേഹത്തോടൊപ്പം ഒരേ റൂമിൽ താമസിക്കാൻ ആളുകൾ മുൻകൂട്ടി 'ബുക്കിങ്' ചെയ്യുമായിരുന്നുവെന്നത് ആ സ്വഭാവത്തിൻ്റെ ഏറ്റവും വലിയ ഉദാഹരണമാണ്. പ്രതിസന്ധികളെപ്പോലും തമാശയായി കണ്ട് ചിരിച്ചുതള്ളുന്ന ആ പ്രകൃതം നാട്ടുകാർക്ക് എന്നും ഒരത്ഭുതമായിരുന്നു.

ലോഞ്ചിൽ കടൽ കടന്ന പ്രവാസി

യു എ ഇയിലേക്ക് ലോഞ്ചിൽ (പത്തേമാരി) പോയ ആദ്യകാല പ്രവാസികളിൽ ഒരാളായിരുന്നു ഷാഫി. പ്രവാസ ജീവിതത്തിൽ സാമൂഹിക പ്രവർത്തനങ്ങളിലും അദ്ദേഹം സജീവമായിരുന്നു. പ്രവാസത്തിൻ്റെ തുടക്കത്തിൽ മുബൈയിലായിരുന്നപ്പോഴും തൻ്റെ സേവനങ്ങൾ തുടർന്നു. പിന്നീടാണ് ദുബൈയിലേക്ക് കടൽ കടന്നത്. യു എ ഇ കളനാട് മുസ്ലിം ജമാഅത്ത് സ്ഥാപക നേതാക്കളിൽ ഒരാളായി അദ്ദേഹം പ്രവർത്തിച്ചു. 30 വർഷം മുൻപാണ് അദ്ദേഹം പ്രവാസം മതിയാക്കി നാട്ടിൽ സ്ഥിരതാമസമാക്കിയത്.

സുഹൃദ് വലയവും കുടുംബവും

പരേതരായ തായൽ അബ്ദുൽ ഖാദർ ഹാജി, സി എം ഉമ്മർ, അബൂബക്കർ ഹാജി അയ്യങ്കോൽ, സിബി അബ്ദുറഹ്മാൻ ഹാജി, പുളിന്തോട്ടി അബ്ദുറഹ്മാൻ ഹാജി, അബ്ദുല്ലക്കുഞ്ഞി (അന്തായി) കൊമ്പൻപാറ, ഡി എം മുത്തലിബ് ദർഘാസ്, ഡി എം ശാഫി തുടങ്ങിയവർ അദ്ദേഹത്തിൻ്റെ പ്രധാന സുഹൃത്തുക്കളായിരുന്നു. കോഴിത്തിടിൽ മൊയ്തു ഹാജി, മിലിട്ടറി അഹമ്മദ് കുഞ്ഞി, ഹാജാ ഷാഫി എന്നിവർ അദ്ദേഹത്തിൻ്റെ ഉറ്റസുഹൃത്തുക്കളാണ്. പരേതരായ ഖത്വീബ് എം എ ഹസൈനാർ മുസ്ലിയാർ, പാലത്തുങ്കര അബ്ദുൽ റഹ്‌മാൻ മുസ്ലിയാർ, യു എം അബ്ദുൽ റഹ്‌മാൻ മുസ്ലിയാർ തുടങ്ങിയവരുമായി ഏറെ അടുപ്പം സൂക്ഷിച്ചിരുന്നു.

മക്കൾ: യൂസഫ് (കേരള മുസ്ലിം ജമാഅത്ത് കളനാട് യൂണിറ്റ് പ്രസിഡൻ്റ്), മുസ്തഫ (ദുബൈ കറാമയിൽ ജോലി ചെയ്യുന്നു), അനീസ, ആയിശ, സെബീദ, മിസിരിയ. മരുമക്കൾ: ഷംസുദ്ദീൻ മാങ്ങാട്, ജാഫർ ചട്ടഞ്ചാൽ, ഹനീഫ ആലമ്പാടി, ജുനൈദ് തളങ്കര, സാജിദ നെല്ലിക്കുന്ന്, ജഹാന സന്തോഷ് നഗർ.

കളനാടിൻ്റെ ഈ പ്രിയപ്പെട്ട മനുഷ്യൻ്റെ വിയോഗ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അനുശോചനങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Early NRI Mohammed Shafi (Thoppatta) of Kalanad was laid to rest at Kalanad Hydrose Jamaath Qabarstan with a massive crowd in attendance.

#KalanadNews #MohammedShafi #KasaragodNews #Obituary #KeralaExpat #KasargodVartha #MalayalamNews #AparnaNews