കുടുംബ വഴക്കിന് പിന്നാലെ വിഷം അകത്തുചെന്ന നിലയില്‍ കണ്ടെത്തിയ യുവ അധ്യാപികയും ഭർത്താവും മരിച്ചു

മഞ്ചേശ്വരം: (KasargodVartha) കടമ്പാറിൽ കുടുംബ വഴക്കിന് പിന്നാലെ വിഷം അകത്തുചെന്ന നിലയില്‍ കണ്ടെത്തിയ യുവ അധ്യാപികയും ഭർത്താവും മരണത്തിന് കീഴടങ്ങി. അത്യാസന്ന നിലയിൽ മംഗളൂറിലെ ആശുപത്രിയിൽ പ്രവേശിപ്പിച്ചിരുന്ന കടമ്പാറിലെ പെയിൻ്റിംഗ് തൊഴിലാളിയായ അജിത്ത് (35), വൊർക്കാടിയിലെ സ്‌കൂളിൽ അധ്യാപികയായി ജോലി ചെയ്യുന്ന ഭാര്യ ശ്വേത (27) എന്നിവരാണ് മരിച്ചത്. ഇരുവരും മൂന്ന് വർഷം മുമ്പാണ് വിവാഹിതരായത്.

അടുത്തിടെ കുടുംബ പ്രശ്‌നങ്ങളെ തുടർന്ന് രണ്ടുപേരും സ്ഥിരമായി വഴക്ക് കൂടിയിരുന്നുവെന്ന് പരിസരവാസികൾ പറഞ്ഞു. തിങ്കളാഴ്ച (06.10.2025) രാവിലെയും ഇവർ തമ്മിൽ വഴക്കുണ്ടായിരുന്നു. സാമ്പത്തിക പ്രശ്‌നങ്ങളാണ് കുടുംബ വഴക്കിനും അതിനെ തുടർന്നുള്ള മരണത്തിനും കാരണമെന്നാണ് പറയുന്നത്.

മകനെ സഹോദരിയുടെ വീട്ടിലാക്കി മടങ്ങി

അജിത്തും ഭാര്യ ശ്വേതയും മാതാവ് പ്രമീളയുമാണ് വീട്ടിൽ താമസം. മാതാവ് ജോലിക്കു പോയിരുന്നു. തിങ്കളാഴ്ച നേരത്തെ വീട്ടിലെത്തിയ ശ്വേതയും ഭർത്താവ് അജിത്തും മൂന്ന് വയസ്സുള്ള മകനെയും കൂട്ടി ബന്തിയോട്ടുള്ള സഹോദരിയുടെ വീട്ടിലെത്തി. ഒരു സ്ഥലത്തേക്ക് പോകാനുണ്ടെന്നും അതുവരെ മകനെ നോക്കണമെന്നും പറഞ്ഞാണ് ഇരുവരും മടങ്ങിയത്.

പിന്നീട് വീട്ടിൽ തിരിച്ചെത്തിയ ഇവരെ വൈകുന്നേരത്തോടെ വീട്ടുമുറ്റത്തു വീണുകിടക്കുന്ന നിലയിലാണ് പരിസരവാസികൾ കണ്ടെത്തിയത്. ഉടൻതന്നെ ഇവരെ ഹൊസങ്കടിയിലെ ആശുപത്രിയിലും പിന്നീട് മംഗളൂരു ആശുപത്രിയിലേക്കും കൊണ്ടുപോവുകയായിരുന്നു.

മരണം സംഭവിച്ചത് ആശുപത്രിയിൽ

ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലായിരുന്ന അജിത്ത് ചൊവ്വാഴ്ച (07.10.2025) പുലർച്ചെ 12.30 മണിയോടെയും ഭാര്യ ശ്വേത അതിന് പിന്നാലെയുമാണ് മരണത്തിന് കീഴടങ്ങിയത്. സംഭവത്തെക്കുറിച്ച് മഞ്ചേശ്വരം പോലീസ് വിശദമായ അന്വേഷണം ആരംഭിച്ചു.

കുടുംബ വഴക്കിന് പിന്നാലെ നടന്ന ഈ ദുരന്തത്തെക്കുറിച്ച് നിങ്ങളുടെ അഭിപ്രായം കമൻ്റ് ചെയ്യുക.

Article Summary: Young teacher and husband die after consuming poison following domestic dispute in Manjeshwaram.

#Manjeshwaram #Kadambar #FamilyTragedy #PoisonDeath #FinancialStress #KeralaNews