മൊഗ്രാല്‍ പുത്തൂരില്‍ ഓട്ടോയും ബൈക്കും കൂട്ടിയിടിച്ച് രണ്ടു പേര്‍ മരിച്ചു

Sameer Asif

കാസര്‍കോട്: മൊഗ്രാല്‍ പുത്തൂര്‍ ദേശിയ പാതയില്‍ ഓട്ടോയും ബൈക്കും കൂട്ടിയിടിച്ച് രണ്ടു യുവാക്കള്‍ മരിച്ചു. മൊഗ്രാല്‍ പുത്തൂര്‍ കെ.കെ റോഡ് കുന്നില്‍ ഹൗസില്‍ മുഹമ്മദ് സാദിഖ് (21), കുന്നില്‍ സബീന മന്‍സലില്‍ കെ മൊയ്തീന്‍-ഫാത്വിമ ദമ്പതികളുടെ മകന്‍ സമീര്‍ ആസിഫ് (20) എന്നിവരാണ് മരിച്ചത്. വ്യാഴാഴ്ച വൈകീട്ട് ആറരയോടെയാണ് സംഭവം.

കുന്നില്‍ യങ് ചാലഞ്ചേഴ്‌സ് ഫുട്ബാള്‍ ടീമിലെ അംഗമായിരുന്ന സാദിഖ് സമീറിനോടൊപ്പം ഫുട്ബാള്‍ പരിശീലനം കഴിഞ്ഞ് വീട്ടിലേക്ക് മടങ്ങവെയാണ് അപകടം. മൊഗ്രാല്‍ പുത്തൂരില്‍നിന്ന് കാസര്‍കോട് ഭാഗത്തേക്ക് വരികയായിരുന്ന ഇവര്‍ സഞ്ചരിച്ച ബൈക്കില്‍ കുമ്പള ഭാഗത്തേക്ക് പോവുകയായിരുന്ന ഓട്ടോറിക്ഷ ഇടിക്കുകയായിരുന്നു. ഇടിയുടെ ആഘാതത്തില്‍ ഇരുവരും റോഡിലേക്ക് തെറിച്ചുവീണു.

Sadiq

സാദിഖിനെ ഉടന്‍ കാസര്‍കോട്ടേ ആശുപത്രിയിലത്തെിച്ചെങ്കിലും ജീവന്‍ രക്ഷിക്കാനായില്ല. ബൈക്ക് ഓടിച്ചിരുന്ന സമീറിനെ ഗുരുതര പരിക്കുകളോടെ മംഗലാപുരം സ്വകാര്യ ആശുപത്രിയിലെത്തിച്ചെങ്കിലും മരണം സംഭവിക്കുയായിരുന്നു. സാദിഖിന്റെ മൃതദേഹം കാസര്‍കോട് ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിക്കുകയാണ്. സമീറിന്റെ മൃതദേഹം മംഗലാപുരത്തു നിന്ന് കാസര്‍കോട്ടേക്ക് കൊണ്ടുവരും.

പാചക തൊഴിലാളിയായ അബ്ദുല്ലക്കുഞ്ഞിയുടെയും ഖൈറുന്നിസയുടെയും മകനാണ് സാദിഖ്. സഹോദരങ്ങള്‍: ഷക്കീല്‍ (ഖത്തര്‍), ഷാഹിദ് (ദുബൈ).
സമീറിന്റെ സഹോദരങ്ങള്‍: ഷെബീര്‍ (ബഹറൈന്‍), സെബീന, സിക്കന്ദര്‍.

ഇരുവരുടേയും മൃതദേഹങ്ങള്‍ വെള്ളിയാഴ്ച ഉച്ചയ്ക്ക് മുമ്പ് കുന്നില്‍ ബദര്‍ ജുമാ മസ്ജിദ് ഖബര്‍സ്ഥാനില്‍ ഖബറടക്കും.