തീവണ്ടിയില്‍ നിന്നും വീണ യാത്രക്കാരന്‍ തല പ്ലാറ്റ്‌ഫോമിലിടിച്ച് മരിച്ചു

കാസര്‍കോട്: തീവണ്ടിയില്‍ നിന്നും വീണ യാത്രക്കാരന്‍ തല പ്ലാറ്റ്‌ഫോമിലിടിച്ച് മരിച്ചു. ഞായറാഴ്ച പുലര്‍ച്ചെ നാലുമണിക്കാണ് സംഭവം. ചെന്നൈയില്‍ നിന്ന് മംഗലാപുരത്തേക്ക് പോവുകയായിരുന്ന വെസ്റ്റ്‌കോസ്റ്റ് എക്‌സ്പ്രസില്‍ നിന്നും ചാടിയിറങ്ങുന്നതിനിടയിലാണ് അപകടം. ജനറല്‍ കമ്പാര്‍ട്ട്‌മെന്റില്‍ കയറിയതിന്റെ ടിക്കറ്റ് കീശയിലുണ്ടായിരുന്നു.

മുണ്ടും ഷര്‍ട്ടുമാണ് വേഷം. കാസര്‍കോട്ട് ഇറങ്ങേണ്ട യാത്രക്കാരന്‍ ഉറങ്ങിപ്പോയതായാണ് സംശയം. തീവണ്ടി നീങ്ങിത്തുടങ്ങിയപ്പോഴാകണം ഉണര്‍ന്നത്. പിന്നീട് ചാടിയിറങ്ങിയതായാണ് റെയില്‍വെ പൊലീസ് നിഗമനം.വണ്ടി കാസര്‍കോട് വിട്ടശേഷമാണ് റെയില്‍വെസ്‌റ്റേഷനില്‍ പരിക്കേറ്റ് കിടക്കുന്നത് കണ്ടത്. റെയില്‍വെ പൊലീസ് ഉടന്‍ ആശുപത്രിയിലെത്തിച്ചെങ്കിലും അപ്പോഴേക്കും മരിച്ചിരുന്നു.