കാട്ടുപന്നിയുടെ കുത്തേറ്റ് ടാപ്പിംഗ് തൊഴിലാളി മരിച്ചു

By Web Desk - MainMar 20, 2018, 15:47 IST

വെള്ളരിക്കുണ്ട്: (www.kasargodvartha.com 20.03.2018) കാട്ടുപന്നിയുടെ കുത്തേറ്റ് ടാപ്പിംഗ് തൊഴിലാളി മരിച്ചു. ബളാല്‍ പഞ്ചായത്ത് സ്ഥിരം സമിതി അധ്യക്ഷ റോസമ്മയുടെ ഭര്‍ത്താവ് വെള്ളരിക്കുണ്ട് അനമഞ്ഞാലിലെ ജോസ് (58) ആണ് മരിച്ചത്. ചൊവ്വാഴ്ച രാവിലെ 11 മണിയോടെ ടാപ്പിംഗ് കഴിഞ്ഞ ശേഷം പാലെടുത്ത് കൊണ്ടിരിക്കുന്നതിനിടെ കാട്ടുപന്നി പിറകിലൂടെ വന്ന് കുത്തുകയായിരുന്നു.

തുടയില്‍ കുത്തുകയും വലതു കൈ കടിച്ചുപറിക്കുകയും ചെയ്തു. തൊട്ടടുത്ത പറമ്പില്‍ ഉണ്ടായിരുന്നവര്‍ പന്നിയെ ഓടിച്ച ശേഷം ജോസിനെ ഉടന്‍ തന്നെ കാഞ്ഞങ്ങാട്ടെ സ്വകാര്യാശുപത്രിയിലെത്തിച്ചെങ്കിലും അപ്പോഴേക്കും മരണപ്പെട്ടിരുന്നു. രക്തം വാര്‍ന്നാണ് ജോസ് മരണപ്പെട്ടത്. ഈ പ്രദേശത്ത് കാട്ടുപന്നിയുടെ അക്രമം വ്യാപകമാണെന്ന് നാട്ടുകാര്‍ നേരത്തെ തന്നെ പരാതിയുന്നയിച്ചിരുന്നു. കാട്ടുപന്നിയുടെ ഉപദ്രവം തടയുന്നതിന് യാതൊരു നടപടിയും വനം വകുപ്പോ ബന്ധപ്പെട്ട അധികൃതരോ സ്വീകരിച്ചിരുന്നില്ലെന്നാണ് ആക്ഷേപം.