കാനഡയിൽ വീണ്ടും വിമാനാപകടം; മലയാളി പൈലറ്റ് ഗൗതം സന്തോഷ് മരിച്ചു, ഒരു മാസത്തിനിടെ ഇത് രണ്ടാമത്തെ ദുരന്തം

​​​​​ന്യൂഡല്‍ഹി: (KasargodVartha) കാനഡയിൽ കഴിഞ്ഞ ദിവസം നടന്ന ചെറു വിമാനാപകടത്തിൽ മലയാളി യുവാവായ പൈലറ്റ് ഗൗതം സന്തോഷ് മരിച്ചു. ജൂലൈ മാസത്തിൽ കാനഡയിൽ വിമാനാപകടത്തിൽ മലയാളി യുവാവ് മരിക്കുന്നത് ഇത് രണ്ടാം തവണയാണ്.

ഗൗതം സന്തോഷിന്റെ മരണം ടൊറോണ്ടോയിലെ ഇന്ത്യൻ കോൺസുലേറ്റ് സ്ഥിരീകരിച്ചിട്ടുണ്ട്. സമൂഹമാധ്യമമായ 'എക്‌സി'ൽ (മുമ്പ് ട്വിറ്റർ) പങ്കുവച്ച കുറിപ്പിലാണ് സംഭവത്തിൽ അഗാധമായ ദുഃഖം രേഖപ്പെടുത്തി കോൺസുലേറ്റ് ജനറൽ മലയാളി യുവാവിന്റെ മരണം സ്ഥിരീകരിച്ചത്. കോൺസുലേറ്റ് പങ്കുവെച്ച കുറിപ്പ് മുഖ്യമന്ത്രി പിണറായി വിജയന്റെ 'എക്‌സ്' ഹാന്റിലും ടാഗ് ചെയ്തിട്ടുണ്ട്.

അപകടം നടന്നത് ഡീർ ലേക്കിന് സമീപം

ശനിയാഴ്ച വൈകിട്ട് ന്യൂഫൗണ്ട്‌ലാന്റിലെ ഡീർ ലേക്കിന് സമീപമാണ് എട്ട് പേർക്ക് മാത്രം സഞ്ചരിക്കാനാകുന്ന ചെറു വാണിജ്യ സർവേ വിമാനം തകർന്നുവീണത്. അപകട സമയത്ത് രണ്ട് പേരാണ് വിമാനത്തിലുണ്ടായിരുന്നതെന്നും, ഇരുവരും മരിച്ചെന്നുമാണ് ലഭിക്കുന്ന വിവരം. ശനിയാഴ്ച വൈകിട്ട് പ്രാദേശിക സമയം 5.35 ഓടെയാണ് അപകടം നടന്നത്. ബ്രിട്ടീഷ് - കൊളംബിയ ആസ്ഥാനമായി പ്രവർത്തിക്കുന്ന കിസിക് ജിയോസ്പേഷ്യൽ ആന്റ് ഏരിയൽ സർവേ കമ്പനിയുടേതായിരുന്നു വിമാനം. അപകടത്തിൽ കമ്പനി ഉടമ ആൻഡ്രൂ നയ്സ്മിത് അനുശോചിച്ചു. സാധ്യമായ എല്ലാ രീതിയിലും മരിച്ചവരുടെ കുടുംബങ്ങൾക്ക് എല്ലാവിധ സഹായവും നൽകുമെന്ന് അദ്ദേഹം അറിയിച്ചു.

ഒരു മാസത്തിനിടെ രണ്ടാം ദുരന്തം

ജൂലൈ പത്തിനാണ് കാനഡയിൽ തന്നെ പരിശീലനത്തിനിടെ വിമാനങ്ങൾ കൂട്ടിയിടിച്ചുണ്ടായ അപകടത്തിൽ ശ്രീഹരി സുകേഷ് എന്ന മലയാളി യുവാവ് മരിച്ചത്. ഇതിന് പിന്നാലെയാണ് ശനിയാഴ്ച നടന്ന ഈ അപകടം. ഇതോടെ ഒരു മാസത്തിനിടെ കാനഡയിൽ മരിച്ച മലയാളി യുവ പൈലറ്റുകളുടെ എണ്ണം രണ്ടായി.
 

കാനഡയിലെ ഈ തുടർച്ചയായ വിമാനാപകടങ്ങളെക്കുറിച്ച് നിങ്ങളുടെ അഭിപ്രായം എന്താണ്?

Article Summary: Malayali pilot dies in second Canadian plane crash this month.

#CanadaPlaneCrash #MalayaliPilot #GautamSanthosh #AviationTragedy #KeralaDiaspora #AirSafety