ബോട്ടും തോണിയും കൂട്ടിയിടിച്ച് കാണാതായ തൊഴിലാളിയുടെ മൃതദേഹം കണ്ടെത്തി

നീലേശ്വരം: (KasargodVartha) മടക്കര ഹാർബറിന് സമീപം അഴീമുഖത്ത് മീൻപിടുത്ത ബോട്ടും പൂഴി വാരലിൽ ഏർപ്പെട്ട തോണിയും കൂട്ടിയിടിച്ച് കാണാതായ തൊഴിലാളിയുടെ മൃതദേഹം വ്യാഴാഴ്ച (09.10.2025) വൈകീട്ടോടെ കണ്ടെത്തി. ചെറുവത്തൂർ അച്ചാംതുരുത്തി ഏരിഞ്ഞിക്കീലിലെ ശ്രീധരനാണ് (50) മരിച്ചത്. മണിക്കൂറുകൾ നീണ്ട തിരച്ചിലിനൊടുവിലാണ് മൃതദേഹം കണ്ടെത്തിയത്.

അപകടം രാവിലെ

വ്യാഴാഴ്ച രാവിലെ 7:45 മണിയോടെയായിരുന്നു അപകടം നടന്നത്. പുലർച്ചെ മീൻപിടുത്തം കഴിഞ്ഞ് മടക്കര ഹാർബറിലേക്ക് മടങ്ങുകയായിരുന്ന ബോട്ടാണ് പുഴയിൽ അഴിമുഖത്തോട് ചേർന്ന് പൂഴി വാരലിൽ ഏർപ്പെട്ടിരുന്ന തോണിയിൽ ഇടിച്ചത്. കൂട്ടിയിടിയെ തുടർന്ന് തോണിയിലുണ്ടായിരുന്ന തൊഴിലാളിയായ ശ്രീധരനെ കാണാതാവുകയായിരുന്നു.

തിരച്ചിൽ ഊർജ്ജിതമായി നടന്നു

കാണാതായ ശ്രീധരനു വേണ്ടി അപകടം നടന്നയുടൻ തന്നെ ബോട്ടിലുണ്ടായിരുന്നവർ തിരച്ചിൽ നടത്തിയെങ്കിലും കണ്ടെത്താനായിരുന്നില്ല. ഇതേത്തുടർന്ന്, ഫിഷറീസ് വകുപ്പിൻ്റെ റസ്ക്യു ബോട്ടും, കോസ്റ്റൽ പോലീസും, മീൻപിടുത്ത തൊഴിലാളികളും സ്കൂബാ ടീമും സംയുക്തമായി തിരച്ചിൽ ഊർജ്ജിതമാക്കി. ഈ സംഘം നടത്തിയ തിരച്ചിലിനൊടുവിലാണ് മൃതദേഹം അപകടമുണ്ടായ സ്ഥലത്തിന് അൽപ്പം ദൂരെ വെച്ച് കണ്ടെത്തിയത്. റവന്യു ഉദ്യോഗസ്ഥരും ജനപ്രതിനിധികൾ അടക്കമുള്ളവരും സ്ഥലത്തെത്തുകയും തിരച്ചിലിന് നേതൃത്വം നൽകുകയും ചെയ്തിരുന്നു.
 

ഹാർബർ സുരക്ഷാ സംവിധാനങ്ങൾ മെച്ചപ്പെടുത്തേണ്ടതുണ്ടോ? നിങ്ങളുടെ പ്രതികരണം അറിയിക്കുക.

Article Summary: Missing worker's body found after fishing boat and sand dredging canoe collide in Madakkara.

#Madakkara #BoatAccident #Nileshwaram #MissingWorker #KeralaNews #Tragedy