കെ എസ് ടി പി റോഡ് വീണ്ടും ദുരന്തഭൂമി: കാറുകൾ കൂട്ടിയിടിച്ച് യുവാവിന് ദാരുണാന്ത്യം, നാല് പേർക്ക് പരുക്ക്

മേൽപ്പറമ്പ്: (KasargodVartha) കെ എസ് ടി പി കാഞ്ഞങ്ങാട്-കാസർകോട് സംസ്ഥാന പാതയിൽ തായൽ കളനാട് ബസ് സ്റ്റോപ്പിന് സമീപം ഞായറാഴ്ച അർദ്ധരാത്രിയുണ്ടായ വാഹനാപകടത്തിൽ യുവാവ് മരിക്കുകയും നാല് സുഹൃത്തുക്കൾക്ക് ഗുരുതരമായി പരിക്കേൽക്കുകയും ചെയ്തു. ബേക്കൽ തൃക്കണ്ണാട് മലാംകുന്നിലെ അശോകൻ്റെ മകൻ എ. അനന്തു (26) ആണ് മരിച്ചത്.

അനന്തുവിനൊപ്പമുണ്ടായിരുന്ന സുഹൃത്തുക്കളായ അശ്വിൻ (25), പ്രണവ് (26), സൗരവ് (25), അക്ഷയ് (26) എന്നിവർക്കാണ് പരിക്കേറ്റത്. ഇവരെ ഉടൻതന്നെ വിവിധ ആശുപത്രികളിൽ പ്രവേശിപ്പിച്ചു.

സിനിമ കണ്ട് മടങ്ങുകയായിരുന്ന യുവാക്കളുടെ ആൾട്ടോ കാറും കാസർകോട് ഭാഗത്തേക്ക് പോവുകയായിരുന്ന ഇന്നോവ കാറുമാണ് കൂട്ടിയിടിച്ചത്. അപകടത്തിൽ ആൾട്ടോ കാറിൻ്റെ മുൻഭാഗം പൂർണ്ണമായും തകർന്നു. കാറിൻ്റെ ഇടതുവശത്തിരുന്ന അനന്തു തൽക്ഷണം മരിച്ചു. പ്രണവാണ് കാർ ഓടിച്ചിരുന്നത്.

അപകടത്തെക്കുറിച്ച് മേൽപ്പറമ്പ് പോലീസ് അന്വേഷണം ആരംഭിച്ചിട്ടുണ്ട്.

ഇതിനുപുറമെ, ഞായറാഴ്ച കെ എസ് ടി പി റോഡിൽ രണ്ട് വാഹനാപകടങ്ങൾ കൂടി റിപ്പോർട്ട് ചെയ്തിട്ടുണ്ട്. കാഞ്ഞങ്ങാട് അതിഞ്ഞാലിൽ ഓട്ടോറിക്ഷയും കാറും കൂട്ടിയിടിച്ച് ഡ്രൈവർക്കും രണ്ട് അതിഥി തൊഴിലാളികൾക്കും പരിക്കേറ്റു. 

ബേക്കൽ പൂച്ചക്കാട്ട് കോഴികളുമായി പോവുകയായിരുന്ന പിക്കപ്പ് വാൻ കലുങ്കിലിടിച്ച് ഡ്രൈവർക്കും സഹായിക്കും ഗുരുതരമായി പരിക്കേൽക്കുകയും നൂറോളം കോഴികൾ ചാവുകയും ചെയ്തു.

കെ എസ് ടി പി റോഡിലെ അപകടങ്ങളെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: A young man died and four others were seriously injured in a car collision on the KSTP Kanhangad-Kasaragod state highway near Thayyil Kalanad. The accident involved a car returning from a movie and an Innova car. Two other accidents were also reported on the same road on Sunday.

#KSTPRoadAccident, #RoadAccident, #Kasaragod, #CarCollision, #FatalAccident, #Kerala