ബാംഗ്ലൂരില്‍ കോട്ടപ്പുറം സ്വദേശിയുടെ ജീവന്‍ തട്ടിയെടുത്തത് മണല്‍ ലോറി

നീലേശ്വരം: ബാംഗ്ലൂരില്‍ കോട്ടപ്പുറം സ്വദേശിയായ യുവ വ്യവസായിയുടെ ജീവനപഹരിച്ചത് മണല്‍ ലോറി. വ്യാഴാഴ്ച ഉച്ചയോടെയാണ് ബാംഗ്ലൂര്‍ ശിവാജി നഗറിലുണ്ടായ അപകടത്തില്‍ നീലേശ്വരം കോട്ടപ്പുറം കാവിന് സമീപത്തെ ഹിദായത്ത് മന്‍സിലില്‍ പരേതനായ അമീര്‍ ഹാജിയുടെ മകന്‍ ടി. സി. നൗഷാദ് അലി(38) മരണപ്പെട്ടത്.

നൗഷാദ് സഞ്ചരിച്ച ബൈക്കില്‍ കാറിടിച്ചതിനെതുടര്‍ന്ന് റോഡിലേക്ക് വീണ യുവാവിന്റെ ദേഹത്തുകൂടി മണല്‍ ലോറി കയറിയിറങ്ങുകയായിരുന്നു. ഉടന്‍ തന്നെ നൗഷാദിനെ അടുത്തുള്ള സ്വകാര്യാശുപത്രിയില്‍ പ്രവേശിപ്പിച്ചുവെങ്കിലും ജീവന്‍ രക്ഷിക്കാനായില്ല. ബാംഗ്ലൂര്‍ വാനസ്‌വാടിയില്‍ നൈസ് ബസാര്‍ സൂപ്പര്‍മാര്‍ക്കറ്റ് ഉടമയായ നൗഷാദലി വ്യാപാരാവശ്യത്തിന് മാര്‍ക്കറ്റിലേക്ക് പോകുമ്പോഴായിരുന്നു അപകടം.

നൗഷാദിന്റെ മൃതദേഹം വെള്ളിയാഴ്ച പുലര്‍ച്ചെ ഭാര്യാ ഗൃഹമായ കണ്ണൂര്‍ താണയിലെ ആനയിടുക്ക് ഖദീജ മന്‍സിലില്‍ എത്തിച്ചശേഷം കോട്ടപ്പുറത്തേക്ക് കൊണ്ടുവരികയായിരുന്നു. തുടര്‍ന്ന് മൃതദേഹം വന്‍ ജനാവലിയുടെ സാന്നിധ്യത്തില്‍ കോട്ടപ്പുറം ജുമാമസ്ജിദ് ഖബര്‍ സ്ഥാനില്‍ ഖബറടക്കി.

ഒരു വര്‍ഷം മുമ്പ് ബാംഗ്ലൂരിലുണ്ടായ അപകടത്തില്‍ നൗഷാദിനും ഭാര്യാ പിതാവിനും പരിക്കേറ്റിരുന്നു. കണ്ണൂരിലെ വ്യാപാര പ്രമുഖന്‍ സി പി സുബൈര്‍ ഹാജിയുടെ മകള്‍ ടി പി ജംഷീറയാണ് നൗഷാദിന്റെ ഭാര്യ. മാതാവ് പരേതയായ നഫീസത്ത്. മക്കള്‍: നഷീദ, നിഹാല, നബീല്‍. സഹോദരങ്ങള്‍: സുരയ്യ, മുഹമ്മദ് കുഞ്ഞി, മുസ്സമ്മില്‍, നാഫി.