കേരള കോണ്‍ഗ്രസ് നേതാവ് പ്രിന്‍സ് ലൂക്കോസ് അന്തരിച്ചു

കോട്ടയം: (KasargodVartha) കേരള കോണ്‍ഗ്രസ് നേതാവും മുൻ യുഡിഎഫ് സ്ഥാനാർഥിയുമായിരുന്ന പ്രിന്‍സ് ലൂക്കോസ് (53) അന്തരിച്ചു. കുടുംബത്തോടൊപ്പം വേളാങ്കണ്ണിയിൽ പോയി മടങ്ങും വഴി ട്രെയിനിൽ വെച്ച് ഹൃദയാഘാതം ഉണ്ടാവുകയായിരുന്നു. പുലർച്ചെ 3.30ന് ട്രെയിൻ തെങ്കാശിയിൽ എത്തിയപ്പോഴാണ് സംഭവം. ഉടൻ തന്നെ ആശുപത്രിയിൽ എത്തിച്ചെങ്കിലും അദ്ദേഹത്തിൻ്റെ ജീവൻ രക്ഷിക്കാനായില്ല.

കഴിഞ്ഞ നിയമസഭ തിരഞ്ഞെടുപ്പില്‍ ഏറ്റുമാനൂർ മണ്ഡലത്തിലെ യുഡിഎഫ് സ്ഥാനാർഥിയായിരുന്നു പ്രിന്‍സ് ലൂക്കോസ്. രാഷ്ട്രീയത്തിൽ വലിയ സ്ഥാനങ്ങൾ വഹിച്ച വ്യക്തിയാണ്. കേരള കോണ്‍ഗ്രസിൻ്റെ സ്ഥാപക നേതാക്കളിലൊരാളായിരുന്ന ഒ.വി ലൂക്കോസിൻ്റെ മകനാണ് അദ്ദേഹം. കേരള കോണ്‍ഗ്രസ് (ജോസഫ്) ഉന്നതാധികാര സമിതി അംഗമായിരുന്നു പ്രിൻസ് ലൂക്കോസ്.

ചെറുപ്പകാലം മുതൽ രാഷ്ട്രീയ രംഗത്ത് സജീവമായിരുന്ന പ്രിൻസ് ലൂക്കോസ് യൂത്ത് ഫ്രണ്ട്, കെ എസ് സി എന്നീ സംഘടനകളുടെ സംസ്ഥാന പ്രസിഡന്റായും പ്രവർത്തിച്ചിട്ടുണ്ട്. കോട്ടയം പെരുമ്പയിക്കാട് സ്വദേശിയായ പ്രിൻസ് ലൂക്കോസിൻ്റെ അപ്രതീക്ഷിത വേർപാട് കേരള കോൺഗ്രസ് പാർട്ടിക്കും കേരള രാഷ്ട്രീയത്തിനും തീരാനഷ്ടമാണ്.

പ്രിൻസ് ലൂക്കോസിൻ്റെ വേർപാടിൽ അനുശോചനം രേഖപ്പെടുത്തൂ.

Article Summary: Kerala Congress leader Prince Lukose passed away due to a heart attack.

#KeralaCongress #PrinceLukose #Obituary #KeralaPolitics #Kottayam #News