കണ്ണൂർ റെയിൽവെ സ്റ്റേഷനിൽ അവശനിലയിൽ കണ്ടെത്തിയ കാസർകോട് സ്വദേശി മരിച്ചു; ബന്ധുക്കളെ തേടുന്നു

കണ്ണൂർ: (KasargodVartha) റെയിൽവെ സ്റ്റേഷനിൽ അവശനിലയിൽ കണ്ടെത്തിയതിനെത്തുടർന്ന് ആശുപത്രിയിൽ പ്രവേശിപ്പിച്ച കാസർകോട് സ്വദേശി ചികിത്സയിലിരിക്കെ മരിച്ചു. വെള്ളിയാഴ്ച (23.01.2026) വൈകുന്നേരം 5.30-ഓടെയാണ് ഇയാളെ അവശനിലയിൽ കണ്ണൂർ ജില്ലാ ആശുപത്രിയിൽ എത്തിച്ചത്. പരിശോധന തുടരുന്നതിനിടെയാണ് മരണം സംഭവിച്ചത്.

ആശുപത്രിയിൽ എത്തിച്ച സമയത്ത് വിജയൻ (49), കാഞ്ഞങ്ങാട് എന്നാണ് ഇയാൾ പേരും സ്ഥലവും പറഞ്ഞിരുന്നത്. എന്നാൽ പിന്നീട് ഇയാൾ ഒന്നും സംസാരിച്ചിരുന്നില്ല. ഇദ്ദേഹത്തിൻ്റെ കൈവശമുണ്ടായിരുന്ന ബാഗ് പരിശോധിച്ചപ്പോൾ എറണാകുളം മുരിങ്ങൂർ ഡിവൈൻ ധ്യാനകേന്ദ്രത്തിലെ സ്ലിപ്പ് ലഭിച്ചു.

ഈ സ്ലിപ്പിൽ എൻ. വിജയൻ (49), കുറ്റിക്കോൽ, കാസർകോട് എന്ന വിലാസമാണ് രേഖപ്പെടുത്തിയിരുന്നത്. ഇതിൻ്റെ അടിസ്ഥാനത്തിൽ ആശുപത്രി അധികൃതർ കുറ്റിക്കോലിൽ വിളിച്ച് അന്വേഷിച്ചെങ്കിലും അവിടെ ആർക്കും ഇയാളെ അറിയില്ലെന്ന വിവരമാണ് ലഭിച്ചത്. ഇതോടെ മരിച്ചയാളുടെ ബന്ധുക്കളെ കണ്ടെത്താൻ സാധിക്കാത്ത സാഹചര്യമാണുള്ളത്.

മൃതദേഹം അനാഥ മൃതദേഹം എന്ന നിലയിൽ കണ്ണൂർ ജില്ലാ ആശുപത്രിയിൽ സൂക്ഷിച്ചിരിക്കുകയാണ്. മരിച്ചയാളുടെ ബന്ധുക്കളോ പരിചയക്കാരോ ഉടൻ തന്നെ ആശുപത്രി അധികൃതരുമായി ബന്ധപ്പെടണമെന്ന് അറിയിച്ചിട്ടുണ്ട്. ബന്ധുക്കൾ എത്തിയില്ലെങ്കിൽ അനാഥ മൃതദേഹമായി കണ്ട് സംസ്കരിക്കുമെന്ന് അധികൃതർ വ്യക്തമാക്കി.

നിങ്ങളുടെ ഒരു ഷെയർ ചിലപ്പോൾ ഇദ്ദേഹത്തിന്റെ ബന്ധുക്കളിലേക്ക് ഈ വാർത്ത എത്തിച്ചേക്കാം. സഹായിക്കൂ.

Article Summary: A 49-year-old Kasaragod native named Vijayan, found weak at Kannur Railway Station, died at the District Hospital. Authorities are searching for his relatives as the address found in his bag yielded no leads.

#KannurNews #Kasaragod #DeathNews #PublicNotice #KannurDistrictHospital #Vijayan