സൈനികൻ്റെ ഭാര്യയെ തൂങ്ങി മരിച്ച നിലയിൽ കണ്ടെത്തി; അസ്വാഭാവിക മരണത്തിന് കേസ്

കാസർകോട്: (KasargodVartha) കാറഡുക്ക ഗ്രാമപഞ്ചായത്തിലെ കർമന്തൊടി മൂടാംകുളത്ത് യുവതിയെ വീട്ടിലെ കിടപ്പുമുറിയിൽ തൂങ്ങി മരിച്ച നിലയിൽ കണ്ടെത്തി. നാഗാലാൻഡിൽ സൈനികനായി സേവനമനുഷ്ഠിക്കുന്ന രാജേഷ് കുമാറിൻ്റെ ഭാര്യ സൗപർണിക (41) ആണ് മരിച്ചത്.

2026 മേയ് 30 ശനിയാഴ്ച രാവിലെ ഏഴ് മണിയോടെയാണ് സംഭവം പുറത്തറിയുന്നത്. പുതുതായി പണിത വീടിൻ്റെ മുകൾനിലയിലെ കിടപ്പുമുറിയിൽ ഫാനിൽ ഷാൾ കെട്ടി തൂങ്ങിയ നിലയിൽ സൗപർണികയെ കണ്ടെത്തുകയായിരുന്നുവെന്ന് പോലീസ് പറയുന്നു. ബന്ധുക്കളും നാട്ടുകാരും ചേർന്ന് താഴെയിറക്കി മുള്ളേരിയയിലെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

ഒരു മാസം മുൻപാണ് കുടുംബം പുതുതായി നിർമിച്ച വീടിൻ്റെ ഗൃഹപ്രവേശ ചടങ്ങ് നടത്തിയത്. ചടങ്ങിൽ പങ്കെടുക്കാനെത്തിയ ഭർത്താവ് രാജേഷ് കുമാർ പിന്നീട് ജോലിസ്ഥലത്തേക്ക് മടങ്ങിയിരുന്നു. ഭർത്താവ് നാട്ടിലില്ലാത്ത സമയത്താണ് ദുരന്തം സംഭവിച്ചത്. ദമ്പതികള്‍ക്ക് രണ്ട് മക്കളുണ്ട്.

2026 മേയ് 29 രാത്രി 11.30-നും മേയ് 30 രാവിലെ ഏഴ് മണിക്കും ഇടയിലുള്ള സമയത്താണ് സൗപർണിക സ്വന്തം വീടിൻ്റെ ബെഡ്‌റൂമിൽ ഫാനിൽ തൂങ്ങി മരിച്ചതെന്നാണ് പോലീസിൻ്റെ പ്രാഥമിക നിഗമനം.

രാവിലെ 7.45-ന് പോലീസിന് വിവരം ലഭിച്ചതിനെ തുടർന്ന് ആദൂർ പോലീസ് ബിഎൻഎസ്എസ് വകുപ്പ് 194 പ്രകാരം അസ്വാഭാവിക മരണത്തിന് കേസ് രജിസ്റ്റർ ചെയ്തു. മൂടാംകുളം സ്വദേശിനിയായ പി പ്രഭ  നല്‍കിയ വിവരത്തിന്റെ അടിസ്ഥാനത്തിലാണ് കേസ് രജിസ്റ്റര്‍ ചെയ്തത്.

മുളിയാർ പാത്തനടുക്കം സ്വദേശിനിയായ സൗപർണികയുടെ മരണകാരണം സംബന്ധിച്ച് പോലീസ് വിശദമായ അന്വേഷണം ആരംഭിച്ചിട്ടുണ്ട്. ഇൻക്വസ്റ്റിന് ശേഷം മൃതദേഹം പോസ്റ്റുമോർട്ടത്തിനായി കാസർകോട് ജനറൽ ആശുപത്രി മോർച്ചറിയിലേക്ക് മാറ്റി.

വിവരമറിഞ്ഞ് ഭർത്താവ് രാജേഷ് കുമാർ നാട്ടിലേക്ക് തിരിച്ചിട്ടുണ്ട്. ആദൂർ ഇൻസ്‌പെക്ടർ ആർ സി ബിജുവിൻ്റെ നേതൃത്വത്തിലാണ് അന്വേഷണം നടക്കുന്നത്.

ഭർതൃമതികളായ യുവതികൾ തുടർച്ചയായി അസ്വാഭാവിക സാഹചര്യത്തിൽ മരണപ്പെടുന്ന സംഭവം സാമൂഹിക ദുരന്തമായി മാറിക്കൊണ്ടിരിക്കുകയാണ്. കാസർകോട്ടും പരിസരങ്ങളിലുമായി കഴിഞ്ഞ ഒരാഴ്ചയ്ക്കിടെ ഈ മരണം കൂടാതെ ഭർതൃമതികളായ മൂന്ന് യുവതികളാണ് തുടർച്ചയായി മരണപ്പെട്ടത്.

ശ്രദ്ധിക്കുക: സ്വയം ജീവനെടുക്കുന്നത് ഒരു പരിഹാരമല്ല. മാനസിക സമ്മർദ്ദമോ നിരാശയോ അനുഭവപ്പെടുന്നവർ സഹായം തേടണം. ദിശ ഹെൽപ്പ്‌ലൈൻ: 1056 / 0471-2552056 ടെലിമാനസ്: 14416

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതൽ പ്രാദേശിക വാർത്തകൾ അറിയാൻ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജില്‍ ഈ വാര്‍ത്തയുടെ താഴെ കമൻ്റായി രേഖപ്പെടുത്തുക.

Article Summary: A 41-year-old woman, the wife of a soldier, was found dead in her newly built house in Karmanthodi, Kasaragod, prompting the Adoor police to register a case of unnatural death.

#KasaragodNews #AdoorPolice #UnnaturalDeath #KeralaPolice #Karmanthodi #CrimeNewsKerala