വിഷം ഉള്ളിൽച്ചെന്ന നിലയിൽ സ്വയം കാറോടിച്ച് ആശുപത്രിയിലെത്തി; ചികിത്സയിലായിരുന്ന കലക്ട്രേറ്റ് ജീവനക്കാരി മരിച്ചു

കാസർകോട്: (KasargodVartha) വിഷം ഉള്ളിൽച്ചെന്ന നിലയിൽ സ്വയം കാറോടിച്ച് ആശുപത്രിയിലെത്തിയ കാസർകോട് കലക്ട്രേറ്റിലെ യുഡി ക്ലർക്കായ യുവതി ചികിത്സയിലിരിക്കെ മരിച്ചു. ചെങ്കള അതിർക്കുഴിയിലെ ആശാലത (41) ആണ് ഞായറാഴ്ച (ഓഗസ്റ്റ് 9) ഉച്ചയ്ക്ക് 12 മണിയോടെ മരിച്ചത്. കലക്ട്രേറ്റിലെ എൻഡോസൾഫാൻ സെല്ലിലായിരുന്നു ഇവർക്ക് ജോലി.

വെള്ളിയാഴ്ച (ഓഗസ്റ്റ് 7) ഉച്ചയ്ക്ക് 2.30-ഓടെയാണ് ആശാലത സ്വന്തം കാർ ഓടിച്ച് ചെങ്കള സഹകരണ ആശുപത്രിയിലെത്തിയത്. വിഷം ഉള്ളിൽച്ചെന്നതായി ആശുപത്രി അധികൃതരെ അറിയിച്ചതിനെ തുടർന്ന് ഇവർക്ക് പ്രാഥമിക ചികിത്സ നൽകി. 

തുടർന്ന് ചെങ്കള ആസ്റ്റർ മിംസിൽ പ്രവേശിപ്പിച്ചെങ്കിലും ആരോഗ്യനില അതീവ ഗുരുതരമായതിനെ തുടർന്ന് വൈകിട്ടോടെ കോഴിക്കോട്ടെ സ്വകാര്യ ആശുപത്രിയിലേക്ക് മാറ്റുകയായിരുന്നു. ഇവിടെ ചികിത്സയിലിരിക്കെയാണ് മരണം സംഭവിച്ചത്.

'എല്ലാവരും ഒറ്റപ്പെടുത്തി'യെന്ന് മൊഴി

സംഭവമറിഞ്ഞ് ആശുപത്രിയിലെത്തിയ വനിതാ പൊലീസ് ഉൾപ്പെടെയുള്ളവർ ആശാലതയിൽ നിന്ന് നേരത്തെ മൊഴി രേഖപ്പെടുത്തിയിരുന്നു. തന്നെ എല്ലാവരും ഒറ്റപ്പെടുത്തിയെന്ന തരത്തിലുള്ള വിഷമം ഇവർ പങ്കുവെച്ചിരുന്നതായാണ് പുറത്തുവരുന്ന വിവരം. ഇതിൻ്റെ കൃത്യമായ പശ്ചാത്തലവും കാരണങ്ങളും കാസർകോട് പൊലീസ് വിശദമായി പരിശോധിച്ചുവരികയാണ്.

സംഭവദിവസം ആശാലത വാട്സാപ്പിൽ പങ്കുവെച്ച അവസാന സ്റ്റാറ്റസും ബന്ധുക്കൾക്കും സുഹൃത്തുക്കൾക്കും ഇടയിൽ ചർച്ചയായിട്ടുണ്ട്. 'നിനക്ക് ഞാൻ നൽകിയ അവസാന പരിഗണനയാണ് എൻ്റെ നിശബ്ദത' എന്നായിരുന്നു സ്റ്റാറ്റസ്. ഒരു പൂച്ചയുടെ ചിത്രം പശ്ചാത്തലമാക്കിയുള്ളതാണ് ഈ സ്റ്റാറ്റസ്. 

ആരെയെങ്കിലും ഉദ്ദേശിച്ചാണോ സ്റ്റാറ്റസ് പങ്കുവെച്ചത്, അതോ അന്നത്തെ മാനസികാവസ്ഥയുടെ സ്വാഭാവിക പ്രകടനമായിരുന്നോ എന്നതടക്കമുള്ള കാര്യങ്ങൾ സമഗ്രമായ അന്വേഷണത്തിലൂടെയാണ് വ്യക്തമാകേണ്ടത്. ആശാലത ഏതെങ്കിലും ആത്മഹത്യാക്കുറിപ്പ് എഴുതിയതായി നിലവിൽ പൊലീസിന് വിവരം ലഭിച്ചിട്ടില്ല.

കലാരംഗത്തെ സജീവ സാന്നിധ്യം

വെള്ളിയാഴ്ച രാവിലെ നെല്ലിക്കട്ടയിലെ ജിമ്മിൽ വ്യായാമത്തിനായി ആശാലത എത്തിയിരുന്നതായും വിവരമുണ്ട്. ഉന്നത വിദ്യാഭ്യാസം നേടിയ ആശാലത എംഎ, ബിഎഡ് ബിരുദധാരിയായിരുന്നു. അതിർക്കുഴിയിലെ കെ വി കുമാരൻ - ശശികല ദമ്പതികളുടെ മകളാണ്. ഭർത്താവ് അജയകുമാർ ഗൾഫിലായിരുന്നു. വിവരം അറിഞ്ഞതിനെ തുടർന്ന് ഓഗസ്റ്റ് 8 ശനിയാഴ്ച തന്നെ ഇദ്ദേഹം നാട്ടിലെത്തി. മക്കൾ: യദു കൃഷ്ണൻ, അഗ്നിവേശ് (അഗുണു). സീമലത സഹോദരിയാണ്. പരേതനായ സുരേഷ് സഹോദരനായിരുന്നു. 10 വർഷം മുൻപ് സുരേഷും സമാനമായ രീതിയിൽ വിഷം ഉള്ളിൽച്ചെന്ന് മരിച്ചതായാണ് ബന്ധുക്കൾ പറയുന്നത്.

കലാരംഗത്തും ആശാലത ഏറെ ശ്രദ്ധേയയായിരുന്നു. കഥാപ്രസംഗം, മോണോ ആക്ട് തുടങ്ങിയ ഇനങ്ങളിൽ സംസ്ഥാനതലത്തിൽ വരെ ഇവർ സമ്മാനങ്ങൾ നേടിയിരുന്നു. മികച്ച സംഘാടകയായും പ്രവർത്തിച്ചിരുന്നു. ഈ വർഷത്തെ ഓണാഘോഷ പരിപാടികൾ ഉൾപ്പെടെയുള്ളവയ്ക്ക് കലക്ടറേറ്റിൽ ഒരുക്കങ്ങൾ നടക്കുന്നതിനിടെയാണ് അപ്രതീക്ഷിത മരണം സഹപ്രവർത്തകരെയും ഞെട്ടിച്ചത്. 

മരണത്തിലേക്ക് നയിച്ച യഥാർഥ സാഹചര്യങ്ങൾ എന്തായിരുന്നുവെന്നും, അവസാന സ്റ്റാറ്റസിന് സംഭവവുമായി നേരിട്ടുള്ള ബന്ധമുണ്ടായിരുന്നോ തുടങ്ങിയ കാര്യങ്ങളും പൊലീസ് അന്വേഷണത്തിലൂടെയും ബന്ധുക്കളുടെയും മൊഴികളിലൂടെയും മാത്രമേ വ്യക്തമാകൂ എന്ന് പൊലീസ് സൂചിപ്പിച്ചു.

വിദ്യാനഗർ പൊലീസ് തിങ്കളാഴ്ച (ഓഗസ്റ്റ് 10) കോഴിക്കോട്ടെത്തി ഇൻക്വസ്റ്റ് നടപടി പൂർത്തിയാക്കി പോസ്റ്റ്മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുകൊടുക്കും.

ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസിക ബുദ്ധിമുട്ടുകൾ ഉണ്ടായാൽ ഉടൻ വിദഗ്ധ സഹായം തേടുക. ടോൾ ഫ്രീ നമ്പർ: 1056, 14416

പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Ashalatha, a UD Clerk at Kasaragod Collectorate, died during treatment after consuming poison and driving herself to the hospital.

#KasaragodNews #CollectorateStaff #KeralaPolice #MentalHealthAwareness #KeralaNews #ChengalaNews #TragicDeath #AparnaNews