ഐഎൻടിയുസി നേതാവ് വി വി സുധാകരനെ റെയിൽവേ ട്രാക്കിൽ മരിച്ച നിലയിൽ കണ്ടെത്തി; 'എല്ലാവരും എന്നോട് ക്ഷമിക്കണം' അവസാന സന്ദേശം

പടന്നക്കാട്: (KasargodVartha) ‘എല്ലാവരും എന്നോട് ക്ഷമിക്കണം... മാപ്പ്.’ സുഹൃത്തുക്കൾക്ക് അയച്ച വാട്സ്ആപ്പ് സന്ദേശം വിങ്ങലായി പടരുന്നതിനിടെ, ഐഎൻടിയുസി ജില്ലാ പ്രസിഡന്റും ഓട്ടോറിക്ഷ തൊഴിലാളി യൂണിയൻ നേതാവുമായ വി.വി. സുധാകരനെ (61) പടന്നക്കാട് മേൽപ്പാലത്തിന് താഴെയുള്ള റെയിൽവേ ട്രാക്കിൽ മരിച്ച നിലയിൽ കണ്ടെത്തി. ജനപ്രിയനായ നേതാവിൻ്റെ മരണവിവരം നാടിനെ ഞെട്ടിച്ചു.

അവസാന സന്ദേശം

മരണവിവരം പുറത്തുവരുന്നതിന് തൊട്ടുമുൻപാണ് സുധാകരൻ സുഹൃത്തുക്കൾക്ക് വാട്സ്ആപ്പ് സന്ദേശം അയച്ചത്. ഹൊസ്ദുർഗ് എസ്.ഐ എം.ടി.പി. സെയ്ഫുദ്ദീൻ ഉൾപ്പെടെയുള്ള സുഹൃത്തുക്കളുടെ ഫോണിലേക്കാണ് ഈ സന്ദേശം എത്തിയത്. 

സന്ദേശം ലഭിച്ച ഉടൻ നടത്തിയ അന്വേഷണത്തിൽ മൊബൈൽ ടവർ ലൊക്കേഷൻ പടന്നക്കാട് ഭാഗത്താണെന്ന് മനസ്സിലാക്കി. തുടർന്ന് നടത്തിയ തിരച്ചിലിലാണ് റെയിൽവേ ട്രാക്കിന് സമീപം ഓട്ടോറിക്ഷയും സുധാകരന്റെ മൃതദേഹവും കണ്ടെത്തിയത്.

ജനപ്രിയനായ നേതാവ്

സൗമ്യമായ പെരുമാറ്റം കൊണ്ട് സുഹൃത്തുക്കൾക്കും സഹപ്രവർത്തകർക്കും പ്രിയങ്കരനായിരുന്നു സുധാകരൻ. എല്ലാ ദിവസവും അതിരാവിലെ ഭക്തിഗാനം സുഹൃത്തുക്കൾക്ക് അയക്കുന്ന ശീലം അദ്ദേഹത്തിനുണ്ടായിരുന്നു. 

മരിച്ച ദിവസവും പതിവ് തെറ്റിക്കാതെ എല്ലാവർക്കും ഭക്തിഗാനം എത്തിയിരുന്നു.

ഓട്ടോറിക്ഷ തൊഴിലാളികളുടെ ഏത് ആവശ്യങ്ങൾക്കും ഏത് പാതിരാത്രിയിലും കയറിച്ചെല്ലാവുന്ന വീടായിരുന്നു അദ്ദേഹത്തിൻ്റേത്. അവരുടെ എല്ലാ കാര്യങ്ങൾക്കും താങ്ങും തണലുമായിരുന്നു അദ്ദേഹം.

നാടിന്റെ എല്ലാ ആഘോഷങ്ങളിലും മുന്നിട്ടിറങ്ങി പ്രവർത്തിച്ചിരുന്ന വ്യക്തികൂടിയായിരുന്നു സുധാകരൻ. നിരവധി ക്ഷേത്രങ്ങളിലെ ഉത്സവങ്ങളുടെ മുഖ്യ സംഘാടകനായും പ്രവർത്തിച്ചിട്ടുണ്ട്. നാടിനെ കരുതലോടെ കണ്ട പ്രിയ നേതാവിൻ്റെ വിയോഗം വേദനയോടെയാണ് നാട് കേട്ടത്. മരണകാരണം എന്താണെന്ന് വ്യക്തമല്ല.

നേതൃസ്ഥാനങ്ങൾ

● ഓട്ടോറിക്ഷ തൊഴിലാളി യൂണിയൻ ഐഎൻടിയുസി ജില്ലാ പ്രസിഡന്റ്.
● ഹൊസ്ദുർഗ് സർവീസ് സഹകരണ ബാങ്ക് ഡയറക്ടർ.

കുടുംബം

● ഭാര്യ: പ്രീത
● മക്കൾ: പൃഥ്വി, പ്രണവ്
● സഹോദരങ്ങൾ: വി.വി. ശോഭ (കൗൺസിലർ, കാഞ്ഞങ്ങാട് നഗരസഭ), പരേതനായ ബാബു.

ഈ വിഷയത്തെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: INTUC leader VV Sudhakaran found dead on railway track after sending a mysterious last message.

#VVSudhakaran #INTUC #KeralaNews #Kasargod #Obituary #Tragedy