ഗള്‍ഫുകാരന്റെ ഭാര്യയായ യുവതി കിണറ്റില്‍ മരിച്ച നിലയില്‍

പെരിയാട്ടടുക്കം: (kasargodvartha.com 19.03.2014) ഗള്‍ഫുകാരന്റെ ഭാര്യയായ യുവതിയെ ദുരൂഹ സാഹചര്യത്തില്‍ കിണറ്റില്‍ മരിച്ച നിലയില്‍ കണ്ടെത്തി. തച്ചങ്ങാട് വാഴവളപ്പിലെ ബാലകൃഷ്ണന്റെ ഭാര്യ ബീന(30)യാണ് മരിച്ചത്. ചൊവ്വാഴ്ച വൈകിട്ട് അഞ്ച് മണിയോടെ കാലിയടുക്കം തൊണ്ടോളിയിലെ കിണറിലാണ് മൃതദേഹം കാണപ്പെട്ടത്. സംശയത്തെ തുടര്‍ന്ന് മൃതദേഹം പരിയാരം മെഡിക്കല്‍ കോളജില്‍ പോസ്റ്റ്‌മോര്‍ട്ടം ചെയ്തു. നിരവധി കുടുംബങ്ങള്‍ വെള്ളമെടുക്കുന്ന കിണറില്‍ പൊങ്ങിക്കിടക്കുന്ന നിലയിലാണ് മൃതദേഹം കാണപ്പെട്ടത്. ഫയര്‍ഫോഴ്‌സും നാട്ടുകാരും ചേര്‍ന്ന് മൃതദേഹം പുറത്തെടുത്തപ്പോഴാണ് ബീനയുടേതെന്ന് മനസ്സിലായത്.

File Photo

കെട്ടിട നിര്‍മ്മാണ തൊഴിലാളിയായ ബാലകൃഷ്ണന്‍ ഒന്നര വര്‍ഷം മുമ്പാണ് ഗള്‍ഫില്‍ പോയത്. ബീന മക്കളായ വിഥുന്‍, മിഥുന്‍ എന്നിവര്‍ക്കൊപ്പം കുടുംബവീട്ടിലായിരുന്നു താമസം. ചൊവ്വാഴ്ച ഉച്ചയോടെ ആശുപത്രിയിലേക്കാണെന്ന് പറഞ്ഞ് വീട്ടില്‍നിന്ന് ഇറങ്ങിയ ബീന മൊബൈല്‍ഫോണ്‍ വീട്ടില്‍ വെച്ചിരുന്നു. പ്ലാസ്റ്റിക് കവറില്‍ പൊതിഞ്ഞ നിലയില്‍ 5450 രൂപ ബ്ലൗസിനകത്ത് സൂക്ഷിച്ച നിലയിലായിരുന്നു. ബീന തൊണ്ടോളിയില്‍ എത്താന്‍ സാധ്യതയില്ലാത്തതിനാലാണ് മരണത്തില്‍ സംശയം ഉയര്‍ന്നിരിക്കുന്നത്. സംഭവത്തില്‍ ബേക്കല്‍ പോലീസ് കേസെടുത്ത് അന്വേഷണം നടത്തിവരികയാണ്.