രോഗിയായ ബന്ധുവിനെ സന്ദര്‍ശിക്കാനെത്തിയ വീട്ടമ്മ ആശുപത്രിയില്‍ കുഴഞ്ഞുവീണ് മരിച്ചു

കളനാട്: (www.kasargodvartha.com 05.02.2019) രോഗിയായ ബന്ധുവിനെ സന്ദര്‍ശിക്കാനെത്തിയ വീട്ടമ്മ ദേഹാസ്വാസ്ഥ്യത്തെ തുടര്‍ന്ന് ആശുപത്രിയില്‍ കുഴഞ്ഞുവീണ് മരിച്ചു. കളനാട് സി എച്ച് ഹൗസിലെ സുഹ്‌റ (68) ആണ് മരിച്ചത്. ഐഎന്‍എല്‍ കളനാട് ശാഖ പ്രസിഡന്റും കളനാട് ജമാഅത്ത് മുന്‍ പ്രസിഡന്റുമായ സി എച്ച് ആമു ഹാജിയുടെ ഭാര്യയാണ്.

ഗള്‍ഫില്‍ നിന്നെത്തിയ ബന്ധു അസുഖത്തെ തുടര്‍ന്ന് കാസര്‍കോട്ടെ സ്വാകര്യാശുപത്രിയില്‍ ചികിത്സയിലായിരുന്നു. ഇയാളെ സന്ദര്‍ശിക്കാന്‍ ആശുപത്രിയിലെ കോണിപ്പടി കയറി രണ്ടാം നിലയിലെ റൂമിലെത്തിയ സുഹ്‌റ രോഗിയോട് സംസാരിക്കുന്നതിനിടെ കുഴഞ്ഞുവീഴുകയായിരുന്നു. ഉടന്‍ തന്നെ ഐസിയുവില്‍ പ്രവേശിപ്പിച്ചെങ്കിലും അപ്പോഴേക്കും മരണപ്പെട്ടിരുന്നു. നേരത്തെ സുഹ്‌റയ്ക്ക് ഹൃദസംബന്ധമായ അസുഖത്തെ തുടര്‍ന്ന് ചികിത്സ തേടിയിരുന്നു.