കാര്‍ കെ.എസ്.ആര്‍.ടി.സി ബസിലിടിച്ച് ഒരു കുടുംബത്തിലെ നാലുപേര്‍ മരിച്ചു

ചിക്കമംഗലൂര്‍: കാര്‍ കെ.എസ്.ആര്‍.ടി.സി ബസിലിടിച്ച്  ഒരു കുടുംബത്തിലെ നാലുപേര്‍ മരിച്ചു. ആറു പേര്‍ക്ക് ഗുരുതരമായി പരിക്കേറ്റു. മരിച്ചവരില്‍ മൂന്നുപേര്‍ സ്ത്രീകളാണ്. ദേശീയപാത ഏഴില്‍ ദൊഡ്ഡ പിലാഗുര്‍ക്കിയില്‍ ചൊവ്വാഴ്ച ഉച്ചതിരിഞ്ഞാണ് അപകടമുണ്ടായത്.

തിമ്മസാന്ദ്രയില്‍ നിന്ന് ആന്ധ്രാപ്രദേശിലെ പിനുകോണ്ടയിലെ ഒരു ദര്‍ഗയിലേക്ക് തീര്‍ത്ഥയാത്ര പോകുന്നവരാണ് അപകടത്തില്‍ പെട്ടത്. കാറോടിച്ചിരുന്ന സക്കീര്‍ (38) സല്‍മ (35) സബ്രീന (25) ഫാത്വിമ (48) എന്നിവരാണ് മരിച്ചത്.

പരിക്കേറ്റവരില്‍ രണ്ടുപേരുടെ നില അതീവ ഗുരുതരമാണ്. പരിക്കേറ്റവരെ ബംഗലൂരു ആശുപത്രിയില്‍ പ്രവേശിപ്പിച്ചു. അമിത വേഗതയിലായിരുന്ന കാര്‍ മുമ്പില്‍ പോകുകയായിരുന്ന ബസിന്റെ പിറകില്‍ ഇടിച്ച് മറിഞ്ഞാണ് അപകടമുണ്ടായതെന്ന് പോലീസ് പറഞ്ഞു. കാര്‍ പൂര്‍ണമായും തകര്‍ന്നു. മൂന്നു പേര്‍ സംഭവ സ്ഥലത്തുവെച്ചുതന്നെയാണ് മരിച്ചത്.


ബസിനടിയിലേക്ക് പാഞ്ഞുകയറിയ കാര്‍ ക്രെയിന്‍ ഉപയോഗിച്ചാണ് പുറത്തെടുത്തത്. അതിനാല്‍ തന്നെ രക്ഷാപ്രവര്‍ത്തനം വൈകിയതിനാലാണ്  മരണസംഖ്യ ഉയരാന്‍ കാരണമായതെന്ന് പോലീസ് പറഞ്ഞു.