സന്തോഷം കണ്ണീരായി; ഡോക്ടറായ മകളുടെ വിവാഹത്തിന് പിന്നാലെ പ്രവാസി മലയാളി കുഴഞ്ഞുവീണു മരിച്ചു

കാസർകോട്: (KasargodVartha) മകളുടെ വിവാഹത്തിന് പിന്നാലെ ഉണ്ടായ സന്തോഷം ബദിയടുക്കയിൽ വലിയ ദുഃഖത്തിന് വഴിമാറി. ഡോക്ടറായ മകളുടെ നിക്കാഹ് കഴിഞ്ഞ് രണ്ട് ദിവസത്തിന് ശേഷം ഉക്കിനടുക്കയിൽ മുൻ പ്രവാസി കുഴഞ്ഞുവീണ് മരിച്ചു. ബദിയടുക്ക ഷേണി സ്വദേശിയും നിലവിൽ ഉക്കിനടുക്ക മസ്ജിദിന് സമീപം താമസക്കാരനുമായ സാദിഖ് എന്ന സർവ്വേ സാദിഖ് (55) ആണ് വിടവാങ്ങിയത്. ചൊവ്വാഴ്ച, രാത്രി 11 മണിയോടെ വീട്ടിൽ വെച്ച് കുഴഞ്ഞുവീഴുകയായിരുന്നു. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

സന്തോഷം കണ്ണീരായി

സാദിഖിൻ്റെ മകൾ ഡോ. ശറഫുന്നിസയുടെ വിവാഹം ഞായറാഴ്ചയാണ് നടന്നത്. പന്നിപ്പാറയിലെ ഡോ. നബ്ഹലുമായിട്ടായിരുന്നു സർഫുന്നീസയുടെ വിവാഹം. മകളുടെ വിവാഹത്തിൻ്റെ തിരക്കുകളും സന്തോഷങ്ങളും വീട്ടിൽ തുടരുന്നതിനിടെയാണ് നാടിനെ നൊമ്പരത്തിലാഴ്ത്തി സാദിഖിൻ്റെ വിയോഗം സംഭവിച്ചത്. മുൻപ് പ്രവാസിയായിരുന്ന അദ്ദേഹം ഇപ്പോൾ കൃഷിയിലും സാമൂഹിക-ജീവകാരുണ്യ പ്രവർത്തനങ്ങളിലും സജീവമായിരുന്നു.

കുടുംബം

സഫിയയാണ് സാദിഖിൻ്റെ ഭാര്യ. മക്കൾ: സാജിത, സിബിലിയത്ത്, മുസ്തഫ. ബപ്പാലി പൊന്നം മസ്ജിദ് പ്രസിഡൻ്റ് മുഹമ്മദ് ഹാജി, അബ്ദുല്ല ഹാജി, അബ്ദുൽ റഹ്‌മാൻ, കുഞ്ഞഹമ്മദ് ഹാജി, ഹസൈനാർ, ബീഫാത്വിമ, റാബിയ, അഷ്റഫ്, അബ്ദുൽ അസീസ്, അബ്ദുൽ ഹമീദ് എന്നിവരാണ് സഹോദരങ്ങൾ.

സാദിഖിൻ്റെ മൃതദേഹം ബുധനാഴ്ച, രാവിലെ 11.30 മണിയോടെ ഉക്കിനടുക്ക ജുമാ മസ്ജിദ് ഖബർസ്ഥാനിൽ ഖബറടക്കി. ഉക്കിനടുക്കയിലും ഷേണിയിലും ഒരുപോലെ സൗഹൃദങ്ങളുണ്ടായിരുന്ന സാദിഖിൻ്റെ വിയോഗത്തിൽ നാടിൻ്റെ വിവിധ മേഖലകളിലുള്ളവർ അനുശോചനം രേഖപ്പെടുത്തി.

ബദിയടുക്ക മേഖലയിലെ പ്രാദേശിക വാർത്തകൾക്കും വിശേഷങ്ങൾക്കുമായി ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. ഈ വാർത്ത ഷെയർ ചെയ്യുക.

Article Summary: A 55-year-old former NRI and social worker, Survey Sadiq, died after collapsing at home in Badiyadukka, just two days after his daughter's wedding.

#KasaragodNews #Badiyadukka #Ukkinadukka #SadhiqSurvey #KeralaNews #BreakingNews #Obituary #MalayalamNews #NRI #SocialWorker