മകന്റെ കല്യാണ ദിവസം പിതാവ് മരിച്ചു

ഉപ്പള: (www.kasargodvartha.com 09.04.2018) മകന്റെ കല്യാണ ദിവസം പിതാവ് മരിച്ചു. ജില്ലയിലെ പ്രധാന ദഫ് റാത്തീബ് മജ്‌ലിസായ ബേക്കൂര്‍ രിഫാഇയ്യ മസ്ജിദ് ശില്‍പിയും ദീര്‍ഘകാല പ്രസിഡണ്ടുമായ മൂല ബേക്കൂര്‍ മൂസ ഹാജി (68) ആണ് മരിച്ചത്. കേരള മുസിലിം ജമാഅത്ത് യൂണിറ്റ് വൈസ് പ്രസിഡണ്ടായിരുന്നു. മകന്‍ ഫാറൂഖിന്റെ വിവാഹ ചടങ്ങുകള്‍ വീട്ടില്‍ നടന്നത് ശനിയാഴ്ചയായിരുന്നു. വൈകിട്ട് മകളുടെ മകളുടെയും നിക്കാഹുണ്ടായിരുന്നു. വീട്ടിലെത്തിയവരെയെല്ലാം സ്വീകരിക്കുകയും എല്ലാ ചടങ്ങുകള്‍ക്കും നേതൃത്വം നല്‍കുകയും ചെയ്ത് ഉറങ്ങാന്‍ കിടന്നതായിരുന്നു. പുലര്‍ച്ചെ നെഞ്ച് വേദനയെത്തുടര്‍ന്ന് ആശുപത്രയിലേക്ക് കൊണ്ട് പോയെങ്കിലും മരണം സംഭവിക്കുകയായിരുന്നു.

ബേക്കൂരിലെ പരേതരായ അബ്ദുര്‍ റഹ് മാന്‍- മറിയുമ്മ ദമ്പതികളുടെ മകനാണ്. ഭാര്യ മിറയം. മറ്റു മക്കള്‍: അബ്ദുര്‍ റഹ് മാന്‍ (മദീന), മുഹമ്മദ് (ഖത്തര്‍), മൊയ്തു (ഉപ്പള സി എം ട്രാവല്‍സ് ഉടമ), കബീര്‍ (മക്ക), ബിലാല്‍ (മക്ക), ആമിന. മരുമക്കള്‍: ആമിന, റബീഅ, ഹസീന, അസ്മീന, പരേതനായ ഹക്കീം. മൃതദേഹം ബേക്കൂര്‍ രിഫാഇയ്യ മസ്ജിദ് ഖബര്‍സ്ഥാനില്‍ ഖബറടക്കി. സമസ്ത കേന്ദ്ര മുശാവറാംഗം എം അലിക്കുഞ്ഞി മുസ്ലിയാര്‍ ഷിറിയ മയ്യിത്ത് നിസ്‌കാരത്തിന് നേതൃത്വം നല്‍കി.