മകൻ ഓടിച്ച കാർ കർണാടക ആർ ടി സി ബസുമായി കൂട്ടിയിടിച്ചു; പിതാവിന് ദാരുണാന്ത്യം, 22 കാരന് ഗുരുതര പരിക്ക്

ചെർക്കള: (KasargodVartha) കർണാടക ആർ.ടി.സി ബസും കാറും കൂട്ടിയിടിച്ചുണ്ടായ ദാരുണ അപകടത്തിൽ പിതാവ് മരിച്ചു. കാർ ഓടിച്ചിരുന്ന മകന് ഗുരുതരമായി പരിക്കേറ്റു. ബദിയടുക്ക പൈക്ക സ്വദേശിയും നെല്ലിക്കട്ടയിൽ സ്ഥിരതാമസക്കാരനുമായ ഷംസുദ്ദീൻ (ഷംസു - 62) ആണ് മരിച്ചത്. മകൻ സൽമാൻ ഹാരിസിനെ (22) ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചു.

റെയിൽവേ സ്റ്റേഷനിലേക്ക് പോകുംവഴി അപകടം

വിദ്യാനഗർ പോലീസ് സ്റ്റേഷൻ പരിധിയിലെ നെല്ലിക്കട്ട ടൗൺ ജുമാ മസ്ജിദിന് സമീപം ഫെബ്രുവരി 21 ശനിയാഴ്ച രാവിലെ ഒമ്പത് മണിയോടെയായിരുന്നു അപകടം. നെല്ലിക്കട്ട ടൗൺ മസ്ജിദിൽ നിന്ന് സുബ്ഹി നിസ്കാരം കഴിഞ്ഞ് മകനെയും കൂട്ടി കാസർകോട് റെയിൽവേ സ്റ്റേഷനിലേക്ക് പോവുകയായിരുന്നു ഷംസുദ്ദീൻ. യാത്രാമധ്യേ കാസർകോട് ഭാഗത്ത് നിന്ന് പുത്തൂരിലേക്ക് പോവുകയായിരുന്ന കർണാടക ആർ.ടി.സി ബസുമായി വാഹനം കൂട്ടിയിടിക്കുകയായിരുന്നു.

പെട്രോൾ അടിക്കാൻ പമ്പിലേക്ക് കയറാൻ ശ്രമിക്കുന്നതിനിടെയാണ് അപകടമുണ്ടായതെന്നാണ് പ്രാഥമിക വിവരം. നെല്ലിക്കട്ട ടൗണിനു സമീപമുള്ള നെല്ലിക്ക ഫുഡ്‌ സ്ട്രീറ്റിന്റെ അടുത്ത് വെച്ചാണ് ഇവർ സഞ്ചരിച്ചിരുന്ന സ്വിഫ്റ്റ് കാറിലേക്ക് ബസ് ഇടിച്ചുകയറിയത്.

കാർ വെട്ടിപ്പൊളിച്ച് രക്ഷാപ്രവർത്തനം

അപകടത്തിൽ കാർ പൂർണ്ണമായും തകർന്നു. തകർന്ന കാറിൽ കുടുങ്ങിയ ഷംസുദ്ദീനെ വാഹനം വെട്ടിപ്പൊളിച്ചാണ് നാട്ടുകാർ പുറത്തെടുത്തത്. ഉടൻ തന്നെ ചെർക്കള മിംസ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അപകടകാരണം സംബന്ധിച്ച് വിദ്യാനഗർ പോലീസ് അന്വേഷണം ആരംഭിച്ചിട്ടുണ്ട്.

സജീവ സാംസ്കാരിക പ്രവർത്തകൻ

ദീർഘകാലം സൗദി അറേബ്യയിൽ ജോലി ചെയ്തിരുന്ന ഷംസുദ്ദീൻ, നെല്ലിക്കട്ട ടൗൺ ജുമാ മസ്ജിദ് കമ്മിറ്റി അംഗമാണ്. സുന്നി സ്ഥാപനങ്ങളുമായി ബന്ധപ്പെട്ട് സജീവമായി പ്രവർത്തിച്ചു വന്നിരുന്നു. വർഷങ്ങൾക്കു മുമ്പാണ് പൈക്കയിൽ നിന്ന് നെല്ലിക്കട്ടയിൽ സ്ഥിരതാമസമാക്കിയത്.

ഭാര്യ: റഹീമ. മറ്റു മക്കൾ: റാഷിദ്, അർഫാത്ത്, സഹദ്, ഫാത്തിമ. മരുമകൾ: റഹീമ.

വാർത്ത ഷെയർ ചെയ്യൂ. വിഷയത്തില്‍ നിങ്ങളഉടെ അഭിപ്രായം കമന്‍റഅ ചെയ്യൂ.  കാസർകോട്ടെ കൂടുതൽ വാർത്തകളും പ്രാദേശിക വിവരങ്ങളും അപ്പപ്പോൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ.

Article Summary: A fatal accident occurred near Nellikatta, Kasaragod, on Saturday morning when a car collided with a Karnataka RTC bus. Shamsuddin (62), a resident of Nellikatta, died in the crash, while his 22-year-old son, Salman Haris, who was driving the car, sustained severe injuries. They were heading to the Kasaragod railway station.

#KasaragodNews #Accident #Cherkala #Nellikatta #KeralaPolice #RoadSafety #LocalNews #KeralaNews