Accident | കോഴിക്കോട് ഓടുന്ന ബസില്‍ നിന്ന് റോഡരികിലേക്ക് തെറിച്ച് വീണ് വയോധികന് ദാരുണാന്ത്യം

കോഴിക്കോട്: (KasargodVartha) ഓടുന്ന ബസില്‍ നിന്ന് റോഡരികിലേക്ക് തെറിച്ച് വീണ് വയോധികന് ദാരുണാന്ത്യം. മാങ്കാവ് പാറമ്മല്‍ സ്വദേശി കൊച്ചാളത്ത് ഗോവിന്ദന്‍ (Govindan-59) ആണ് മരിച്ചത്. ചൊവ്വാഴ്ച വൈകിട്ടോടെയാണ് സംഭവം. ബസില്‍ യാത്ര ചെയ്യുന്നതിനിടെയാണ് ദാരുണ അപകടം നടന്നത്. 

കോഴിക്കോട് നഗരത്തില്‍ നിന്നും പന്തീരാങ്കാവിലേക്ക് പോകുന്ന സിറ്റി ബസില്‍ നിന്നാണ് ഗോവിന്ദന്‍ തെറിച്ചുവീണത്. ചാലപ്പുറം കേസരിക്ക് സമീപം റോഡിലെ വളവില്‍ ബസ് തിരിയുന്നതിനിടെ റോഡരികിലേക്ക് തെറിച്ചുവീഴുകയായിരുന്നു. വാഹനത്തിന്റെ വാതിലിന് അരികിലായാണ് ഇദ്ദേഹം ഉണ്ടായിരുന്നതെന്ന് മറ്റ് യാത്രക്കാര്‍ പറഞ്ഞു. 

ബസിന്റെ പിന്‍ഭാഗത്തെ ഓട്ടോമാറ്റിക് വാതില്‍ തുറന്നുകിടക്കുകയായിരുന്നു. ഇതിലൂടെ പുറത്തേക്ക് തെറിച്ചുവീണ ഗോവിന്ദനെ ആശുപത്രിയിലെത്തിച്ചെങ്കിലും രക്ഷിക്കാനായില്ല. രാത്രി വൈകിയാണ് മരണം. മൃതദേഹം ആശുപത്രി മോര്‍ചറിയിലേക്ക് മാറ്റി. പോസ്റ്റുമോര്‍ട്ടം നടപടികള്‍ക്ക് ശേഷം ബന്ധുക്കള്‍ക്ക് വിട്ടുനല്‍കും.

പൊതുഗതാഗത വാഹനങ്ങളിലെ സുരക്ഷയെക്കുറിച്ച് ആശങ്ക ഉയര്‍ത്തുന്ന സംഭവമായാണ് ഈ ദുരന്തം നമ്മെ ഓര്‍മ്മിപ്പിക്കുന്നത്. യാത്രക്കാര്‍ തങ്ങളുടെ സുരക്ഷയ്ക്കായി ജാഗ്രത പാലിക്കേണ്ടതാണ്. തുറന്ന് കിടക്കുന്ന ഓട്ടോമാറ്റിക് വാതിലിനെ കുറിച്ച് ബസ് ഡ്രൈവര്‍മാരുടെ ശ്രദ്ധയില്‍പ്പെടുത്തുകയും, ഇറങ്ങേണ്ട  ബസ് സ്റ്റാന്‍ഡ് പരിസരം ഇവരുടെ ശ്രദ്ധയില്‍പെടുത്തേണ്ടതും അത്യാവശ്യമാണ്.
 

#KeralaAccident #BusAccident #Kozhikode #PublicSafety #RIP #KeralaNews #IndiaNews