പ്രശസ്ത നൃത്തകലാഗവേഷകൻ ആർകെ കാനായിയെ മരിച്ച നിലയിൽ കണ്ടെത്തി; ഭൗതിക ശരീരം മെഡിക്കൽ വിദ്യാർത്ഥികളുടെ പഠനാവശ്യത്തിനായി വിട്ടുനൽകണമെന്ന അദ്ദേഹത്തിന്റെ ആഗ്രഹം സഫലീകരിക്കും

പിലിക്കോട്: (KasargodVartha) പിലിക്കോട് സ്വദേശിയും കാനായി കുടുംബാംഗവുമായ നൃത്തകലാഗവേഷകൻ ആർകെ കാനായി എന്ന രാധാകൃഷ്ണൻ കാനായിയെ (60) വീട്ടിനുള്ളിൽ മരിച്ച നിലയിൽ കണ്ടെത്തി. 2026 ഏപ്രിൽ 21 ചൊവ്വാഴ്ച ഉച്ചയ്ക്കാണ് ഏച്ചിക്കൊവ്വലിലെ വീട്ടിനുള്ളിലെ കിടപ്പുമുറിയിൽ മൃതദേഹം കണ്ടെത്തിയത്. ഭരതനാട്യം, കുച്ചുപ്പുടി കലകളെ കുറിച്ചും ഉത്തരേന്ത്യൻ കലാരൂപങ്ങളെ കുറിച്ചും ആഴത്തിൽ ഗവേഷണം നടത്തിയിട്ടുള്ള കലാകാരനാണ് അദ്ദേഹം. പിലിക്കോട് ഏച്ചിക്കൊവ്വലിൽ സഹോദരി പണിതു നൽകിയ വീട്ടിൽ കുറെ നാളുകളായി ഒറ്റയ്ക്കായിരുന്നു താമസം.

രണ്ട് ദിവസമായി ഭക്ഷണം പുറത്ത്

കഴിഞ്ഞ രണ്ട് ദിവസമായി ഹോട്ടലിൽ നിന്ന് എത്തിക്കുന്ന ഭക്ഷണം പുറത്തുതന്നെ ഇരിക്കുന്നത് ശ്രദ്ധയിൽപെട്ടതിനെത്തുടർന്നാണ് സംശയം തോന്നിയത്. ഭക്ഷണം എടുത്തു കഴിക്കാത്ത വിവരം അറിയിച്ചതനുസരിച്ച് കരിവെള്ളൂരിലെ സഹോദരി ഇന്ദിരയും പഞ്ചായത്ത് മെമ്പർ എൻ രവീന്ദ്രനും സ്ഥലത്തെത്തി. 

ഉച്ചയോടെ ഇവർ ചന്തേര പോലീസിനെ വിവരമറിയിച്ചു. പോലീസ് എത്തി വീടിന്റെ വാതിൽ പൊളിച്ച് അകത്തു കടന്ന് പരിശോധിച്ചപ്പോഴാണ് കട്ടിലിൽ മരിച്ച നിലയിൽ ആർകെ കാനായിയെ കണ്ടെത്തിയത്.

മൃതദേഹത്തിന് മൂന്ന് ദിവസത്തെ പഴക്കം

കണ്ടെത്തിയ മൃതദേഹത്തിന് മൂന്ന് ദിവസത്തോളം പഴക്കമുണ്ടെന്നാണ് പ്രാഥമിക നിഗമനം. പോലീസ് ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം പരിയാരം മെഡിക്കൽ കോളേജ് മോർച്ചറിയിലേക്ക് മാറ്റി. നൃത്തകലകൾക്ക് പുറമെ യോഗാ പരിശീലനത്തിലും അദ്ദേഹം വിദഗ്ദ്ധനായിരുന്നു. 

തന്റെ മരണാനന്തര ചടങ്ങുകളൊന്നും നടത്തരുതെന്നും ഭൗതിക ശരീരം പരിയാരം മെഡിക്കൽ കോളേജിലെ വിദ്യാർത്ഥികളുടെ പഠനാവശ്യത്തിനായി വിട്ടുനൽകണമെന്നും അദ്ദേഹം മുൻപേ സുഹൃത്തുക്കളോടും ബന്ധുക്കളോടും നിർദ്ദേശിച്ചിരുന്നു.

കുടുംബവും കലാലോകവും

അദ്ദേഹത്തിന്റെ അന്ത്യാഗ്രഹം അനുസരിച്ച് ഭൗതിക ശരീരം മെഡിക്കൽ കോളേജിന് വിട്ടുനൽകുമെന്ന് മെമ്പർ എൻ രവീന്ദ്രൻ അറിയിച്ചു. കലാ ഗവേഷണ രംഗത്തും യോഗാ പരിശീലന രംഗത്തും വലിയൊരു സുഹൃദ്‌വലയത്തിന് ഉടമയായിരുന്നു ആർകെ കാനായി. വനജയാണ് ഭാര്യ. അദ്ദേഹത്തിന് രണ്ട് മക്കളുണ്ട്. അദ്ദേഹത്തിന്റെ അപ്രതീക്ഷിത വിയോഗത്തിൽ കലാലോകം അനുശോചിച്ചു.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളൊ ചെയ്യുക

Article Summary: Renowned dance researcher R.K. Kanai (60) was found dead in his house at Pilicode. His body will be donated to Pariyaram Medical College for study purposes as per his last wish.

#RKkanai #DanceResearcher #PilicodeNews #KasaragodNews #Obituary #MedicalBodyDonation #Bharathanatyam #PariyaramMedicalCollege #BreakingNews #KeralaArts