പ്രശസ്ത ഛായാഗ്രാഹകൻ ഷാജി കുമാർ അന്തരിച്ചു; വിടവാങ്ങിയത് ഹിറ്റ് ചിത്രങ്ങളുടെ ക്യാമറാമാൻ

കൊച്ചി: (KasargodVartha) പ്രശസ്ത സിനിമാ ഛായാഗ്രാഹകൻ ഷാജി കുമാർ (57) അന്തരിച്ചു. സിനിമാ സെറ്റിൽ വെച്ച് ദേഹാസ്വാസ്ഥ്യമുണ്ടായതിനെ തുടർന്ന് കൊച്ചിയിലെ ആശുപത്രിയിൽ ചികിത്സയിലിരിക്കെയാണ് അന്ത്യം. രണ്ട് ദിവസം മുൻപ് ആലപ്പുഴയിൽ വെച്ച് നടക്കുന്ന ദിലീപ് ചിത്രത്തിൻ്റെ സെറ്റിൽ വെച്ചാണ് ഷാജി കുമാറിന് ദേഹാസ്വാസ്ഥ്യമുണ്ടായത്.

ആലപ്പുഴയിൽ പ്രാഥമിക ചികിത്സ നൽകിയ ശേഷം കൊച്ചിയിലേക്ക് മാറ്റുകയായിരുന്നു. ഐസിയുവിലായിരുന്ന ഷാജി കുമാറിനെ ആരോഗ്യനില മെച്ചപ്പെട്ടതിനെ തുടർന്ന് മുറിയിലേക്ക് മാറ്റിയിരുന്നു. പിന്നീട് ശുചിമുറിയിലേക്ക് പോകുന്നതിനിടെ കുഴഞ്ഞുവീഴുകയും മരണം സംഭവിക്കുകയുമായിരുന്നു.

സിനിമാ ജീവിതം

ഛായാഗ്രാഹകൻ വിപിൻ മോഹൻ്റെ ശിഷ്യനായി പ്രവർത്തിച്ചാണ് ഷാജി കുമാർ സ്വതന്ത്ര ഛായാഗ്രാഹകനായി വളർന്നത്. ഫിലിമിൽ ചിത്രീകരണം ആരംഭിച്ച ഷാജി ഡിജിറ്റൽ സിനിമയുടെ കാലഘട്ടത്തിലും സജീവമായിരുന്നു. മലയാളത്തിനു പുറമേ തമിഴ്, ഹിന്ദി ചിത്രങ്ങളിലും അദ്ദേഹം പ്രവർത്തിച്ചിട്ടുണ്ട്. ഷാജി കൈലാസ്, ജോഷി, വിനയൻ, വൈശാഖ് തുടങ്ങിയ സംവിധായകരുടെ സിനിമകളിൽ അദ്ദേഹം പ്രവർത്തിച്ചു.

പുലിമുരുകൻ, നരൻ, ഒടിയൻ തുടങ്ങി 50-ലേറെ ചിത്രങ്ങളുടെ ഛായാഗ്രാഹകനായിരുന്നു അദ്ദേഹം. നസ്രാണി, റോബിൻഹുഡ്, ബാബാ കല്യാണി, വെള്ളിനക്ഷത്രം, അത്ഭുതദ്വീപ്, മധുരരാജ, റിങ് മാസ്റ്റർ, മല്ലു സിങ്, പത്തൊൻപതാം നൂറ്റാണ്ട്, ബാന്ദ്ര, തുടരും തുടങ്ങിയവയാണ് അദ്ദേഹം ഛായാഗ്രഹണം നിർവഹിച്ച മറ്റ് പ്രധാന സിനിമകൾ. 2011-ൽ പുറത്തിറങ്ങിയ 'പൊന്നർ ശങ്കർ' എന്ന തമിഴ് ചിത്രത്തിനും അദ്ദേഹം ഛായാഗ്രഹണം നിർവഹിച്ചു.

അതിമനോഹരം, ഒറ്റക്കൊമ്പൻ എന്നിവയാണ് അദ്ദേഹം ഛായാഗ്രഹണം നിർവഹിച്ച് പുറത്തിറങ്ങാനുള്ള പുതിയ സിനിമകൾ. ഇതിൽ 'അതിമനോഹരം' അടുത്ത മാസം അവസാനം പുറത്തിറങ്ങാനിരിക്കെയാണ് വിയോഗം.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: Renowned cinematographer Shaji Kumar passes away at 57 in a private hospital in Kochi.

#ShajiKumar #Cinematographer #MalayalamCinema #Pulimurugan #ObituaryKerala #EntertainmentNewsMalayalam #KochiNews #RenuNews