കുഞ്ഞ് നയാന്റെ അപകട മരണം നാടിനെ കണ്ണീരിലാഴ്ത്തി

ഉദുമ: (www.kasargodvartha.com 11.01.2018) ഓട്ടോയില്‍ കാറിടിച്ച് എട്ടുമാസം പ്രായമുള്ള കുഞ്ഞ് മാതാവിന്റെ കയ്യില്‍ നിന്നും പുറത്തേക്ക് തെറിച്ചുവീണ് മരണപ്പെട്ട സംഭവം നാടിനെ കണ്ണീരിലാഴ്ത്തി. ബേക്കല്‍ മീത്തല്‍ മൗവ്വലിലെ ശരീഫ്- ഫസീല ദമ്പതികളുടെ മകന്‍ മുഹമ്മദ് നയാന്‍ (എട്ടുമാസം) ആണ് അപകടത്തില്‍ മരിച്ചത്.

വ്യാഴാഴ്ച ഉച്ചയ്ക്ക് രണ്ടുമണിയോടെ പാലക്കുന്ന് ജംഗ്ഷനിലാണ് അപകടമുണ്ടായത്. ഓട്ടോറിക്ഷയില്‍ കാറിടിച്ചതിനെ തുടര്‍ന്ന് മാതാവിന്റെ കൈയ്യിലായിരുന്ന കുഞ്ഞ് റോഡിലേക്ക് തെറിച്ചുവീഴുകയായിരുന്നു. ഗുരുതരമായി പരിക്കേറ്റ നയാനെ ഉടന്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.

ഫാത്വിമത്ത് സിയാന സഹോദരിയാണ്. അപകടത്തില്‍ ഫസീലയുടെ മാതാവ് ആഇഷ (45), ബന്ധുവായ ഫാത്വിമ (10) എന്നിവര്‍ക്കും പരിക്കേറ്റു. ഇവരെ കിംസ് ആശുപത്രിയില്‍ പ്രവേശിപ്പിച്ചു. കുഞ്ഞിന്റെ അപകടവിവരമറിഞ്ഞ് നിരവധി പേര്‍ വീട്ടിലേക്ക് ഒഴുകിയെത്തി.
< !- START disable copy paste -->