വിഷം അകത്ത് ചെന്ന അംഗണ്‍വാടി വര്‍ക്കര്‍ മരിച്ചു; ഭര്‍തൃ പീഡനമെന്ന് പരാതി

കാസര്‍കോട്: വിഷം ഉള്ളില്‍ ചെന്ന് മൂന്ന് ദിവസമായി കാസര്‍കോട് സ്വകാര്യ ആശുപത്രിയില്‍ ചികിത്സയിലായിരുന്ന അംഗണ്‍വാടി വര്‍ക്കര്‍ മരിച്ചു. കുറ്റിക്കോല്‍ കാട്ടിപ്പാറ പള്ളഞ്ചിയിലെ അപ്പുഡുവിന്റെ മകള്‍ അനിത(36)യാണ് ഞായറാഴ്ച പുലര്‍ച്ചെ മരിച്ചത്. പള്ളിഞ്ചി അംഗണ്‍വാടിയില്‍ വര്‍ക്കറായി ജോലിചെയ്തുവരികയായിരുന്നു അനിത.

നീലേശ്വരം സ്വദേശി ബാലകൃഷ്ണന്റെ ഭാര്യയാണ്. മൂന്നു ദിവസം മുമ്പ് വീട്ടില്‍ വെച്ച് അനിത വിഷം കഴിക്കുകയായിരുന്നുവെന്ന് പറയുന്നു. വിഷം കഴിച്ച ശേഷം നിലവിളിച്ചുകൊണ്ട് അടുത്ത വീട്ടിലേക്ക് ഓടിയ അനിതയെ അയല്‍ക്കാരുടെ സഹകരണത്തോടെ വീട്ടുകാര്‍ ഉടന്‍ തന്നെ ആശുപത്രിയിലെത്തിക്കുകയായിരുന്നു. ആശുപത്രിയില്‍ ഇതുവരെ അത്യാസന്ന നിലയില്‍ കഴിയുകയായിരുന്നു.

അഞ്ച് വര്‍ഷം മുമ്പാണ് അനിതയുടെ വിവാഹം നടന്നത്. ഭര്‍ത്താവ് അനിതയെ പീഡിപ്പിക്കുന്നത് പതിവായിരുന്നുവെന്നും സംഭവ ദിവസം വയറ്റത്ത് ചവിട്ടിയിരുന്നതായും ബന്ധുക്കള്‍ പറഞ്ഞു. ഇതേ തുടര്‍ന്ന് അനിതയ്ക്ക് രക്ത സ്രാവം അനുഭവപ്പെട്ടിരുന്നു.

നെല്ലിക്കട്ട, മുള്ളേരിയ, ആദൂര്‍ എന്നിവിടങ്ങളില്‍ നിന്ന് ബാലകൃഷ്ണന്‍ നേരത്തെ വിവാഹം കഴിച്ചിരുന്നതായും അനിതയുടെ ബന്ധുക്കള്‍ ആരോപിച്ചു. മൃതദേഹം കാസര്‍കോട് ജനറല്‍ ആശുപത്രി മോര്‍ച്ചറിയിലേക്ക് മാറ്റി.