14 കാരനായ വിദ്യാർത്ഥിയെ വീട്ടിലെ കിടപ്പുമുറിയിൽ മരിച്ച നിലയിൽ കണ്ടെത്തി

ആദൂർ: (KasargodVartha) വീട്ടിലെ കിടപ്പുമുറിയിൽ 14 കാരനായ വിദ്യാർത്ഥിയെ മരിച്ച നിലയിൽ കണ്ടെത്തിയ സംഭവം ആദൂർ നെട്ടണിഗെ കുഞ്ചത്തൊട്ടിയെ കണ്ണീരിലാഴ്ത്തി. നെട്ടണിഗെയിലെ ജയകര–അനിത ദമ്പതികളുടെ മകൻ പ്രജ്വൽ ആണ് മരിച്ചത്. പ്രജ്വൽ ബെള്ളൂർ ഗവ. ഹയർസെക്കണ്ടറി സ്‌കൂളിലെ ഒമ്പതാം ക്ലാസ് വിദ്യാർത്ഥിയായിരുന്നു.

മാതാവ് അനിത മുള്ളേരിയ സ്കൂളിൽ പഠിക്കുന്ന മകളെ കൂട്ടാൻ പോയ സമയത്തായിരുന്നു സംഭവം നടന്നതെന്ന് പോലീസ് പറഞ്ഞു. തിങ്കളാഴ്ച (15.12.2025) ഉച്ച കഴിഞ്ഞ് 2.30നും 4.30നും ഇടയിലാണ് ദുരന്തം നടന്നതെന്നാണ് പോലീസ് നിഗമനം. തിരികെ വീട്ടിലെത്തിയപ്പോഴാണ് പ്രജ്വലിനെ കിടപ്പുമുറിയിലെ ഹുക്കിൽ ഷാളിൽ തൂങ്ങിയ നിലയിൽ മാതാവ് കണ്ടെത്തിയത്.

ഞായറാഴ്ച പ്രജ്വൽ മാതാവിൻ്റെ വീട്ടിൽ പോയിരുന്നു. അവിടെ നിന്നാണ് തിങ്കളാഴ്ച സ്കൂളിൽ പരീക്ഷ എഴുതാൻ എത്തിയത്. പരീക്ഷ ഉച്ചയ്ക്ക് ശേഷമാണെന്ന് കരുതി 11 മണിയോടെയാണ് വിദ്യാർത്ഥി സ്കൂളിലെത്തിയത്. എന്നാൽ പരീക്ഷാ സമയം രാവിലെയായിരുന്നു. എങ്കിലും, സമയം വൈകിയിട്ടും പ്രജ്വലിനെ പരീക്ഷ എഴുതാൻ അനുവദിച്ചിരുന്നുവെന്ന് സ്കൂൾ അധികൃതർ പോലീസിനെ അറിയിച്ചു.

വിദ്യാർത്ഥി എന്തിനാണ് ജീവനൊടുക്കിയതെന്ന് വ്യക്തമല്ല. പ്രജ്വലിൻ്റെ മരണം സഹപാഠികളെയും കുടുംബാംഗങ്ങളെയും നാട്ടുകാരെയും സങ്കടത്തിലാഴ്ത്തി. ഏകസഹോദരി പ്രയാഗ.

സംഭവത്തിൽ ആദൂർ പോലീസ് അസ്വാഭാവിക മരണത്തിന് കേസ് രജിസ്റ്റർ ചെയ്ത് വിശദമായ അന്വേഷണം ആരംഭിച്ചു. മൃതദേഹം കാസർകോട് ജനറൽ ആശുപത്രിയിൽ പോസ്റ്റ്‌മോർട്ടത്തിന് ശേഷം ബന്ധുക്കൾക്ക് വിട്ടുകൊടുക്കുമെന്നും അധികൃതർ അറിയിച്ചു. 

ശ്രദ്ധിക്കുക: സ്വയം ജീവനൊടുക്കുന്നത് ഒന്നിനും പരിഹാരമല്ല, മാനസികാരോഗ്യ വിദഗ്‌ധരുടെ സഹായം തേടുക, അതിജീവിക്കാൻ ശ്രമിക്കുക. അത്തരം ചിന്തകളുള്ളപ്പോൾ 'ദിശ' ഹെൽപ് ലൈനിൽ വിളിക്കുക. ടോൾ ഫ്രീ ഹെൽപ് ലൈൻ നമ്പർ: 1056, 0471-2552056

കുട്ടികൾക്കിടയിലെ മാനസിക സമ്മർദ്ദം ചർച്ച ചെയ്യേണ്ട സമയം അതിക്രമിച്ചിരിക്കുന്നു; നിങ്ങളുടെ അഭിപ്രായം പങ്കുവെക്കുക

Article Summary: 14-year-old student Prajwal found dead in his bedroom in Adhur, Kasaragod; police launch unnatural death investigation.

#Adhur #Kasaragod #StudentDeath #UnnaturalDeath #Prajwal #PoliceInvestigation