7 കളികളില്‍ നിന്ന് ഒരു ജയം മാത്രം; ദക്ഷിണാഫ്രിക്ക ലോകകപ്പില്‍ നിന്നും പുറത്ത്

ലണ്ടന്‍: (www.kasargodvartha.com 24.06.2019) ഏഴ് കളികളില്‍ നിന്ന് ഒരു ജയം മാത്രം. ഇതോടെ ദക്ഷിണാഫ്രിക്കയുടെ ലോകകപ്പ് പ്രതീക്ഷ അവസാനിച്ചു. മിന്നും താരങ്ങളുണ്ടായിട്ടും ദക്ഷിണാഫ്രിക്കയെ നോക്കൗട്ടിലെത്തിക്കാനായില്ല. ഞായറാഴ്ച നടന്ന മത്സരത്തില്‍ പാക്കിസ്ഥാനെതിരെ 49 റണ്‍സിന് ദക്ഷിണാഫ്രിക്ക പരാജയപ്പെട്ടു. ആദ്യം ബാറ്റിംഗിനിറങ്ങിയ പാക്കിസ്ഥാന്‍ നിശ്ചിത 50 ഓവറില്‍ ഏഴ് വിക്കറ്റ് നഷ്ടത്തില്‍ 308 റണ്‍സ് നേടി. പാക്കിസ്ഥാനു വേണ്ടി ഹാരിസ് സുഹൈല്‍ 59 പന്തുകളില്‍ നിന്ന് 89 റണ്‍സ് അടിച്ചെടുത്തു. ബാബര്‍ അസം 80 പന്തുകളില്‍ നിന്ന് 69 റണ്‍സ് നേടി.

മറുപടി ബാറ്റിംഗിനിറങ്ങിയ ദക്ഷിണാഫ്രിക്ക 9 വിക്കറ്റ് നഷ്ടത്തില്‍ 259 റണ്‍സെടുക്കാനേ സാധിച്ചുള്ളൂ. 63 റണ്‍സുമായി നായകന്‍ ഫാഫ് ഡ്യൂപ്ലസിസ്, 47 റണ്‍സെടുത്ത ഡീ കോക്ക് എന്നിവര്‍ക്ക് മാത്രമേ തിളങ്ങാനായുള്ളൂ. ജയത്തോടെ പാക്കിസ്ഥാന്‍ അഞ്ചു പോയിന്റുമായി ഏഴാം സ്ഥാനത്താണ്.