പിണറായി വിജയൻ ദുബൈയിലെത്തി; എട്ട് ദിവസം യുഎഇയിൽ; വിവിധ പരിപാടികൾ; മുഖ്യമന്ത്രിയുടെ പുത്തൻ ലുക് സാമൂഹ്യ മാധ്യമങ്ങളിൽ വൈറൽ

ദുബൈ: (www.kasargodvartha.com 29.01.2022) ചികിത്സ കഴിഞ്ഞ് അമേരികയിൽ നിന്ന് മടങ്ങിയ മുഖ്യമന്ത്രി പിണറായി വിജയൻ ദുബൈയിലെത്തി. എട്ട് ദിവസം അദ്ദേഹം യുഎഇയിലുണ്ടാവും. മുഖ്യമന്ത്രിയെ ഇൻഡ്യൻ കോൻസല്‍ ജനറല്‍ അമന്‍ പുരിയുടെ നേതൃത്വത്തിലുള്ള സംഘം സ്വീകരിച്ചു. ഭാര്യ കമലയും ഒപ്പമുണ്ട്. നാല്, അഞ്ച്, ആറ് തീയതികളിൽ നടക്കുന്ന വിവിധ പരിപാടികളിൽ പങ്കെടുത്തശേഷം ഏഴിന് നാട്ടിലേക്കു തിരിയ്ക്കും.
                                                         
ആദ്യത്തെ രണ്ട് ദിവസത്തെ വിശ്രമത്തിന് ശേഷം അബുദബി, ശാർജ എന്നിവിടങ്ങളിൽ യുഎഇ അധികൃതരുമായി കൂടിക്കാഴ്ച നടത്തും. ഫെബ്രുവരി നാലിന് ദുബൈ എക്സ്പോയിലെ കേരള പവിലിയൻ ഉദ്ഘാടനം ചെയ്യും. അഞ്ചിനു രാവിലെ യുഎഇയിലെ വ്യവസായ പ്രമുഖർ പങ്കെടുക്കുന്ന പരിപാടിയുടെ ഉദ്ഘാടനവും വൈകിട്ട് നോർക സമ്മേളനത്തിന്റെ ഉദ്ഘാടനവും നിർവഹിക്കും. എക്സ്പോയിൽ ആറുദിവസമാണ് കേരളത്തിന്‍റെ നേട്ടങ്ങള്‍ പ്രദര്‍ശിപ്പിക്കാന്‍ അനുമതി ലഭിച്ചിട്ടുള്ളത്.

നിക്ഷേപകരെ കേരളത്തിലേക്ക് സ്വാഗതം ചെയ്യുന്നതിനും ഊന്നൽ നൽകും.

അമേരികയിൽ നിന്നും നാട്ടിലെത്തിയതിനു ശേഷമായിരിക്കും കേരള പവലിയൻ ഉദ്‌ഘാടനത്തിനും മറ്റു പരിപാടികളിൽ പങ്കെടുക്കുന്നതിനും മുഖ്യമന്ത്രി യുഎഇയിൽ എത്തുക എന്നാണ് കരുതിയിരുന്നത്. എന്നാൽ നേരിട്ട് ദുബൈയിൽ എത്തുകയായിരുന്നു. അതിനിടെ പാന്റും കുപ്പായവും ധരിച്ചുള്ള മുഖ്യമന്ത്രിയുടെ പുതിയ ലുകും സാമൂഹ്യ മാധ്യമങ്ങളിൽ വൈറലായി. അനവധി പേരാണ് ഇതിന്റെ ചിത്രങ്ങളും വീഡിയോയും ഷെയർ ചെയ്യുന്നത്. < !- START disable copy paste -->