വീട് നിര്‍മ്മാണ സ്ഥലത്ത് ഒളിപ്പിച്ചു വെച്ച 4.200 കിലോ കഞ്ചാവുമായി യുവാവിനെ പോലീസ് കൈയ്യോടെ പൊക്കി

By Web Desk - MainJul 6, 2020, 12:34 IST

കുമ്പള: (www.kasargodvartha.com 06.07.2020) വീട് നിര്‍മ്മാണ സ്ഥലത്ത് ഒളിപ്പിച്ചു വെച്ച 4.200 കിലോ കഞ്ചാവുമായി യുവാവിനെ പോലീസ് കൈയ്യൊടെ പൊക്കി. ബന്തിയോട് കുക്കാര്‍ ബൈത്തലയിലെ മുഹമ്മദ് ബാദുഷ (36) യെയാണ് കുമ്പള എസ് ഐ സന്തോഷ് കുമാറും സംഘവും ഞായറാഴ്ച രാത്രി അറസ്റ്റ് ചെയ്തത്. ബന്തിയോട് അടുക്കയില്‍ വാടക ക്വാര്‍ട്ടേഴ്‌സില്‍ താമസിച്ചു വരുന്ന ബാദുഷ അടുക്കയില്‍ നിര്‍മ്മിച്ചു വരുന്ന പുതിയ വീടിനകത്ത് കഞ്ചാവ് ഒളിപ്പിച്ച് വെച്ച് വില്‍പ്പന നടത്തി വരികയായിരുന്നു.

രഹസ്യവിവരം ലഭിച്ചതനുസരിച്ച് കുമ്പള പോലീസ് എസ് ഐ സന്തോഷ് കുമാര്‍ പോലീസുകാരായ പ്രതീഷ് ഗോപാല്‍, രാജേഷ് ,രൂപേഷ്, ദിവ്യ എന്നിവരുടെ നേതൃത്വത്തിലാണ് പരിശോധന നടത്തി കഞ്ചാവ് പിടികൂടിയത്. കര്‍ണാടകയില്‍ നിന്നാണ് കഞ്ചാവ് എത്തിച്ചതെന്ന് ഇയാള്‍ ചോദ്യം ചെയ്യലില്‍ മൊഴി നല്‍കിയിട്ടുണ്ട്.