38 വർഷം മുമ്പ് ക്ലാസ്മേറ്റ് ആയിരുന്ന സഹപാഠിക്ക് വിഷു കൈനീട്ടമായി നൽകിയത് സുന്ദരമായ ഒരു വീട്

ജീവിതത്തിനിടയിൽ ഒന്നിന് പിറകെ ഒന്നായി തിരിച്ചടികൾ നേരിട്ട യുവതിയും കുടുംബവും കഴിഞ്ഞിരുന്നത് പ്ലാസ്റ്റിക് ഷീറ്റ് കൊണ്ട് മറച്ചു കെട്ടിയ ഒരു കുടിലിൽ ആയിരുന്നു.

ജീവിതത്തിൽ ആദ്യം മകൻ നഷ്ടപെട്ടു. പിന്നാലെ ഭർത്താവും മരിച്ചു. ആരോടും പരാതിയും പരിഭവവും ഇല്ലാതെ കാവുംകുടിയിലെ അഞ്ചു സെന്റ് ഭൂമിയിൽ പ്രായ പൂർത്തിയായ മകളുമായി ദുരിത ജീവിതം നയിച്ചു വരുന്നതിനിടയിലാണ് എളേരിത്തട്ട് കോളജിലെ പഴയ കൂട്ടുകാരും പഠിപ്പിച്ച അധ്യാപകനും ചേർന്ന് തങ്ങളുടെ സഹപാഠിയുടെ ജീവിത കഥ അറിയുന്നത്. 

നാട്ടിലും വിദേശത്തുമായി ജോലി ചെയ്യുന്ന സുഹൃത്തുക്കൾ തങ്ങളുടെ പഴയ കൂട്ടുകാരിയെ സഹായിക്കാൻ രംഗത്ത് വന്നു. വീട് നിർമാണ കമിറ്റി രൂപീകരിക്കുകയും കാവുംകുടിയിലെത്തി അവിടുത്തെ നാട്ടുകാരുടെയും വാർഡ് മെമ്പറുടെയും സഹകരണത്തോടെ വിഷുവിനു മുൻപ് വീടിന്റെ നിർമാണം പൂർത്തീകരിക്കുകയുമായിരുന്നു.

ആറു ലക്ഷം രൂപയോളം ചിലവഴിച്ചു നിർമിച്ച രണ്ട് കിടപ്പ് മുറികൾ, അടുക്കള, ഹാൾ, ബാത് റൂം സൗകര്യം അടങ്ങിയ കോൺക്രീറ്റ് വീടിന്റെ താക്കോൽ ഞായറാഴ്ച രാവിലെ പതിനൊന്നര മണിയോടെ ക്ലാസ്മേറ്റ് ടീം യുവതിക്ക് കൈമാറിയപ്പോൾ സന്തോഷം കൊണ്ട് ഈ നിർധന വീട്ടമ്മ വിങ്ങി പൊട്ടി.

അന്നത്തെ ഹിന്ദി അധ്യാപകനും എളേരിത്തട്ട് ഇ കെ നായനാർ കോളജിലെ റിട. പ്രിൻസിപാളുമായ പ്രൊഫ. സലിം കുമാർ ക്ലാസ്മേറ്റ് നൽകുന്ന സ്നേഹ വീടിന്റെ താകോൽ യുവതിക്ക് കൈമാറി.

ചടങ്ങിൽ വാർഡ് മെമ്പർ നിഷാ ബിജു അധ്യക്ഷത വഹിച്ചു. ടി കെ നാരായണൻ, പി സുബാഷ്, എം വി ജോസഫ്, കെ എ രാധ, മേരി ടീചെർ, റിട. എസ്ഐ കെ ഡി സുകുമാരൻ, ജെയ്സമ്മ, കെ രാജേന്ദ്രൻ, മാമച്ചൻ എന്നിവർ പങ്കെടുത്തു.

Keywords:  News, Vellarikundu, House, class, Kasaragod, Top-Headlines, Kerala, State, The undergraduate batch giving a home to the classmate.