യുവതിയുടെ മരണവുമായി ബന്ധപ്പെട്ട് ആശുപത്രിക്കെതിരെ സോഷ്യല്‍ മീഡിയയിലൂടെ അപകീര്‍ത്തികരമായ പ്രചരണം നടത്തിയതായി പരാതി; കോടതി നിര്‍ദേശ പ്രകാരം പോലീസ് കേസെടുത്തു

കാഞ്ഞങ്ങാട്: (www.kasargodvartha.com 11.10.2018) യുവതിയുടെ മരണവുമായി ബന്ധപ്പെട്ട് ആശുപത്രിക്കെതിരെ സോഷ്യല്‍ മീഡിയയിലൂടെ അപകീര്‍ത്തികരമായ പ്രചരണം നടത്തിയതായി പരാതി. സംഭവത്തില്‍ കോടതി നിര്‍ദേശ പ്രകാരം യുവാവിനെതിരെ പോലീസ് കേസെടുത്തു. കുന്നുമ്മലിലെ സ്വകാര്യ ആശുപത്രി മാനേജര്‍ ഇ.വി മുരളീധരനാണ് കോടതിയെ സമീപച്ചത്.

സംഭവത്തില്‍ രാജപുരത്തെ മനീഷിനെതിരെയാണ് കേസെടുത്തിരിക്കുന്നത്. പാണത്തൂര്‍ സ്വദേശിനിയായ യുവതി ഇക്കഴിഞ്ഞ മാര്‍ച്ച് 22ന് മംഗളൂരുവിലെ ആശുപത്രിയില്‍ വെച്ച് മരണപ്പെട്ടിരുന്നു. ആദ്യം കുന്നുമ്മലിലെ സ്വകാര്യ ആശുപത്രിയില്‍ ചികിത്സയിലായിരുന്ന യുവതിയെ പിന്നീട് മംഗളൂരുവിലേക്ക് മാറ്റുകയായിരുന്നു. ഈ സംഭവത്തെ കോര്‍ത്തിണക്കിയാണ് ആശുപത്രിക്കെതിരെ അപകീര്‍ത്തികരമായ പ്രചരണം നടത്തിയതെന്നാണ് പരാതി.

സംഭവം സംബന്ധിച്ച് ആദ്യം പോലീസില്‍ പരാതി നല്‍കിയിരുന്നുവെങ്കിലും കേസെടുത്തിരുന്നില്ല. ഇതോടെ കോടതിയെ സമീപിക്കുകയായിരുന്നു.