Announcement | മകളുടെ വിവാഹം ക്ഷണിച്ച് അമ്മയുടെ അനൗൺസ്മെന്റ്; ശബ്ദസന്ദേശം സാമൂഹ്യ മാധ്യമങ്ങളിൽ വൈറലായി; താരമായി ഗീതാ റാവു

നീലേശ്വരം: (KasargodVartha) മകളുടെ വിവാഹം ക്ഷണിക്കാൻ മാതാവ് അനൗൺസ്മെന്റ് രൂപത്തിൽ തയ്യാറാക്കിയ ശബ്ദ സന്ദേശം വൈറലായി. നീലേശ്വരം പട്ടേന നീരൊഴുക്കിൽ അമ്മു നിലയത്തിലെ ഗീതാ റാവുവാണ് വേറിട്ട ഈ പരീക്ഷണം നടത്തിയത്. ഗീതാ റാവു - അശോകൻ മൈലിട്ട ദമ്പതികളുടെ മകൾ എം ശ്രീലക്ഷ്മിയുടെ വിവാഹം 19ന് പടിഞ്ഞാറ്റംകൊഴുവൽ എൻഎസ്എസ് ഓഡിറ്റോറിയത്തിലാണ് നടക്കുന്നത്.
  
മാതമംഗലം പാണപ്പുഴ പറവൂർ തായലെപുരയിൽ ഹൗസിലെ ടി പി ഗോപാലന്റെയും സി ബീനയുടെയും മകൻ ഗോകുലാണ് വരൻ. വിവാഹം അറിയിക്കാനായി കുടുംബ സുഹൃത്തായ പ്രശസ്ത അനൗൺസർ കരിവെള്ളൂർ രാജനെ ഫോണിൽ വിളിച്ചപ്പോൾ അദ്ദേഹമാണ് വേറിട്ട ആശയം മുന്നോട്ട് വെച്ചതെന്ന് ഗീതാ റാവു പറയുന്നു. ആദ്യമൊന്നു മടിച്ചെങ്കിലും പിന്നീട് കരിവെള്ളൂരിലെ ഇദ്ദേഹത്തിന്റെ സ്റ്റുഡിയോയിലെത്തി അനൗൺസ്മെന്റ്‌രൂപത്തിൽ വിവാഹക്ഷണം തയാറാക്കി റെകോർഡ്‌ ചെയ്യുകയായിരുന്നു.