Nipah Alerts | കണ്ണൂര്‍ ഉള്‍പെടെ സംസ്ഥാനത്തെ 3 ജില്ലകള്‍ക്കും നിപ ജാഗ്രതാ നിര്‍ദേശം

കോഴിക്കോട്: (www.kasargodvartha.com) സംസ്ഥാനത്ത് നാല് പേര്‍ക്ക് നിപ വൈറസ് ബാധ സ്ഥിരീകരിച്ചതിന് പിന്നാലെ ജാഗ്രതാ നിര്‍ദേശവുമായി ആരോഗ്യ വകുപ്പ്. കോഴിക്കോട് നിപ സ്ഥീരീകരിച്ച പശ്ചാത്തലത്തില്‍ കണ്ണൂര്‍, വയനാട്, മലപ്പുറം എന്നീ അയല്‍ ജില്ലകള്‍ക്കും ജാഗ്രതാ നിര്‍ദേശം നല്‍കി ആരോഗ്യ വകുപ്പ്.

കോഴിക്കോട് ആശുപത്രിയില്‍ ചികിത്സയിലുള്ള രണ്ടു പേര്‍ക്കും കഴിഞ്ഞ ദിവസം മരിച്ച രണ്ടു പേര്‍ക്കുമാണു രോഗബാധ സ്ഥിരീകരിച്ചത്. പുനെ വൈറോളജി ഇന്‍സ്റ്റിറ്റിയൂടില്‍ നിന്നുള്ള സാംപിള്‍ പരിശോധനാഫലം കിട്ടിയതിന് പിന്നാലെയാണു സ്ഥിരീകരണം.

ആശുപത്രിയില്‍ ചികിത്സയിലുള്ള നിപ ബാധിതരുടെ ചികിത്സയ്ക്കായി മോണോക്ലോണല്‍ ആന്റിബോഡിയുടെ ലഭ്യത ഐസിഎംആറുമായി ബന്ധപ്പെട്ട് ഉറപ്പ് വരുത്തിയിട്ടുണ്ട്. കോഴിക്കോട് നിപ കന്‍ട്രോള്‍ റൂം (0495 2383100 , 0495 2383101, 0495 2384100, 0495 2384101, 0495 2386100) ആരംഭിച്ചു. കോണ്ടാക്ട് ട്രെയ്‌സിംഗും സര്‍വയലന്‍സ് പ്രവര്‍ത്തനങ്ങളും ആരംഭിച്ചിട്ടുണ്ട്.