Sadbhavana Mandir | സൗകര്യപ്രദമായ അടുക്കളയും 30 പേര്‍ക്ക് ഒരുമിച്ചിരുന്ന് ഭക്ഷണം കഴിക്കാനുള്ള ഹാളും നാല് ശുചിമുറികളും; കാസര്‍കോട് ബ്ലോക് പഞ്ചായത് സദ്ഭാവന മന്ദിരം മന്ത്രി വി അബ്ദു റഹ്മാന്‍ നാടിന് സമര്‍പിച്ചു

കാസര്‍കോട്: (KasargodVartha) കാസര്‍കോട് ബ്ലോക്ക് പഞ്ചായത്ത് പ്രധാനമന്ത്രി ജന്‍ വികാസ് കാര്യക്രം പദ്ധതി (പി.എം.ജെ.വി.കെ) മുഖേന നിര്‍മ്മിച്ച സദ്ഭാവന മന്ദിരം സംസ്ഥാന ന്യൂനപക്ഷ ക്ഷേമ, സ്‌പോര്‍ട്‌സ്, വഖ്ഫ്, ഹജ്ജ് വകുപ്പ് മന്ത്രി വി അബ്ദുറഹ്മാന്‍ ഉദ്ഘാടനം ചെയ്തു. സംസ്ഥാന ന്യൂനപക്ഷ ക്ഷേമ വകുപ്പും കേന്ദ്ര ന്യൂനപക്ഷ ക്ഷേമ വകുപ്പും സംയുക്തമായി തുക ചിലവഴിച്ചാണ് സദ്ഭാവന മന്ദിരം നിര്‍മ്മിക്കുന്നതെന്നും മികച്ച രീതിയില്‍ സദ്ഭാവന മന്ദിരം പ്രവര്‍ത്തിച്ചു മുന്നോട്ടുകൊണ്ടുപോകാന്‍ സാധിക്കട്ടെയെന്നും മന്ത്രി വി.അബ്ദുറഹ്മാന്‍ പറഞ്ഞു.

ചെങ്കള പഞ്ചായത്തിലെ ചെര്‍ക്കളയിലാണ് സദ്ഭാവന കെട്ടിടം നിര്‍മ്മിച്ചിരിക്കുന്നത്. 1 കോടി 40 ലക്ഷം രൂപയാണ് കെട്ടിടത്തിന്റെ നിര്‍മ്മാണ ചിലവ്. 75ഓളം പേര്‍ക്ക് ഇരിക്കാന്‍ പറ്റാവുന്ന കെട്ടിടമാണ് നിര്‍മ്മിച്ചിട്ടുള്ളത്. സൗകര്യപ്രദമായ അടുക്കളയും 30 പേര്‍ക്ക് ഒരുമിച്ചിരുന്ന് ഭക്ഷണം കഴിക്കാനുള്ള ഹാളും 4 ടോയ്‌ലറ്റുകളും സദ്ഭാവന മന്ദിരത്തിലുണ്ട്.