ആശങ്ക തുടരുന്നു; യുക്രൈൻ - പോളൻഡ് അതിർത്തിയിൽ കുടുങ്ങിയ വിദ്യാർഥികളെ ഒഴിപ്പിക്കുന്നത് ബുദ്ധിമുട്ടാണെന്ന് ഉദ്യോഗസ്ഥൻ; മുൻകൂർ അറിയിപ്പില്ലാതെ ചെക്പോസ്റ്റുകളിൽ എത്തരുതെന്ന് എംബസി

കൈവ്: (www.kasargodvartha.com 26.02.2022) യുക്രൈൻ - പോളൻഡ് അതിർത്തിയിൽ കുടുങ്ങിക്കിടക്കുന്ന നിരവധി വിദ്യാർഥികളെ സുരക്ഷിതമായി ഒഴിപ്പിക്കുന്നത് ഇൻഡ്യയ്ക്ക് ബുദ്ധിമുട്ടാണെന്ന് പോളൻഡിലെ ഒരു ഇൻഡ്യൻ സർകാർ ഉദ്യോഗസ്ഥൻ ശനിയാഴ്ച പറഞ്ഞു. അതിർത്തിയിൽ സ്ഥിതിഗതികൾ വഷളായിക്കൊണ്ടിരിക്കുന്നതിനാൽ യുക്രേനിയൻ സുരക്ഷാ സേന ഇൻഡ്യൻ വിദ്യാർഥികളെ അതിർത്തി കടക്കാൻ സഹായിക്കുന്നില്ല.


നിരവധി യുക്രേനിയക്കാരും വിദേശികളും സുരക്ഷിത അഭയം തേടി പോളൻഡിലേക്ക് നീങ്ങുന്നതിനാൽ അതിർത്തിക്ക് സമീപം അഞ്ച് കിലോമീറ്റർ നീളമുള്ള ക്യൂ രൂപപ്പെട്ടിട്ടുണ്ട്. ഷെഹിനി-മെഡിക അതിർത്തിയിൽ കുടുങ്ങിക്കിടക്കുന്ന ഭൂരിഭാഗം വിദ്യാർഥികളും ലിവ് നഗരത്തിലെ കോളേജുകളിൽ നിന്നുള്ളവരാണ്.

'ഇൻഡ്യൻ വിദ്യാർഥികൾ 10 മണിക്കൂറായി അതിർത്തിയിലാണ്. യുക്രൈൻ ഭാഗത്ത് നിന്ന്, സുരക്ഷാ സേന ആരെയും കടത്തി വിടുന്നില്ല, അവർ സ്ത്രീകളെയും കുട്ടികളെയും അനുവദിക്കുമായിരുന്നു. എന്നാൽ ഇപ്പോൾ സ്ഥിതി അൽപ്പം അക്രമാസക്തമാകുകയാണ്. ജനങ്ങൾ നിരാശരാവുകയാണ്, പ്രത്യേകിച്ച് യുക്രേനിയക്കാർ വരിയിൽ മുന്നിലെത്താൻ ശ്രമിക്കുന്നു' - പോളൻഡിലെ ഇൻഡ്യൻ ഉദ്യോഗസ്ഥൻ പറഞ്ഞു. കാത്തിരിക്കുകയല്ലാതെ മറ്റൊന്നും ചെയ്യാനില്ലെന്നും അദ്ദേഹം കൂട്ടിച്ചേർത്തു.

സർകാർ ഉദ്യോഗസ്ഥരുമായി മുൻകൂർ ഏകോപനം കൂടാതെ ഏതെങ്കിലും അതിർത്തി ചെക്പോസ്റ്റുകളിലേക്ക് മാറരുതെന്ന് കൈവിലെ ഇൻഡ്യൻ എംബസി മുന്നറിയിപ്പ് നൽകിയിട്ടുണ്ട്. മുൻകൂർ അറിയിപ്പില്ലാതെ അതിർത്തി ചെക്പോസ്റ്റുകളിൽ എത്തുന്ന ഇൻഡ്യൻ പൗരന്മാരെ സഹായിക്കാൻ എംബസിക്ക് കൂടുതൽ ബുദ്ധിമുട്ടാണെന്നും അറിയിപ്പിൽ പറയുന്നു. ഇൻഡ്യൻ പൗരന്മാരെ ഏകോപിപ്പിച്ച് ഒഴിപ്പിക്കാൻ അയൽ രാജ്യങ്ങളിലെ എംബസികളുമായി തുടർചയായി പ്രവർത്തിക്കുകയാണെന്നും എംബസി വ്യക്തമാക്കി. വെള്ളം, ഭക്ഷണം, താമസം, അടിസ്ഥാന സൗകര്യങ്ങൾ എന്നിവ താരതമ്യേന സുരക്ഷിതമായ യുക്രൈനിലെ പടിഞ്ഞാറൻ നഗരങ്ങളിൽ താമസിക്കാൻ എംബസി ഇൻഡ്യക്കാരെ ഉപദേശിച്ചു.

< !- START disable copy paste -->